Read Caribbean Javanese 2 Para Ratu 13 Bible Online

2 Para Ratu 13 - Caribbean Javanese bible

2 Para Ratu 13

¹Ing taun sing kaping teluné jaman ratu Yoas, anaké ratu Ahazia, ratu ing Yéhuda, Yoakas, anaké ratu Yéhu, dadi ratu ing Israèl ing Samaria; enggoné dadi ratu lawasé pitulas taun.

²Dèkné nandangi apa sing ala ing ngarepé GUSTI lan uripé nuruti dosané ratu Yérobéam, anaké Nébat sing njalari wong Israèl uga terus nindakké dosa, lan ora ngedohi sangka kuwi.

³Mulané GUSTI nesu banget marang Israèl, terus pada dipasrahké marang tangané ratu Hasaèl, ratu ing negara Aram, lan marang ing tangané ratu Bènhadad, anaké ratu Hasaèl, ing selawasé jaman kuwi.

⁴Nanging ratu Yoakas terus njaluk kawelasan GUSTI lan GUSTI ya terus gelem nuruti, awit wis weruh bangeté penindesé ratu Aram marang wong Israèl.

⁵GUSTI ngekèki wong nylametaké marang wong Israèl, pada bisa utyul sangka tangané Aram lan bisa manggon ing tarupé menèh kaya sing uwis-uwis.

⁶Mung waé ora pada ngedohi dosa-dosané ratu Yérobéam, sing njalari wong Israèl ya terus nindakké dosa uga, terus waé enggoné urip ing njeruhné dosa kuwi. Retya Asyèra uga ijik tetep ing Samaria.

⁷Awit ora ana suradadu sing dikarèkké marang ratu Yoakas, kejaba suradadu jaran sèket, sing numpak kréta sepuluh lan suradadu mlaku sepuluh èwu, awit wis pada dientèkké karo ratu ing Aram kaya nyebul bleduk gandum.

⁸Sak luwihé sejarahé ratu Yoakas lan kabèh sing ditandangi lan kekendelané, kabèh kuwi wis ketulis ing kitab sejarahé para ratu ing Israèl.

⁹Ratu Yoakas terus ngasuh nunggal karo para leluhuré lan dikubur ing Samaria. Yoas, anaké, terus dadi ratu nggentèni dèkné.

¹⁰Ing taun sing kaping telung puluh pitu jaman ratu Yoas, ratu ing Yéhuda, Yoas anaké Yoakas, dadi ratu ing Israèl ing Samaria. Enggoné dadi ratu lawasé nembelas taun.

¹¹Dèkné nandangi apa sing ala ing ngarepé GUSTI, ora ngedohi kabèh dosa sing ditindakké wong Israèl sangka préntah ratu Yérobéam anaké Nébat, nanging terus waé nglakoni dosa sing mengkono kuwi.

¹²Sak luwihé sejarahé ratu Yoas lan kabèh sing ditandangi lan kekendelané, perang nglawan ratu Amasia, ratu ing Yéhuda, kuwi wis ketulis kabèh ing kitab sejarahé para ratu ing Israèl.

¹³Sakwisé ratu Yoas dikèki ngasuh bareng karo para leluhuré, Yérobéam terus njagong ing dadi ratu ing damparé bapaké. Ratu Yoas dikubur ing Samaria ing sandingé para ratu ing Israèl.

¹⁴Waktu Elisa lara sing njalari matiné, ratu Yoas, ratu ing Israèl, teka nuwèni lan terus nangis ing ngarepé, tembungé: Duh bapak kula, bapak kula! Krétané Israèl lan suradadu-suradadu jaran!

¹⁵Elisa ngomong marang dèkné: “Jupuken gendéwa lan panahmu.” Ya terus dijupuk gendéwa lan panahé.

¹⁶Tembungé marang ratuné Israèl: “Kula njaluk mentèng gendéwané!” Ratu terus mentèng gendéwané, nanging Elisa numpangké tangané ing tangané ratu karo ngomong:

¹⁷“Tyendéla ing sisih wétan kuwi bukaken!” Lan waktu dibukak, Elisa ngomong: “Kula njaluk njemparingké panahé!” Terus dijemparingké. Elisa ngomong: “Kuwi jemparingé kemenangan pawèhé GUSTI, jemparingé kemenangan nglawan Aram. Sampéyan bakal ngalahké Aram ing Afèk, nganti entèk tyutes.”

¹⁸Sakwisé mengkono terus ngomong: “Jupuken panah kuwi!” Bareng wis dijaluk, Elisa ngomong marang ratu Israèl: “Saiki gepukna ing lemah!” Terus digepukké ing lemah kaping telu, terus mandek.

¹⁹Abdiné Gusti Allah kuwi nesu marang ratu, tembungé: “Kuduné sampéyan nggepuk kaping lima utawa kaping enem. Yèn mengkono sampéyan bakal merangi Aram nganti entèk tyutes. Nanging saiki, mung kaping telu enggèn sampéyan bakal ngalahké Aram.”

²⁰Sakwisé mengkono Elisa terus mati, terus dikubur. Nanging ing saben gantiné taun kerep ana grombolan wong Moab sing mlebu ing negara.

²¹Ing sakwijiné dina wong ijik pada ngubur layon, ana grombolan teka; bareng wong-wong weruh grombolan kuwi, layoné terus diuntyalké ing kuburané Elisa, terus pada lunga. Kedadiané, bareng layon mau nggepok balung-balungé Elisa, terus urip menèh lan ngadek.

²²Hasaèl, ratu negara Aram, enggoné nindes wong Israèl kuwi ing sakjeké uripé Yoakas.

²³Nanging GUSTI melas lan ngéman marang Israèl, mulané terus gelem nggatèkké, awit sangka éling perjanjiané marang Abraham, Isak lan Yakub, ora gelem ndadèkké entèkké lan durung gelem ngguwak ing waktu kuwi sangka ngarepé.

²⁴Bareng Hasaèl, ratu ing Aram, mati, terus Bènhadad, anaké, dadi ratu nggentèni piyambaké.

²⁵Kuta-kuta sing direbut karo Bènhadad sangka tangané Yoakas, bapaké Yoas, direbut menèh karo Yoas, anaké Yoakas, sangka tangané Bènhadad. Kaping telu enggoné Yoas ngalahké Bènhadad lan mbalèkké kuta-kuta Israèl.