Read Caribbean Javanese 2 Samuèl 9 Bible Online

2 Samuèl 9 - Caribbean Javanese bible

2 Samuèl 9

¹Daved ngomong: “Apa ijik ana turunané Saul? Aku karep nindakké kawelasan marang wong kuwi awit sangka Yonatan.”

²Nanging brayaté Saul nduwé abdi, sing diarani Siba; kuwi dityeluk nemoni ing ngarepé Daved, terus ditakoni Daved: “Apa kowé kuwi Siba?” Semauré sing ditakoni: “Ya ndara.”

³Daved terus takon menèh: “Apa ora ana brayaté Saul menèh? Aku karep nindakké kawelasan sing sangka Gusti Allah.” Siba terus ngomong marang Daved: “Ijik ana anaké Yonatan siji sing tyiri sikilé.”

⁴Pitakoné Daved: “Kuwi saiki ana ngendi?” Semauré Siba marang Daved: “Dèwèké ana, ing omahé Makir anaké Amièl ing Lodebar.”

⁵Sakwisé kuwi Daved ngongkon nyeluk anak mau sangka omahé Makir anaké Amièl, ing Lodebar.

⁶Nanging Méfibosèt anaké Yonatan anaké Saul terus mlebu ngadep marang Daved, sujut lan nyembah. Tembungé Daved: “Méfibosèt.” Semauré: “Ya, kula abdimu.”

⁷Daved terus ngomong: “Kowé aja samar, awit aku bakal nindakké katrésnan marang kowé, awit sangka Yonatan, bapakmu; aku bakal mbalèkké sakkèhé lemah duwèké Saul, mbahmu lan kowé bakal mangan bebarengan karo aku.”

⁸Méfibosèt terus sujut lan ngomong: “Abdimu iki apa ta, nanging sampéyan gelem mikir marang asu mati kaya kula iki?”

⁹Daved terus nyeluk Siba, abdiné Saul lan ngomong marang dèwèké: “Kabèh sing dadi duwèké Saul mau, lan duwèké brayaté, tak wènèhké marang putuné bendaramu kuwi.

¹⁰Kowé kudu ngolah lemah kuwi kanggo dèkné: Kowé, anakmu lan baturmu lan kowé wajip masrahaké panènané, supaya putuné bendaramu anaa sing dipangan. Méfibosèt putuné bendaramu kuwi, tetep mèlu mangan bebarengan karo aku.” Siba nduwé anak lanang limalas lan réwang rong puluh.

¹¹Siba ngomong marang Daved: “Abdimu bakal nandangi apa sing dipréntahké ratu marang kula.” Méfibosèt mangan bebarengan karo Daved kaya waé salah sijiné anaké Daved.

¹²Méfibosèt nduwé anak lanang ijik tyilik, asmané Mika. Sakkèhé wong sak omahé Siba, pada dadi abdiné Méfibosèt.

¹³Mengkono dadiné Méfibosèt manggon ing Yérusalèm; lan tetep mangan bebarengan karo Daved. Nanging sikilé loro pintyang.