Read Caribbean Javanese 1 Lelakoné Kraton 17 Bible Online

1 Lelakoné Kraton 17 - Caribbean Javanese bible

1 Lelakoné Kraton 17

¹Bareng Daved wis tetep enggoné manggon ing kratoné, ratu ngetokké tembung marang Natan: “Lah kula kuwi ngenggoni kraton kayu tyemara, nanging peti perjanjiané GUSTI kok ing ngisoré tarup.”

²Semauré Natan marang Daved: “sampéyan kula suwun nindakké apa ing njeruhné ati sampéyan, awit Gusti Allah nunggal karo sampéyan.”

³Nanging ing mbengi kuwi uga Gusti Allah ngekèki tembungé marang Natan mengkéné:

⁴“Lungaa, kowé ngomonga marang abdi-Ku Daved: Mengkéné tembungé GUSTI: Duduk kowé sing bakal ngedekké omah kanggo Aku, sing bakal Tak panggoni.

⁵Aku ora tau manggon ing omah wiwit Aku nuntun metu wong Israèl nganti sepréné, nanging Aku nglembara ing tarup-tarup, lan ing panggonan menyang panggonan.

⁶Selawasé Aku nglembara karo wong Israèl kabèh, apa Aku tau ngomong marang salah sakwijiné rèkteré Israèl, sing Tak omongi ngengon umat-Ku, mengkéné: Kenèng apa kowé ora nggawé Aku omah kayu tyemara?

⁷Awit sangka kuwi kowé ngomonga mengkéné marang abdi-Ku Daved: Mengkéné tembungé GUSTI sing ngwasani langit lan bumi: Aku sing nyeluk kowé sangka ara-ara, waktu nggiring wedus, supaya dadia ratuné umat-Ku Israèl.

⁸Aku wis nunggal karo kowé ing sakkèhé panggonan sing kok liwati lan wis ngentèkké sakkèhé mungsuhmu sangka ngarepmu. Aku bakal nggawé jenengmu kaya jenengé para wong gedé ing bumi.

⁹Aku bakal nentokké panggonan kanggo umat-Ku Israèl, bakal Tak tandur, supaya bisa manggon ing panggonané déwé lan ora dikagèt-kagèti lan ditindes karo para wong dursila kaya dèk mbiyèn,

¹⁰wiwit Aku ngangkat para rèkter kanggo umat-Ku Israèl. Aku bakal menangké kabèh mungsuhmu. Aku uga ngekèki weruh marang kowé: GUSTI bakal mbangun sakwijiné keturunan kanggo kowé.

¹¹Yèn umurmu wis genep lan terus budal menyang ing panggonané leluhurmu, Aku bakal ngangkat turunanmu ing sakwisé kowé, ya kuwi salah sakwijiné anakmu, kuwi kratoné bakal Tak santosaké.

¹²Kuwi sing bakal nggawé omah-Ku lan Aku bakal nguwatké damparé kanggo ing selawas-lawasé.

¹³Aku bakal dadi Bapaké, lan dèwèké bakal dadi anak-Ku. Uga katrésnan-Ku bakal ora Tak dohké sangka dèwèké, ora kaya enggon-Ku wis nyingkirké kuwi sangka wong sing wis ndisiki kowé.

¹⁴Sak terusé Aku bakal nguwatké dèwèké ing omah-Ku lan ing kraton-Ku kanggo ing sak lawas-lawasé, lan damparé bakal kuwat ing sak lawas-lawasé.”

¹⁵Natan enggoné ngomong marang Daved netepi tembungé kuwi lan ya netepi wahyu kuwi.

¹⁶Daved terus mlebu lan terus ngadep ing ngarepé GUSTI karo ngomong: “Sapa ta kula kuwi, duh GUSTI, Gusti Allah lan sapa brayat kula kuwi, nanging Panjenengan nganti gelem ndadèkké kula kaya mengkéné iki?

¹⁷Lan bab iki ijik kurang ing mripat Panjenengan; duh Gusti Allah; awit sangka kuwi Panjenengan wis ngomong uga kanggo brayaté abdi-Mu iki ing waktu sing ijik suwé lan wis ngekèki ngerti marang kula bab urut-urutané wong sing bakal ana, duh GUSTI, Gusti Allah.

¹⁸Apa malih sing bisa ditambahké karo Daved marang Panjenengan gegandèngan karo enggèn Panjenengan ngekèki kaluhuran marang abdi-Mu iki? Apa duduk Panjenengan sing ngerti kahanané abdi-Mu iki?

¹⁹Duh GUSTI, awit sangka abdi-Mu iki lan miturut pikiran Panjenengan enggèn Panjenengan wis nindakké penggawéané sing gedé kuwi kabèh karo ngekèki ngerti bab kabèh perkara sing gedé kuwi.

²⁰Duh GUSTI, ora ana sing madani Panjenengan, lan ora ana Gusti Allah liyané kejaba Panjenengan, miturut kabèh sing pada kula rungokké.

²¹Apa ana bangsa ing ngendi ing bumi sing kaya umat Panjenengan Israèl, sing Gusti Allahé tandang ngluwari umat mau terus didadèkké umaté Gusti, supaya Asma Panjenengan dadi kesuwur awit sangka penggawéan-penggawéan Panjenengan sing gedé lan medèni, lan awit sangka enggèn Panjenengan nglungakké para bangsa sangka ngarepé umat Panjenengan, sing wis Panjenengan tulungi sangka negara Egipte?

²²Umat Panjenengan Israèl wis Panjenengan dadèkké umat Panjenengan ing sak lawas-lawasé, lan uga Panjenengan, duh GUSTI, dadi Gusti Allahé.

²³Nanging saiki, duh GUSTI, janji sing Panjenengan omongaké kanggo abdi-Mu lan kanggo brayaté kuwi, muga Panjenengan lestarèkké lan muga Panjenengan tindakké kaya sing Panjenengan janjèkké kuwi.

²⁴Supaya asma Panjenengan bakal dadi kuwat lan gedé ing sak lawasé, terus wong bakal ngomong: GUSTI, Gustiné sing ngwasani langit, Gusti Allahé Israèl kuwi, Gusti Allahé kanggo wong Israèl; brayaté abdi-Mu terus bakal tetep urip kuwat ing ngarepé Panjenengan.

²⁵Awit Panjenengan, duh Gusti Allah kula, wis ngomong marang abdi-Mu iki, yèn Panjenengan bakal mbangun turunané. Ya iki sebabé, abdi-Mu iki terus wani ngunggahké pandonga iki ing ngarepé Panjenengan.

²⁶Awit sangka kuwi, duh GUSTI, Panjenengan kuwi Gusti Allah, sing wis ngekèki janji bab perkara sing apik iki marang abdi-Mu.

²⁷Panjenengan saiki muga gelem ngekèki berkah marang brayat kula kuwi, supaya tetep urip ing ngarepé Panjenengan ing sak lawasé. Awit apa sing Panjenengan berkahi, duh GUSTI, bakal diberkahi ing sak lawasé.”