Read Caribbean Javanese 2 Para Ratu 16 Bible Online

2 Para Ratu 16 - Caribbean Javanese bible

2 Para Ratu 16

¹Ing taun sing kaping pitulas jamané Pekah anaké Remalya, Akas anaké Yotam, ratu ing Yéhuda, dadi ratu.

²Waktu dadi ratu kuwi Akas umuré rong puluh taun, nanging enggoné dadi ratu ing Yérusalèm lawasé nembelas taun. Piyambaké ora nandangi apa sing bener ing ngarepé GUSTI, Gusti Allahé, kaya Daved, leluhuré,

³nanging uripé niru sing ditandangi para ratu ing Israèl, piyambaké malah masrahaké anaké didadèkké kurban ing geni, kaya penggawé ala sing ditindakké karo para bangsa sing wis disingkirké karo GUSTI sangka ngarepé wong Israèl.

⁴Piyambaké pada nggawé sajèn lan ngobong kurban ing puntuk-puntuk pangurbanan lan ing panggonan sing duwur lan ing sak ngisoré saben wit-witan sing ngrembuyung.

⁵Ing waktu semono Resin, ratu ing Aram, lan Pekah anaké Remalya, ratu ing Israèl, pada ngluruk perang merangi Yérusalèm, terus ngepung Akas, nanging ora bisa menangké piyambaké.

⁶Ing waktu kuwi Resin, ratu ing Aram, mbalèkké Elat marang Edom, wong-wong Yéhuda terus pada ditundungi sangka Elat. Wong Edom terus pada menyang Elat lan pada manggon ing kono nganti sepréné.

⁷Akas terus ngirimké kongkonan marang ing ngarepé Tiglatpileser, ratu ing Asyur, dikongkon ngomongké tembung mengkéné: “Kula kuwi abdimu lan anakmu, mulané supaya gelem teka ngluwari kula sangka tangané ratu Aram lan sangka tangané ratu ing Israèl, sing pada merangi kula.”

⁸Akas terus njukuki slaka lan emas ing griyané GUSTI lan ing gedong simpenané kraton lan dipasrahké marang ratu ing Asyur kanggo pisungsung.

⁹Ratu ing Asyur ya gelem ngrungokké penjaluké lan terus ngluruk nglawan Damaskus; Damaskus direbut, para rayaté pada diboyong menyang Kir, dadi tawanan, nanging Resin dipatèni.

¹⁰Sakwisé mengkono Akas lunga nemoni Tiglatpileser, ratu Asyur, ing Damaskus. Bareng Akas ngerti mesbèh ing Damaskus, terus ngirimi kabar marang imam Uria ukuran lan gambaré mesbèh mau, persis miturut penggawéné.

¹¹Imam Uria ya nggawé mesbèh sing mengkono kuwi, persis katerangan sing dikirim Akas sangka Damaskus. Kaya mengkono imam Uria enggoné nggawé waktu ngarepké tekané Akas sangka Damaskus.

¹²Bareng ratu wis mulih sangka Damaskus, terus weruh mesbèh mau. Ratu terus nyedekki mesbèh kuwi, terus munggah,

¹³ngobong kurban obongan lan kurban panganan, ngesokké kurbané ombèn-ombèn ing mesbèh kono, lan nyiramké getih kurban keslametan ing mesbèh kuwi.

¹⁴Nanging ratu terus ngongkon supaya mesbèh tembaga ing ngarepé GUSTI disingkirké sangka ngarepé griyané GUSTI, sangka antarané mesbèh anyar lan griyané mau, supaya didèkèkké ing sak loré mesbèh anyar.

¹⁵Akas terus ngongkon marang imam Uria: “Kurbané obongan ésuk lan kurbané panganan soré obongen ing mesbèh gedé kuwi, uga kurban obongan lan kurbané panganan ratu, lan kurbané obongan, kurbané panganan lan kurbané ombèn-ombèn rayat sak negara kabèh; apa menèh kabèh getih kurban obongan lan kabèh getih kurban sing dibelèh kuwi sokna ing kono. Nanging mesbèh tembaga kuwi urusanku.”

¹⁶Imam Uria ya terus nindakké apa préntahé Akas.

¹⁷Sakwisé mengkono Akas terus ngongkon nètèli plangané tutupé kréta sing nyangga lan nyingkirké jambangané omah sutyi sangka sak nduwuré, uga kuwali-kuwaliné didunaké sangka gambaran sapi tembaga sing nyangga, terus ditumpangké ing watu plestèran.

¹⁸Sak terusé, kanggo ratu ing Asyur, pendapa tutupan kanggo ing dina sabat, sing wis diedekaké ing griyané GUSTI lan uga lawang mlebu kanggo ratu ing sisih njaba, kuwi pada disingkréhké.

¹⁹Sak luwihé sejarahé Akas lan apa sing ditindakké, kuwi kabèh wis ketulis ing kitab sejarahé para ratu ing Yéhuda.

²⁰Akas terus dililani ngasuh nunggal para leluhuré lan dikubur sandingé para leluhuré ing kutané Daved, nanging Hiskia, anaké, terus dadi ratu nggentèni piyambaké.