Read Caribbean Javanese 2 Para Ratu 12 Bible Online

2 Para Ratu 12 - Caribbean Javanese bible

2 Para Ratu 12

¹Enggoné dadi ratu ing taun sing kaping pitu jamané ratu Yéhu, enggoné dadi ratu ing Yérusalèm lawasé patang puluh taun. Ibuné asmané Sibya, sangka Bèrsyéba.

²Ratu Yoas kuwi nandangi apa sing bener ing ngarepé GUSTI, sak suwéné uripé, diwulangi karo imam Yoyada.

³Nanging senajan mengkono, puntuk pepundèn pada ora disingkréhké. Rayat ijik pasrah kurban lan ngabekti ing puntuk kono.

⁴Ratu Yoas ngomong marang para imam: Kabèh duwit sing digawa ing griyané GUSTI kanggo pisungsung sutyi, ya kuwi duwit sing klebuné kanggo tyatyah jiwa, duwit tebusan jiwa miturut pernatan sing wis kanggo saben wong, lan kabèh sing digawa mlebu ing griyané GUSTI, awit sangka karepé atiné wong,

⁵kuwi bèn ditampani karo para imam déwé, siji-sijiné sangka kenalané lan kuwi dienggo ndandani apa sing rusak ing griya kono, ing ngendi waé ketemu ana sing rusak.

⁶Nanging ing taun sing kaping telulikur ing jaman ratu Yoas, para imam meksa durung ndandani karusakan omah.

⁷Mulané ratu Yoas terus nyeluk imam Yoyada lan para imam liyané, pada diomongi mengkéné: Kenèng apa sampéyan kok ora pada ndandani karusakan omah? Mulané saiki sampéyan ora pada olèh menèh nampani duwit sangka para kenalan-kenalamu menèh, nanging kuwi sampéyan pasrahké kanggo ndandani karusakan omah kuwi.

⁸Para imam terus pada setuju ora bakal nampani duwit sangka rayat, nanging ya ora usah ndandani karusakan omah kuwi.

⁹Imam Yoyada terus njupuk peti, tutupé dikèkké bolongan, terus disèlèhké ing sandingé mesbèh, ing sisih tengené wong sing mlebu ing griyané GUSTI. Para imam sing jaga lawang saben nampani duwit sangka wong sing mlebu ing griyané GUSTI, terus dilebokké ing peti mau.

¹⁰Yèn peti kuwi wis kétok isiné okèh, juru tulisé ratu teka bareng karo imam gedé, kabèh duwit ing griyané GUSTI dibuntel lan diitung.

¹¹Duwit sing tyatyahé wis ditemtokké dipasrahké marang para tukang sing dipasrahi njaga griyané GUSTI lan terus mbayarké duwit mau marang para tukang kayu, marang tukang-tukang bangunan sing nggarap griyané GUSTI,

¹²marang tukang watu lan para tukang natah watu. Duwit mau uga kanggo tuku kayu lan watu sing bakal ditatahi kanggo ing griyané GUSTI, sak terusé duwit kuwi dikanggokké kanggo kabèh keperluané ndandani omah.

¹³Nanging duwit sing dipasrahké ana griyané GUSTI kuwi ora kanggo nggawé bokor slaka, péso, bokor kanggo nyirami, trompèt, utawa piranti emas lan slaka sing kanggo griyané GUSTI,

¹⁴nanging kuwi dipasrahké marang para tukang kanggo ndandani griyané GUSTI.

¹⁵Sakwisé mengkono wong sing pada dipasrahké duwit supaya diwènèhké marang tukang-tukang kuwi, ora dijaluki pétungan, awit kabèh kuwi pada nyambutgawéa karo jujur.

¹⁶Nanging duwit kurban denda lan duwit kurban ngluwari dosa kuwi ora dipasrahké marang ing griyané GUSTI, kabèh kuwi dadi pandumané para imam.

¹⁷Waktu semono ratu Hasaèl, ratu ing negara Aram ngluruk perang nglawan Gat, terus bisa direbut. Ratu Hasaèl terus duwé karep arep nyerang Yérusalèm,

¹⁸nanging ratu Yoas, ratu ing Yéhuda, terus njupuk sakkèhé pisungsung sutyi sing wis disutyèkké karo para leluhuré, ya kuwi ratu Yosafat, ratu Yoram lan ratu Ahazia, para ratu ing Yéhuda, lan pisungsungé déwé sing sutyi, uga emas ing gedong simpenan ing griyané GUSTI lan ing kraton, kuwi kabèh dikirim marang ratu Hasaèl, ratu ing Aram, nganti ratu Hasaèl ora ngluruk Yérusalèm.

¹⁹Sak luwihé sejarahé ratu Yoas lan kabèh sing ditindakké, kuwi wis ketulis ing kitab sejarahé para ratu ing Yéhuda.

²⁰Para pegawéné pada nganakké komplotan terus matèni ratu Yoas ing omahé ing Milo, ing dalan sing medun tekan ing Sila.

²¹Yosakar anaké Siméat, lan Yosabad anaké Somer, kuwi para pegawéné sing matèni. Ratu terus dikubur ing sandingé para leluhuré ing kutané ratu Daved. Amasia, anaké, terus dadi ratu nggentèni dèkné.