Read Caribbean Javanese 1 Lelakoné Kraton 18 Bible Online

1 Lelakoné Kraton 18 - Caribbean Javanese bible

1 Lelakoné Kraton 18

¹Sakwisé mengkono Daved terus nelukké wong Filistèn, nganti pada dikalahké; terus ngrebut Gat lan pangwasané kabèh sangka tangané wong Filistèn.

²Daved terus nggempur wong Moab, nganti wong Moab pada teluk lan pada pasrah mbayar pajek.

³Sak terusé Daved ngalahké Hadadèzèr, ratu ing Soba, ing sak tyedaké Hamat, waktu pinuju lunga arep nguwatké pangwasané ing kali Efrat.

⁴Daved ngrebut krétané 1000, suradaduné jaran 7000 lan suradadu ing daratan 20.000, Daved terus ngongkon ngetoki kabèh ototé sikilé jaran kréta, sing dikarèkaké mung jaran kréta 100.

⁵Wong Aram ing Damaskus terus pada teka ngréwangi Hadadèzèr, ratu ing Soba, nanging wong Aram mau dientèkké karo Daved 22.000 wong.

⁶Sakwisé kuwi Daved ngekèki suradadu sing manggon ing panggonané wong Aram ing Damaskus, lan wong Aram pada dadi baturé Daved, sing kudu mbayar pajek. GUSTI ngekèki kemenangan marang Daved, menyanga ngendi waé enggoné maju perang.

⁷Daved terus ngongkon ngusungi tamèng-tamèng emas sing dienggo karo para abdiné Hadadèzèr, digawa menyang ing Yérusalèm.

⁸Lan sangka Tibkat lan sangka Kun, ya kuwi kuta-kutané Hadadèzèr, Daved njukuki tembaga okèh banget, kuwi ing mbésuk dikanggokké karo Salomo nggawé “segaran” tembaga tyagak-tyagak lan prabot tembaga.

⁹Bareng Toi, ratu ing Hamat, krungu, yèn Daved wis ngalahké sakkèhé suradaduné Hadadèzèr, ratu ing Soba,

¹⁰terus kongkonan Hadoram, anaké, nemoni Daved, dikongkon mbagèkké salam lan mbagèkké keslametané, awit Daved wis menang ing perang nglawan Hadadèzèr, awit Hadadèzèr kerep merangi Toi. Lan Hadoram mau ya nggawa barang emas, slaka lan tembaga werna-werna.

¹¹Barang-barang kuwi uga didèwèkké karo Daved, mung kanggo GUSTI, kaya slaka lan emas sing diangkati sangka sakkèhé bangsa, ya kuwi sangka wong Edom, wong Moab wong turunané Amon, wong Filistèn lan sangka wong Amalèk.

¹²Abisai, anaké Seruya, ngentèkké wong Edom 18.000 ing legokan Asin,

¹³terus ndèkèk suradadu sing manggon ing Edom kono, terus wong Edom kabèh pada dadi baturé Daved. GUSTI ngekèki kemenangan marang Daved menyanga ngendi waé enggoné ngluruk perang.

¹⁴Kaya mengkono enggoné Daved dadi ratu ing sak tanah pangwasané Israèl kabèh lan enggoné jejekké keadilan lan sing bener kanggo wong sak bangsa kabèh.

¹⁵Yoab, anaké Seruya, dadi penggedéné suradadu; Yosafat anaké Ahilud dadi sing nata bandané,

¹⁶Sadok anaké Ahitub lan Akimèlèk anaké Abyatar pada dadi imam, Sausa dadi juru tulis;

¹⁷Benaya anaké Yoyada dadi penggedéné wong Krèti lan wong Plèti, nanging para anaké Daved kuwi dikèki pangkat sing duwur déwé, sing pada ngréwangi ratu.