Read Caribbean Javanese 1 Lelakoné Kraton 13 Bible Online

1 Lelakoné Kraton 13 - Caribbean Javanese bible

1 Lelakoné Kraton 13

¹Daved rembukan karo para pemimpiné suradadu 1000 lan suradadu 100 lan karo kabèh pengarep.

²Tembungé Daved marang pasamuan Israèl kabèh mengkéné: “Yèn kowé pada nganggep apik lan yèn dililani karo GUSTI, Gusti Allah kita, hayuk pada nyebar kongkonan marang para sedulur kita sing ijik pada manggon ing sak tanah pangwasané Israèl kabèh, lan kejaba kuwi marang para imam lan para wong Lèwi ing kuta-kuta, sing diubengi karo tanah pangonané, supaya wong-wong kuwi pada nglumpuk mréné.

³Lan menèh hayuk pada ngelih petiné Gusti Allah kita mréné, awit jamané Saul kita ora pada mikir bab kuwi.”

⁴Ing kono kabèh ing kumpulan pada ngomong, yèn bakal pada nindakké bab kuwi, awit usul kuwi dianggep apik karo wong sak bangsa kabèh.

⁵Daved terus nyeluk sakkèhé wong Israèl wiwit ing kali Sikor ing negara Egipte nganti tekan ing sak tyedaké dalan menyang ing kuta Hamat, pada dikongkon mboyong petiné Gusti Allah sangka Kiryat-Yearim.

⁶Daved terus lunga menyang ing Baala, ing Kiryat-Yearim, sing klebu panggonan Yéhuda, ditutké karo wong Israèl kabèh, arep mboyong petiné Gusti Allah ing kana, sing diarani nganggo asmané GUSTI sing njagong ing sak nduwuré kerubim.

⁷Petiné Gusti Allah ditumpakké ing kréta sing anyar sangka omahé Abinadab, nanging sing nglakokké kréta mau Uza lan Ahio.

⁸Daved lan wong Israèl kabèh pada jogètan ing ngarepé Gusti Allah karo ngetokké kekuwatan, diiringi karo kidungan, siter, harep terbangan, ketyer lan trompèt.

⁹Bareng tekan ing penggilingané gandum Kidon, Uza terus ngelungké tangané nyekel peti mau, awit sapi-sapiné pada kejrungup.

¹⁰Ing kono GUSTI terus nesu banget marang Uza, Uza dipatèni, awit tangané digrayahké marang peti mau; dèwèké ninggal ndonya ing ngarepé Gusti Allah.

¹¹Daved nesu, awit GUSTI ngukum Uza karo tyara sing medèni kuwi; mulané panggonan kono terus diarani Peres-Uza nganti sepréné.

¹²Waktu kuwi Daved terus dadi wedi marang Gusti Allah, terus ngomong: “Kepriyé enggonku bisa mboyong petiné Gusti Allah kuwi menyang ing panggonanku.”

¹³Awit sangka kuwi Daved ora gelem mindah peti mau menyang ing panggonan omahé, ing kutané Daved, nanging Daved terus ménggok, peti digawa menyang ing omahé Obèd-Edom, wong Gat.

¹⁴Petiné Gusti Allah mau enggoné manggon ing sak tengahé brayaté Obèd-Edom suwéné telung sasi lan GUSTI mberkahi brayaté Obèd-Edom lan sakkèhé barang duwèké.