Read Caribbean Javanese 1 Para Ratu 16 Bible Online

1 Para Ratu 16 - Caribbean Javanese bible

1 Para Ratu 16

¹Sakwisé mengkono ana tembungé GUSTI marang Yéhu anaké Hanani, sing nglawan marang Basa mengkéné:

²“Awit kowé wis Tak junjung sangka lebu lan Tak dadèkké ratuné umat-Ku Israèl, nanging mlakumu kaya Yérobéam lan ngongkon umat-Ku Israèl supaya nglakoni dosa, terus njalari nesuné ati-Ku awit sangka dosa kuwi,

³mulané Aku bakal matèni Basa sak brayaté, uga brayatmu bakal Tak dadèkké kaya brayaté Yérobéam anaké Nébat.

⁴Tunggalé sanak seduluré Basa kuwi sapa sing mati ing kuta, bakal dadi pangané asu lan sing mati ing ara-ara bakal dipangan karo manuk ing awang-awang.”

⁵Sak luwihé sejarahé Basa lan apa sing ditandangi lan kekendelané kuwi wis ketulis ing kitab sejarahé para ratu ing Israèl.

⁶Basa terus dililani ngasuh nunggal karo para leluhuré lan dikubur ing Tirsa. Ela, anaké, terus dadi ratu nggentèni piyambaké.

⁷Uga lantaran Yéhu anaké Hanani tembungé GUSTI wis dikèkké, sing uniné nglawan marang Basa lan brayaté, awit sangka kabèh sing ditandangi ala ing ngarepé GUSTI, terus njalari nesuné atiné GUSTI awit sangka penggawéané tangané, mulané terus pada kaya brayaté Yérobéam, lan uga enggoné wis matèni Yérobéam.

⁸Ing taun sing kaping nemlikur jamané Asa, ratu ing Yéhuda, Ela, anaké Basa, ngadek dadi ratuné Israèl ing Tirsa. Enggoné dadi ratu suwéné rong taun.

⁹Terus ana pegawéné, sing asma Simri, penggedéné separoné suradadu kréta, sing nganakké komplotan nglawan piyambaké. Waktu dèkné ijik ngombé ombèn nganti mendem ing Tirsa ing omahé Arsa, sing dadi penggedéné kraton ing Tirsa,

¹⁰Simri nemoni terus matèni piyambaké, ya kuwi ing waktu taun sing kaping pitu jamané Asa, ratu ing Yéhuda, terus dadi ratu nggentèni piyambaké.

¹¹Bareng dadi ratu, sakwisé njagong ing damparé, terus gelis-gelis matèni brayaté Basa kabèh. Ora ana wong lanang siji-sijia sangka tunggalé kuwi sing ditinggal urip, dadia brayaté, dadia para kantyané.

¹²Kaya mengkono Simri enggoné matèni brayaté Basa kabèh, tyotyok karo tembungé GUSTI lantaran Yéhu,

¹³awit sangka kabèh dosa sing wis ditandangi karo Basa lan Ela, anaké, sing njalari wong Israèl terus pada nglakoni dosa uga, terus pada nggawé nesuné atiné GUSTI, Gusti Allahé Israèl karo retya-retyané sing tanpa guna.

¹⁴Sak luwihé sejarahé Ela lan sakkèhé sing ditandangi, kuwi kabèh wis ketulis ing kitab sejarahé para ratu ing Israèl.

¹⁵Ing taun sing kaping pitu jamané Asa, ratu ing Yéhuda, Simri dadi ratu. Enggoné dadi ratu suwéné pitung dina ing Tirsa, waktu rayat ijik manggon ngepung Gibeton sing klebu pangwasané wong Filistèn.

¹⁶Bareng rayat sing ijik manggon ing tarup kuwi krungu kabar: “Simri wis nganakké bebarengan lan uga wis matèni ratu,” ing dina kuwi uga, ing panggonan tarupé kuwi, wong Israèl kabèh terus ndadèkké Omri, penggedéné suradadu, dadi ratuné Israèl.

¹⁷Sakwisé mengkono Omri karo Israèl kabèh pada budal sangka Gibeton, lan terus ngepung Tirsa.

¹⁸Bareng Simri ngerti, yèn kuta kuwi wis bedah, terus gelis-gelis mlebu ing gapurané kraton lan ngobong kraton kuwi, lan piyambaké déwé ya ing kono, terus nemoni mati,

¹⁹awit sangka dosa-dosané sing wis ditandangi, ya kuwi enggoné nindakké apa sing ala ing ngarepé GUSTI lan uripé pada rupa pertingkahé Yérobéam sing njalari wong Israèl pada nglakoni dosa uga.

²⁰Kanggo turahé sejarahé Simri lan komplotan sing dianakké, kuwi wis ketulis kabèh ing kitab sejarahé para ratu Israèl.

²¹Ing waktu semono bangsa Israèl petyah dadi rong golongan. Sak golongan ngetutké Tibni anaké Ginat, karepé bakal diangkat dadi ratu, lan sak golongan ngetutké Omri.

²²Nanging rayat sing ngetutké Omri luwih kuwat tenimbangané sing ngetutké Tibni anaké Ginat. Sakwisé Tibni mati, Omri terus dadi ratu.

²³Ing taun sing kaping telung puluh siji jamané Asa, ratu ing Yéhuda, Omri ngadek dadi ratu ing Israèl lan enggoné dadi ratu lawasé rolas taun. Ing Tirsa enggoné dadi ratu enem taun.

²⁴Piyambaké terus njupuk gunung Samaria sangka Semer rega rong talénta slaka. Terus nggawé kuta ing gunung kono sing dijenengké Samaria, miturut jenengé Semer, sing nduwé gunung kuwi.

²⁵Omri tansah nindakké apa sing ala ing ngarepé GUSTI ngungkuli sak kabèhé sing pada ndisiki.

²⁶Uripé pada rupa pertingkahé Yérobéam anaké Nébat lan dosané Yérobéam sing njalari wong Israèl terus pada nglakoni dosa uga, terus nggawé nesuné atiné GUSTI, Gusti Allahé Israèl karo retya-retyané sing tanpa guna.

²⁷Sak luwihé sejarahé Omri, apa sing ditindakké lan kekendelané, kuwi wis ketulis ing layang sejarahé para ratu ing Israèl.

²⁸Omri terus dililani ngasuh nunggal karo para leluhuré lan terus dikubur ing Samaria. Akab, anaké terus dadi ratu nggentèni piyambaké.

²⁹Akab, anaké Omri, enggoné ngadek dadi ratuné Israèl ing taun sing kaping telung puluh wolu jamané Asa, ratu ing Yéhuda. Enggoné dadi ratu ing Israèl Akab anaké Omri kuwi suwéné rolikur taun ing Samaria.

³⁰Akab anaké Omri kuwi tansah nindakké apa sing ala ing ngarepé GUSTI, ngungkuli sak kabèhé sing pada ndisiki.

³¹Enggoné mlaku ing sak njeruhné dosa-dosané Yérobéam anaké Nébat kuwi kaya durung tyukup, mulané terus njupuk bojoné Isebèl, anaké wadon Etbaal ratu ing Sidon, terus piyambaké ngabekti marang Baal karo disujuti lan disembah.

³²Ratu terus nggawé mesbèh kanggo Baal kuwi ing panggonan omahé Baal, sing diedekaké ing Samaria.

³³Sakwisé kuwi Akab terus nggawé retya Asyèra lan enggoné nandangi mengkono kuwi diterus-teruské, nganti njalari nesuné atiné GUSTI, Gusti Allahé Israèl, ngungkuli kabèh ratu ing Israèl sing ndisiki piyambaké.

³⁴Ing waktu jaman semono Hièl, wong Bétel, mbangun Yériko menèh. Nanging enggoné masang dasaré kuwi karo ngurbanké nyawané Abiram, anaké sing mbarep, lan enggoné masang lawangé gapurané karo ngurbanké nyawané Segub, anaké sing ragil, tyotyok karo tembungé GUSTI, sing diomongké lantaran Yosua anaké Nun.