Read Caribbean Javanese 1 Lelakoné Kraton 10 Bible Online

1 Lelakoné Kraton 10 - Caribbean Javanese bible

1 Lelakoné Kraton 10

¹Wong Filistèn perang nglawan wong Israèl. Wong Israèl pada mblayu sangka ngarepé wong Filistèn lan okèh sing ninggal ndonya ing pegunungan Gilboa.

²Saul lan para anaké pada diuyak karo wong Filistèn; Yonatan, Abinadab lan Malkisua, para anaké Saul, pada dipatèni.

³Peperangan kuwi kanggo Saul saya abot. Bareng suradadu tukang manah nemoni piyambaké, piyambaké terus ketaton.

⁴Saul terus ngomong marang sing nggawa gamané: “Pedangmu jupuken, aku suduken, supaya wong-wong sing ora sunat kaé ora mréné lan nganggo dolanan aku.” Nanging sing nggawa gaman nulak, awit ora tegel, Saul terus njupuk pedangé, terus dikurepi.

⁵Bareng sing nggawa gamané weruh, yèn Saul wis ninggal ndonya, ya terus mèlu mengkurepi pedangé, terus ninggal ndonya.

⁶Dadiné Saul, anaké telu lan brayaté kabèh pada nemoni pati.

⁷Bareng sakkèhé wong Israèl ing legokan pada weruh, yèn suradaduné wis pada mblayu lan Saul uga para anaké wis ninggal ndonya, wong-wong mau pada ninggalké kuta-kutané lan pada mlayu uga; wong Filistèn terus pada teka lan manggon ing kono.

⁸Esuké bareng wong Filistèn pada teka ngrampasi barangé wong-wong sing ninggal ndonya, pada weruh layoné Saul lan para anaké ngglémpang ing pegunungan Gilboa.

⁹Terus pada dirampasi barangé, sirahé Saul uga piranti perang dijukuk, digawa mubeng-mubeng ing negarané wong Filistèn kanggo ngekèki kabar marang brahala-brahalané lan marang rayat.

¹⁰Piranti perang Saul terus disèlèhké ing omahé allahé, nanging sirahé dipaku ing omahé Dagon.

¹¹Bareng wong Yabèsy-Giléad kabèh pada krungu apa sing ditindakké karo wong Filistèn marang Saul,

¹²kabèh wong sing gagah rosa-rosa pada tata-tataa lan terus budal njupuk layoné Saul lan layoné para anaké, digawa menyang Yabèsy, balung-balungé pada dikubur ing sak ngisoré wit-witan gedé ing Yabèsy. Sakwisé mengkono terus pada pasa pitung dina.

¹³Kaya mengkono matiné Saul, jalaran sangka enggoné ora setia marang GUSTI, ora gondèlan marang tembungé GUSTI lan awit sangka enggoné wis njupuk pinuntun marang roh préwangan,

¹⁴lan ora njaluk pituduhé GUSTI. Mulané terus dipatèni karo GUSTI lan jagongané ratu dikèkké marang Daved anaké Isai.