Read Caribbean Javanese 1 Para Ratu 15 Bible Online

1 Para Ratu 15 - Caribbean Javanese bible

1 Para Ratu 15

¹Waktu taun sing kaping wolulas jamané Yérobéam anaké Nébat, Abiam wiwit dadi ratu ing Yéhuda.

²Telung taun enggoné dadi ratu ing Yérusalèm. Asmané ibuné Maaka, wong wadon anaké Abisalom.

³Abiam kuwi sak njeruhné uripé tansah nindakké kabèh dosa sing wis digawé karo bapaké lan enggoné madep marang GUSTI Gusti Allahé ora karo sak kabèhé ati kaya Daved, embahé.

⁴Nanging awit Daved, GUSTI, Gusti Allahé, ngekèki turun marang piyambaké, ing Yérusalèm, ya kuwi enggoné terus ngangkat anaké, kanggo nggentèni lan enggoné nerusaké ngedekké Yérusalèm,

⁵awit Daved wis nandangi apa sing bener ing ngarepé GUSTI uga ora nyimpang sangka sakkèhé préntahé marang Panjenengané ing sakjeké uripé, kejaba mung perkara Uria, wong Hèt.

⁶Nanging ing sakjeké uripé tansah ana perang ing antarané Réhabéam lan Yérobéam.

⁷Kanggo turahané sejarahé Abiam lan kabèh perkara sing ditindakké, kuwi wis ketulis kabèh ing layang sejarahé para ratu ing Yéhuda; lan ing antarané Abiam lan Yérobéam tansah ana perang.

⁸Abiam terus dililani ngasuh nunggal karo para leluhuré, lan dikubur ing kutané Daved. Asa, anaké, terus dadi ratu nggentèni piyambaké.

⁹Waktu ing taun sing kaping rong puluhé jamané Yérobéam, ratu ing Israèl, Asa wiwit dadi ratu ing Yéhuda.

¹⁰Patang puluh siji taun enggoné dadi ratu ing Yérusalèm. Asmané embahé wadon Maaka anaké Abisalom.

¹¹Asa tansah nandangi apa sing bener ing ngarepé GUSTI kaya déné Daved, bapaké leluhuré.

¹²Lonté kanggo ngabekti disingkirké sangka negara lan ngedohi sakkèhé brahala gawèané para leluhuré.

¹³Malah Maaka, embahé wadon, didunké pangkaté enggoné dadi ibuné-ratu, jalaran nggawé retya Asyèra sing ala. Retya sing ala kuwi dirubuhké karo Asa lan diobong ing legokan kali Kidron.

¹⁴Senajan puntuk-puntuk pangurbanan ora didohké nanging Asa madep marang GUSTI karo sak kabèhé ati ing sakjeké uripé.

¹⁵Ratu nggawa pisungsung-pisungsungé sutyi bapaké lan pisungsung-pisungsungé déwé menyang griyané GUSTI, ya kuwi emas lan slaka lan barang-barang liyané.

¹⁶Nanging ing antarané Asa lan Basa, ratu ing Israèl, kuwi selawasé pada urip tansah ana perang.

¹⁷Basa ratu ing Israèl maju perang menyang ing Yéhuda lan terus nguwati Rama, kanggo ngendek wong lelungan menyang pangwasané Asa, ratu ing Yéhuda.

¹⁸Nanging Asa terus njupuk sakkèhé emas lan slaka sing ijik kèri ing gedong simpenané griyané GUSTI lan ing gedong simpenané kraton terus dipasrahké marang para pegawéné. Kuwi pada diutus karo Asa menyang ngarepé Bènhadad, anaké Tabrinon anaké Hesion, ratu ing negara Aram, sing manggon ing kuta Damaskus, karo diweling supaya ngomong:

¹⁹“Ana salah sijiné perjanjian ing antarané kula karo sampéyan, ing antarané bapak kula karo bapak sampéyan. Iki sampéyan kula kèki turahan emas lan slaka. Hayuk, sampéyan kula njaluk medot perjanjian sampéyan karo Basa, ratu ing Israèl, supaya piyambaké mundur sangka kula.”

²⁰Bènhadad nuruti penjaluké Asa; dèkné terus ngongkon marang para penggedéné suradaduné supaya nyerang kuta-kuta ing Israèl terus menangké Iyon, Dan, Abel-Bèt-Maakha lan sak tanah pangwasané Kinerot lan tanah Naftali kabèh.

²¹Bareng Basa krungu bab kuwi, terus gelis-gelis mandek enggoné nguwati kuta Rama terus tetep ing Tirsa.

²²Nanging Asa terus nglumpukké wong sak tanah Yéhuda kabèh, ora ana sing ora katut. Kuwi pada dipréntahké ngangkati watu lan kayu sing dienggo Basa kanggo nguwati Rama. Asa nganggokké kuwi kabèh kanggo nguwati Géba-Bènyamin lan Mispa.

²³Sak luwihé sejarahé Asa lan sakkèhé kekendelané lan sakkèhé sing ditandangi lan kuta-kuta sing dikuwati, kabèh kuwi wis ketulis ing layang sejarahé para ratu ing Yéhuda. Nanging bareng wis tuwa ngalami lara sikilé loro kabèh.

²⁴Ratu terus dililani ngasuh nunggal karo para leluhuré lan dikubur ing sandingé para leluhuré ing kutané Daved, bapaké leluhuré, lan terus digantèni karo Yosafat, anaké.

²⁵Nadab, anaké Yérobéam, enggoné wiwit dadi ratu ing Israèl ing taun sing kaping pindo jaman Asa, ratu ing Yéhuda. Enggoné dadi ratu ing Israèl suwéné rong taun.

²⁶Dèkné tansah nindakké apa sing ala ing ngarepé GUSTI, lan uripé pada rupa pertingkahé bapaké lan dosané bapaké, sing njalari wong Israèl pada tiba ing dosa.

²⁷Basa anaké Ahia, tunggalé turunané Isakar nganakké bebarengan nglawan piyambaké. Ratu dipatèni ing Gibeton sing klebu panggonané wong Filistèn, waktu Nadab lan suradaduné Israèl kabèh pinuju ngepung Gibeton mau.

²⁸Basa enggoné matèni ratu kuwi ing taun sing kaping telu ing jamané Asa, ratu ing Yéhuda, lan terus dadi ratu nggentèni Nadab.

²⁹Bareng wis dadi ratu gelis-gelis terus matèni sakkèhé brayaté Yérobéam, nganti entèk kabèh, tyotyok karo tembungé GUSTI sing diomongké lantaran nabi Ahia, abdiné, wong Silo,

³⁰awit sangka dosa-dosané sing wis digawé karo Yérobéam, sing njalari wong Israèl terus pada nglakoni dosa uga, terus nggawé nesuné atiné GUSTI, Gusti Allahé Israèl.

³¹Kanggo turahé sejarahé Nadab lan sakkèhé sing ditandangi, kuwi kabèh wis ketulis ing kitab sejarahé para ratu ing Israèl.

³²Nanging sakjeké uripé tansah ana perang ing antarané Asa lan Basa, ratu ing Israèl.

³³Waktu taun sing kaping telu ing jamané Asa, ratu ing Yéhuda, Basa ngadek dadi ratuné wong Israèl kabèh ing Tirsa. Enggoné dadi ratu suwéné patlikur taun.

³⁴Dèkné tansah nglakoni apa sing ala ana ngarepé GUSTI, lan uripé pada rupa pertingkahé Yérobéam lan dosané sing njalari wong Israèl terus pada nglakoni dosa uga.