Read Caribbean Javanese 1 Lelakoné Kraton 11 Bible Online

1 Lelakoné Kraton 11 - Caribbean Javanese bible

1 Lelakoné Kraton 11

¹Kabèh wong Israèl terus pada nemoni Daved ing Hébron lan ngomong: “Ngertènana, kita kuwi pada tunggal getih tunggal daging karo sampéyan.

²Waktu Saul enggoné dadi ratu, wis suwé enggèn sampéyan mimpin sak obahé wong Israèl. Lan GUSTI, Gusti Allah sampéyan, wis ngomong marang sampéyan: Sampéyan sing kudu ngengon umat-Ku Israèl, lan ya sampéyan kuwi sing dadi ratuné umat-Ku Israèl.”

³Kabèh para pinituwané Israèl terus pada nemoni marang ratu ing Hébron, Daved terus nganakké perjanjian karo wong-wong mau ing Hébron ing ngarepé GUSTI, Daved terus dijebatani dadi ratu ing Israèl, kaya sing wis diomongké karo GUSTI marang Samuèl.

⁴Daved terus lunga menyang Yérusalèm, ditutké karo wong Israèl kabèh; ya kuwi kuta Yébus lan sing pada manggon ing negara kono kuwi wong Yébus.

⁵Kuwi pada ngomong marang Daved: “Sampéyan ora bakal bisa mlebu mréné.” Nanging Daved terus ngrebut pager watu ing Sion, ya kuwi kutané Daved.

⁶Ratu wis ngomong: “Sapa sing ndisik déwé ngalahké wong Yébus, kuwi bakal dadi penggedéné lan pemimpiné.” Sing maju ndisik déwé kuwi Yoab anaké Seruya, mulané terus diangkat dadi penggedéné.

⁷Daved terus manggon ing pager watu kono, mulané kuwi terus dikèki jeneng: Kutané Daved.

⁸Ratu terus nguwati kuta mau ing sak ubengé, wiwit sangka Milo, malah ing sak ubengé kabèh, nanging sak luwihé kuta kuwi dibangun menèh karo Yoab.

⁹Mundak suwé pangwasané Daved mundak gedé, awit GUSTI, Gustiné sing ngwasani langit nuntun marang piyambaké.

¹⁰Iki para penggedéné suradadu sing ngetutké Daved, sing pada ngekèki bantuan okèh marang piyambaké, bebarengan karo wong Israèl kabèh, ing bab enggoné nggayuh dadi ratu, kaya sing diomongké karo GUSTI kanggo Israèl.

¹¹Iki daftaré para penggedéné suradadu sing ngetutké Daved: Yasobam anaké Hakmoni, komendané penggedéné suradadu telung puluh, kuwi karo tumbaké bisa ngentèkké mungsuh 300 wong ing sak njeruhné perang sepisan.

¹²Terus Eléazar anaké Dodo wong Ahohi; iki klebu penggedé sing telu tyatyahé.

¹³Waktu wong Filistèn pada ngepung maju ing Pas-Damim, Eléazar nalika mèlu Daved ing kono; ing kono ana kebon, sing kebak tanduran jewawut; bareng suradaduné mlayu sangka ngarepé wong Filistèn,

¹⁴penggedé telu mau ngadek ing tengahé kebon kono lan pada bisa ngwasani tanah kuwi, malah terus bisa ngalahké wong Filistèn. Kaya mengkono enggoné GUSTI ngekèki kemenangan sing gedé.

¹⁵Ing sakwijiné dina tunggalé penggedéné telung puluh mau ana telu sing munggah ing gunung watu nemoni marang ing ngarepé Daved ing sak tyedaké guwa Adulam; waktu kuwi suradaduné wong Filistèn manggon ing panggonan Réfaim.

¹⁶Daved ing waktu semono nalika ing pager watu gunung, nanging suradadu Filistèn ing waktu kuwi ngenggoni Bètléhèm.

¹⁷Daved terus nduwé kepénginan, tembungé: “Ah, mbok ya ana wong sing ngekèki ngombé aku banyu sangka sumur ing Bètléhèm ing sak tyedaké gapura.”

¹⁸Wong telu mau terus nrobos ing tarupé wong Filistèn, terus nimba banyu ing sumur Bètléhèm ing sak tyedaké gapura, terus diangkat lan digawa marang ing ngarepé Daved. Nanging Daved ora gelem ngombé, banyuné dipasrahké marang GUSTI kanggo kurban ombènan,

¹⁹tembungé: “supaya diadohké sangka kula, nandangi sing mengkéné iki, duh Gusti. Apa pantes kula ngombé getih sing dibayarké wong-wong kuwi? Awit anggèné pada nggawa banyu kuwi karo nanggungké nyawané.” Dèkné ora gelem ngombé. Kuwi sing ditindakké karo penggedé telu mau.

²⁰Abisai, adiké Yoab, kuwi sing dadi penggedéné wong telung puluh kuwi. Lan ya piyambaké kuwi sing karo tumbaké bisa matèni mungsuh 300 wong; mulané terus dadi kesuwur ing antarané wong telung puluh mau.

²¹Ing antarané wong telung puluh kuwi, piyambaké sing kajèn déwé, pantyèn wongé ya sing dadi pemimpiné, nanging meksa ora bisa madani penggedé telu mau.

²²Terus Benaya anaké Yoyada, turunané wong gagah lan rosa, sing gedé lelabuhané, sing asal-usulé sangka Kabseel. Kuwi bisa matèni penggedéné Moab loro. Dèkné ya tau mlebu ing gampèng lan matèni singa ing waktu dina tekané salju.

²³Kejaba kuwi ya tau matèni wong Egipte, sing duwuré limang éluh, nanging wong Egipte kuwi nyekel tumbak sing kaya gilingané tenunan, nanging wong mau terus diparani karo nggawa teken, tumbaké direbut sangka tangané wong Egipte mau, terus dipatèni karo tumbaké déwé.

²⁴Kuwi sing ditindakké karo Benaya anaké Yoyada. Mulané dadi kesuwur ing antarané penggedé telung puluh mau.

²⁵Pantyèn ing antarané wong telung puluh mau, piyambaké sing kajèn déwé, nanging ya ora bisa madani penggedé telu sing disebut ing ngarep. Benaya kuwi diangkat karo Daved dadi penggedéné suradadu pengawalé ratu.

²⁶Sak terusé para suradadu sing gagah lan rosa-rosa liyané ya kuwi Asaèl, seduluré Yoab, terus Elhanam anaké Dodo sangka Bètléhèm:

²⁷Samot, wong Harod; Heles, wong Peloni;

²⁸Ira anaké Ikesy, wong Tékoa; Abièser, wong Anatot;

²⁹Sibkai, wong Husa; Ilai, wong Ahohi;

³⁰Maharai, wong Netofa; Hèlèd anaké Baaha, wong Netofa;

³¹Itai anaké Ribai, sangka Gibéa, wong Bényamin; Benaya, wong Piraton;

³²Hurai sangka legokan Gaas; Abièl, wong Bèt-Araba;

³³Asmawèt, wong Bahurim; Elyakbah, wong Saalbon;

³⁴Hasyem, wong Gison; Yonatan anaké Sagé, wong Harari;

³⁵Abiam anaké Sakar, wong Harari; Elifal anaké Ur;

³⁶Hèfèr, wong Mekerati; Ahia, wong Peloni;

³⁷Hesro, wong Karmèl; Naarai anaké Esbai;

³⁸Yoèl, seduluré Natan; Mibhar anaké Hagri;

³⁹Sèlek, wong Amon; Maharai, wong Beerot, sing nggawa gamané Yoab, anaké Seruya;

⁴⁰Ira, wong Yetri; Gareb, wong Yetri;

⁴¹Uria, wong Hèt; Sabad anaké Ahlai;

⁴²Adina anaké Sina, wong Rubèn, komendané para wong Rubèn, bebarengan wong telung puluh;

⁴³Hanan anaké Maaka; Yosafat, wong Mitni;

⁴⁴Uzia, wong Asytarot; Syama lan Yeiel, para anaké Hotam wong Aroèr;

⁴⁵Yediael anaké Simri, lan Yoha, seduluré, wong Tisi;

⁴⁶Eliel, wong Mahawim; Yeribai lan Yosawya, para anaké Elnaam; Yitma, wong Moab;

⁴⁷Eliel, Obèd lan Yaasiel, wong Mesobaya.