Read Caribbean Javanese 2 Para Ratu 15 Bible Online

2 Para Ratu 15 - Caribbean Javanese bible

2 Para Ratu 15

¹Ing taun sing kaping pitu jamané Yérobéam, ratu ing Israèl, Asarya, anaké Amasia, ratu ing Yéhuda, dadi ratu.

²Waktu dadi ratu kuwi umuré nembelas taun, nanging enggoné dadi ratu ing Yérusalèm lawasé sèket loro taun. Asmané ibuné Yékolya sangka Yérusalèm.

³Ratu nandangi apa sing bener ing ngarepé GUSTI, netepi apa sing ditindakké karo Amasia, bapaké.

⁴Nanging senajan mengkono, puntuk-puntuk pangurbanan ora didohké. Rayat ijik pada nggawé sajèn lan ngobong kurban ing puntuk-puntuk kono.

⁵Mulané GUSTI terus ngukum ratu, nganti dadi lara lépra nganti tekan ing matiné, lan manggon ing omah didèwèkké. Nanging Yotam, anaké, mréntah kratoné lan nindakké pemrintahan kanggo rayat ing negara kono.

⁶Sak luwihé sejarahé Asarya lan sakkèhé sing ditandangi, kuwi wis ketulis kabèh ing kitab sejarahé para ratu ing Yéhuda.

⁷Asarya terus dililani ngasuh nunggal karo para leluhuré lan terus dikubur ing sandingé para leluhuré ing kutané Daved, nanging Yotam, anaké, terus dadi ratu, nggentèni piyambaké.

⁸Ing taun sing kaping telung puluh wolu jamané Asarya, ratu ing Yéhuda, Sakaria, anaké Yérobéam, dadi ratu ing Israèl ing Samaria. Enggoné dadi ratu suwéné nem sasi.

⁹Ratu nindakké apa sing ala ing ngarepé GUSTI kaya sing ditandangi karo para leluhuré, ora ngedohi dosa-dosané Yérobéam anaké Nébat, sing njalari wong Israèl uga terus nglakoni dosa.

¹⁰Salum anaké Yabèsy terus nganakké komplotan nglawan piyambaké, ratu dipatèni ing kuta Yilbiam, lan Salum terus dadi ratu nggentèni dèkné.

¹¹Sak luwihé sejarahé Sakaria, kuwi wis ketulis kabèh ing kitab sejarahé para ratu ing Israèl.

¹²Mengkéné tembungé GUSTI sing dikèkké marang Yéhu: “Anak-anakmu bakal nglungguhi damparé Israèl nganti turun sing kaping papat!” Lan ya terus kelakon mengkono.

¹³Ratu Salum anaké Yabèsy kuwi enggoné dadi ratu ing taun sing kaping telung puluh sanga jamané Uzia, ratu ing Yéhuda; nanging enggoné dadi ratu ing Samaria suwéné sesasi.

¹⁴Sakwisé mengkono Mahanahém anaké Gadi sangka kuta Tirsa, ngluruk perang nganti tekan ing Samaria. Mahanahém matèni Salum anaké Yabèsy ing Samaria terus dadi ratu nggentèni piyambaké.

¹⁵Sak luwihé sejarahé Salum lan enggoné nganakké komplotan, kuwi kabèh wis ketulis ing kitab sejarahé para ratu ing Israèl.

¹⁶Ing waktu kuwi wiwit sangka kuta Tirsa, Mahanahém ngentèkké Tifsak lan sakkèhé wong ing kono uga panggonané pisan, awit wong ora pada gelem mbukakké lawangé kuta. Mulané kuta kuwi terus dientèkké, lan sakkèhé wong wadon sing meteng pada dibedèli.

¹⁷Ing taun sing kaping telung puluh sanga jamané Asarya, ratu ing Yéhuda, Mahanahém anaké Gadi ngadek dadi ratu ing Israèl. Enggoné dadi ratu lawasé sepuluh taun ing Samaria.

¹⁸Piyambaké nindakké apa sing ala ing ngarepé GUSTI. Ing sakjeké uripé ora ngedohi dosa-dosané Yérobéam anaké Nébat, sing njalari wong Israèl ya terus nglakoni dosa uga.

¹⁹Pul, ratu ing Asyur, teka lan nyerang negara kono; Mahanahém terus ngekèki slaka 1000 talénta marang Pul, supaya gelem ngréwangi nguwatké kratoné ing tangané.

²⁰Ratu enggoné ngetokké duwit iki karo dimomotké marang Israèl lan marang sakkèhé wong sing sugih, supaya dipasrahké marang ratu ing Asyur: Saben wong siji dijukuk slaka sèket sèkel. Ratu ing Asyur terus mulih, ora tetep ing negara kono.

²¹Sak luwihé sejarahé Mahanahém lan sakkèhé sing ditandangi, kuwi wis ketulis kabèh ing kitab sejarahé para ratu ing Israèl.

²²Mahanahém terus dililani ngasuh nunggal karo para leluhuré, nanging Pekahya, anaké, terus dadi ratu, nggentèni piyambaké.

²³Ing taun sing kaping sèket jamané Asarya, ratu ing Yéhuda, Pekahya, anaké Mahanahém, dadi ratu ing Israèl ing Samaria, nanging enggoné dadi ratu suwéné rong taun.

²⁴Piyambaké nandangi apa sing ala ing ngarepé GUSTI, ora nyingkiri dosa-dosané Yérobéam anaké Nébat, sing njalari wong Israèl ya terus nindakké dosa uga.

²⁵Sakwijiné penggedéné, Ya kuwi Pekah anaké Remalya, nganakké komplotan nglawan piyambaké, ratu dipatèni ing Samaria ing kraton. Nanging sing ngguyupi ya kuwi Argob lan Arye lan wong sèket tunggalé turunané Giléad. Pekahya dipatèni lan sakwisé mengkono Pekah terus ngadek dadi ratu nggentèni piyambaké.

²⁶Sak luwihé sejarahé Pekahya lan sakkèhé sing ditandangi, kuwi kabèh wis ketulis ing kitab sejarahé para ratu ing Israèl.

²⁷Ing taun sing kaping sèket loroné jamané Asarya, ratu ing Yéhuda, Pekah anaké Remalya dadi ratu ing Israèl ing Samaria. Enggoné dadi ratu lawasé rong puluh taun.

²⁸Piyambaké nandangi apa sing ala ing ngarepé GUSTI, ora nyingkiri dosa-dosané Yérobéam anaké Nébat, sing njalari wong Israèl ya terus nindakké dosa uga.

²⁹Ing jamané Pekah, ratu ing Israèl, Tiglat Piléser, ratu ing Asyur teka lan terus ngrebut Iyon, Abel-Bèt-Maakha, Yanoah, Kèdès lan Hasor, Giléad lan Galiléa, tanah Naftali kabèh, lan rayaté terus diboyong kabèh menyang Asyur, dadi wong buwangan.

³⁰Hoséa anaké Ela nganakké komplotan nglawan Pekah anaké Remalya, ratu dipatèni lan sakwisé mengkono Hoséa terus dadi ratu nggentèni piyambaké, ya kuwi ing taun sing kaping rong puluh jamané Yotam anaké Uzia.

³¹Sak luwihé sejarahé Pekah lan sakkèhé sing ditandangi, kuwi kabèh wis ketulis ing kitab sejarahé para ratu ing Israèl.

³²Ing taun sing kaping pindoné jamané Pekah anaké Remalya, ratu ing Israèl, Yotam, anaké Uzia, ratu ing Yéhuda, dadi ratu.

³³Waktu dadi ratu kuwi umuré selawé taun, nanging enggoné dadi ratu ing Yérusalèm lawasé nembelas taun. Ibuné asmané Yerusa, anaké wadon Sadok.

³⁴Piyambaké nandangi apa sing bener ing ngarepé GUSTI, persis apa sing ditindakké karo Uzia, bapaké.

³⁵Nanging senajan mengkono, puntuk-puntuk pangurbanan ora didohké. Rayat ijik pada nggawé sajèn lan ngobong kurban ing puntuk-puntuk kono. Ratu nggawé Gapura Luhur ing griyané GUSTI.

³⁶Sak luwihé sejarahé Yotam, apa sing ditindakké, kuwi kabèh wis ketulis ing kitab sejarahé para ratu ing Yéhuda.

³⁷Wiwit jaman semono GUSTI ndadèkké Resin ratu ing Aram lan Pekah anaké Remalya pada merangi Yéhuda.

³⁸Yotam terus dililani ngasuh nunggal karo para leluhuré lan dikubur sandingé para leluhuré ing kutané Daved, leluhuré. Nanging Akas, anaké, terus dadi ratu nggentèni piyambaké.