Read Caribbean Javanese 1 Para Ratu 10 Bible Online

1 Para Ratu 10 - Caribbean Javanese bible

1 Para Ratu 10

¹Waktu ratu ing negara Syéba krungu kabar bab Salomo gegandengan karo GUSTI, dèkné terus teka arep nguji karo bedèkan.

²Tekané Yérusalèm ditutké karo suradadu sing gedé banget, karo unta sing pada dimomoti bumbu-bumbu, emas okèh lan watu-watu sing larang-larang. Bareng wis teka ing ngarepé Salomo terus ngomongké isiné atiné kabèh.

³Nanging Salomo nyauri kanggo sakkèhé pitakoné ratu wadon mau; kanggo Salomo ora ana perkara sing didelikké, sing nganti ora bisa disemauri.

⁴Waktu ratu ing negara Syéba weruh kabèh kawityaksanané Salomo lan omahé sing wis digawé,

⁵panganan ing méjané, tyarané enggoné para abdiné pada lungguh ngadep, tyarané enggoné para peladèn pada ngladèni lan enggoné pada menganggo, ngombéné lan kurban obongan sing saben-saben dipasrahké ing griyané GUSTI, ratu Wadon kuwi banget nggumuné.

⁶Terus ngomong marang ratu: “Pantyèn tenan bener kabar sing kula rungokké ing negara kula bab sampéyan lan bab kawityaksanan sampéyan,

⁷nanging kula ora pertyaya marang tembung-tembung kuwi, nganti kula terus mréné lan nyatakké déwé; tenan separoné waé durung ana sing diomongké marang kula; ing bab kawityaksanan lan katentreman sampéyan ngungkuli kabar sing kula rungokké.

⁸Beja para bojoné sampéyan kuwi, beja para abdi sampéyan sing tansah ngladèni sampéyan lan weruh kawityaksanan sampéyan!

⁹Pinujia GUSTI, Gusti Allah sampéyan, sing wis seneng marang sampéyan, nganti terus njagongké sampéyan ing damparé kraton Israèl! Awit GUSTI trésna marang wong Israèl ing sak lawasé, mila banjur ngangkat sampéyan dadi ratu supaya nindakké keadilan lan kabeneran.”

¹⁰Salomo terus dipasrahi emas 120 talénta, wangi-wangian okèh banget lan watu-watu sing larang-larang; ora tau ana wangi-wangian menèh sing teka sing semono okèhé, kaya sing dipasrahké karo ratu wadon sangka negara Syéba marang Salomo.

¹¹Lan kapal-kapalé Hiram, sing pada ngangkati emas sangka Ofir, uga momot kayu tyendana lan watu-watu sing larang-larang sangka Ofir okèh banget.

¹²Kayu tyendana kuwi dikanggokké karo Ratu digawé barang dandanan kanggo griyané GUSTI lan palèsé Ratu lan uga didadèkké siter lan harep kanggo para penyanyi; kayu tyendana sing kaya mengkono kuwi wis ora ana sing teka lan ora ana sing kétok menèh nganti dina iki.

¹³Salomo ngekèki marang ratu negara Syéba apa waé sing dikarepké lan sing dijaluk, kejaba kuwi apa sing wis dipasrahké marang piyambaké sing dianggep pantes karo Salomo. Ratu Wadon terus mulih menyang ing negarané ditutké karo para abdiné.

¹⁴Kabèh emas sing diladèkké marang Salomo kuwi ing sak njeruhné setaun boboté ana 666 talénta,

¹⁵kuwi durung kepitung sing olèhé sangka para pedagang lan para pedagang lan karo para ratu ing negara Arab lan para bupati ing negara kono.

¹⁶Salomo nggawé tamèng gedé 200, sing digawé emas gemblèngan, saben tamèng gedé siji emasé 600 sèkel;

¹⁷piyambaké uga nggawé tamèng tyilik 300, sing digawé uga emas gemblèngan, siji-sijiné emasé telung mina; ratu terus ngongkon nyimpen kuwi mau kabèh ing gedong “Alas Libanon”.

¹⁸Ratu uga nggawé dampar gading gedé, sing dilapis karo emas murni.

¹⁹Dampar kuwi susun enem; sing sisih mburi ana endas-endasané bunder, lan ing sisih kiwa-tengené jagongan ana lengenané. Ing sandingé lengenan mau ana gambaran singa loro,

²⁰nanging ing sak nduwuré undak-undakan ing kiwa-tengené ana singané rolas sing pada ngadek; durung tau ana kraton sing nggawé barang gawéan sing kaya mengkono kuwi.

²¹Kabèh piranti sing kanggo ngombé Salomo sing digawé emas lan sakkèhé barang ing gedong “Alas Libanon” kuwi sing digawé emas murni; ora ana barang slaka, awit waktu jamané Salomo penganggepé wong slaka kuwi ora ana ajiné.

²²Awit ratu nduwé kapal-kapal Tarsis ing segara sing dadi siji karo kapal-kapalé Hiram, lan saben telung taun sepisan kapal-kapal Tarsis mau teka nggawa emas, slaka lan gading, uga ketèk lan manuk merak.

²³Kasugihan lan kawityaksanané Salomo kuwi ngungkuli kabèh ratu ing bumi.

²⁴Wong sak lumahé ndonya pada ngupaya nemoni Salomo perlu weruh kawityaksanan sing wis dikèkké karo Gusti Allah ing sak njeruhné atiné.

²⁵Saben wong sing nemoni nggawa pisungsung rupa barang-barang slaka lan barang-barang emas, sandangan, gaman, wangi-wangian, jaran lan kimar, terusan ing saben taun.

²⁶Salomo uga nglumpukké kréta lan suradadu jaran, nganti terus nduwé kréta 1400 lan suradadu jaran 12.000, kabèh kuwi dipapanaké ing kuta-kuta sing spésial kanggo ngandangké kréta, tyedak karo ratu ing Yérusalèm.

²⁷Ratu enggoné nekakké slaka ing Yérusalèm tyatyahé nganti kaya watu. Tyatyahé wit tyemara nganti kaya wit ajir sing tukul ing Pegunungan.

²⁸Jaran kanggo Salomo ditekakké sangka Misraim lan ing Kéwé; para pedagangé ratu enggoné kulak sangka Kéwé karo rega pasar.

²⁹Kréta sing sangka Misraim iki siji nganti rega 600 sèkel slaka, nanging jaran nganti rega 150 sèkel; kuwi mau kabèh uga dikirimké marang sakkèhé para ratuné bangsa Hèt lan para ratu ing negara Aram lan ya lantaran para tukang dagang kuwi.