Read Caribbean Javanese 2 Para Ratu 24 Bible Online

2 Para Ratu 24 - Caribbean Javanese bible

2 Para Ratu 24

¹Waktu jamané Yoyakim kuwi, Nebukadnésar, ratu ing Babèl ngluruk perang. Yoyakim dikalahké lan terus dadi abdiné lawasé telung taun, nanging ing sak terusé Yoyakim mbrotak nglawan marang Nebukadnésar.

²GUSTI terus nekakké grombolan-grombolan sangka negara Kasdim, sangka Aram, sangka Moab lan grombolan-grombolan turunané Amon, sing pada nglawan Yoyakim. GUSTI sing ngutus kuwi kabèh supaya nglawan lan ngentèkké Yéhuda, netepi tembungé GUSTI sing wis diomongké lantaran para abdiné, ya kuwi para nabi.

³Iki tembungé marang Yéhuda nyata tenan tyotyok karo tembungé GUSTI enggoné bakal nyingkirké wong-wong mau kabèh sangka ngarepé awit sangka dosa-dosané Manasé, wis pantes karo kabèh penggawéné,

⁴lan awit sangka getih sing ora salah sing wis dikutahké, awit ratu wis nggawé Yérusalèm kebak getihé wong sing ora salah, lan kuwi GUSTI ora gelem ngapura.

⁵Sak luwihé sejarahé Yoyakim lan sakkèhé sing ditandangi, kuwi kabèh wis ketulis ing kitab sejarahé para ratu ing Yéhuda.

⁶Yoyakim terus dililani ngasuh nunggal karo para leluhuré, nanging Yoyakin anaké terus dadi ratu nggentèni piyambaké.

⁷Nanging ratu ing Egipte ora metu ngluruk perang sangka negarané menèh, awit ratu ing Babèl wis ngrebut sakkèhé negarané sing klebu pangwasané ratu ing Egipte, wiwit sangka kali Egipte nganti tekan ing kali Efrat.

⁸Yoyakin waktu dadi ratu kuwi umuré wolulas taun, nanging enggoné dadi ratu ing Yérusalèm suwéné telung sasi. Ibuné asma Nehusta, wong wadon anaké Elnatan, sangka Yérusalèm.

⁹Ratu nandangi apa sing ala ing ngarepé GUSTI pada kaya sing ditindakké karo bapaké.

¹⁰Ing waktu kuwi para abdiné Nebukadnésar, ratu ing Babèl, nyerang Yérusalèm lan kuta kuwi terus dikepung.

¹¹Nebukadnésar, ratu Babèl, uga teka lan nyerang kuta kuwi, waktu para wong-wongé ijik pada ngepung.

¹²Yoyakin, ratu ing Yéhuda, terus metu nemoni ratu Babèl, piyambaké, ibuné, para pegawéné, para penggedéné lan para abdiné ing kratoné. Ratu terus ketyekel karo ratu Babèl, ing taun sing kaping wolu ing jaman pepréntahané.

¹³Nebukadnésar terus njukuki sakkèhé barang simpenané ing griyané GUSTI lan barang-barang simpenané ing kraton; emasé sakkèhé prabot sing digawé karo Salomo, ratu Israèl, ing griyané GUSTI, pada diklèntèki kabèh, netepi apa sing wis diomongké karo GUSTI.

¹⁴Sak terusé wong sing manggon ing Yérusalèm pada diboyong kabèh diparakké ing pembuwangan, kabèh sakkèhé penggedéné lan suradadu sing gagah rosa-rosa; tyatyahé tawanan ana 10.000, mengkono uga sakkèhé tukang lan pandé wesi; ora ana sing dikarèkaké, kejaba mung para wong sing golongané rayat tyilik.

¹⁵Yoyakin diboyong ing pembuwangan menyang Babèl, uga ibuné, para bojoné ratu, para abdi ing kratoné lan para penggedéné ing negara kono, kuwi pada diboyong dadi wong buwangan sangka Yérusalèm menyang Babèl.

¹⁶Sakkèhé wong sing gagah rosa-rosa, tyatyahé 7000, para tukang lan pandé wesi, tyatyahé 1000, sakkèhé wong penggedéné suradadu sing kendel perang, kuwi kabèh pada diboyong karo ratu Babèl, dibuwang ing Babèl.

¹⁷Ratu Babèl terus ngangkat ratu Matanya, pamané Yoyakin, nggentèni piyambaké, lan nggantèni asmané Matanya dadi Sedèkia.

¹⁸Sedèkia waktu dadi ratu kuwi umuré selikur taun, nanging enggoné dadi ratu ing Yérusalèm lawasé sewelas taun. Ibuné asmané Hamutal, wong wadon anaké Yérémia, sangka Libna.

¹⁹Ratu nindakké apa sing ala ing ngarepé GUSTI, persis kaya sing ditandangi karo Yoyakim.

²⁰Awit sangka nesuné GUSTI, bab kuwi mau ditibakké marang Yérusalèm lan Yéhuda, ya kuwi bab enggoné pada disingkirké karo GUSTI sangka ngarepé. Sedèkia mbruntak marang ratu Babèl.