Read Caribbean Javanese 1 Lelakoné Kraton 22 Bible Online

1 Lelakoné Kraton 22 - Caribbean Javanese bible

1 Lelakoné Kraton 22

¹Daved terus ngomong: “Ing kéné iki griyané GUSTI, Gusti Allah kita, lan ing kéné iki mesbèhé wong Israèl kanggo pasrah kurban obongan.”

²Daved ngongkon nglumpukké para wong mantya ing negarané wong Israèl lan terus ngangkat tukang-tukang sing natani watu kanggo ngedekké omahé Gusti Allah.

³Uga Daved nyawiské wesi okèh banget kanggo nggawé paku sing kanggo gapura lan bakalé angkur, uga tembaga okèh banget sing nganti ora kena ditimbang boboté,

⁴lan kayu tyemara sing tyatyahé ora kena diitung, awit wong Sidon lan wong Tirus pada nggawa kayu tyemara okèh banget kanggo Daved.

⁵Awit Daved mikir: “Salomo, anakku, ijik enom lan pengalamané kurang, nanging omah sing bakal digawé kanggo GUSTI kuwi gedéné kudu ngluwihi, terus kondang lan kesuwur ing kabèh negara, mulané aku apik tata-tata.” Daved terus tata-tata okèh banget sak durungé ninggal ndonya.

⁶Sakwisé kuwi anaké Salomo terus dityeluk lan dikèki paweling supaya nggawé omah kanggo GUSTI, Gusti Allah Israèl,

⁷mengkéné tembungé marang Salomo: “Hé anakku, aku déwé nduwé karep arep nggawé omah kanggo GUSTI, Gusti Allahku,

⁸nanging terus ana tembungé GUSTI marang aku mengkéné: Kowé wis ngutahké getih okèh banget lan wis nglakoni perang gedé. Mulané kowé aja ngedekké omah kanggo asma-Ku, awit wis okèh getih sing kowé kutahké ing lemah ing ngarep-Ku.

⁹Kowé bakal nduwé anak lanang, sing bakal dadi wong sing dikèki katentreman. Kuwi bakal Tak wènèhi katentreman, utyul sangka sakkèhé mungsuhé ing sak ubengé. Bakalé jenengé Salomo; katentreman lan kuwat bakal Tak wènèhké marang Israèl ing selawasé jamané.

¹⁰Kuwi sing bakal nggawé omah kanggo asma-Ku lan ya dèwèké kuwi sing bakal dadi anak-Ku, lan Aku bakal dadi Bapaké; damparé kratoné ing Israèl bakal Tak kuwatké nganti ing sak lawas-lawasé.

¹¹Mulané saiki, hé anakku, GUSTI supaya ngantyani marang kowé, terus kowé kelakon bisa ngedekké griyané GUSTI, Gusti Allahmu, kaya sing wis diomongké kanggo kowé.

¹²Mung waé, GUSTI ngekèki kowé kaweruh lan pangertèn lan gelem ngangkat kowé dadi sing nyekel pemrintahan ing Israèl, supaya kowé netepana angger-anggeré GUSTI, Gusti Allahmu.

¹³Kowé bakal bisa nggayuh apa sing kok karepaké, yèn kowé karo setia nindakké katetepan-katetepan lan pernatan-pernatan sing dipréntahké karo GUSTI marang Moses kanggo wong Israèl. Atimu sing kuwat lan sing tatak, aja wedi lan aja tyilik ati.

¹⁴Senajan ing sak njeruhné kasusahan, aku wis nyawiské kanggo griyané GUSTI kuwi emas 100.000 talénta lan slaka 1.000.000 talénta lan tembaga lan wesi okèh banget, nganti boboté ora kena ditimbang; aku uga wis nyawiské kayu lan watu. Nanging apiké kowé tambahana menèh.

¹⁵Lan menèh kowé nduwé tukang okèh banget, tukang natahi watu, tukang watu, tukang kayu lan para wong sing pinter ing bab penggawéan werna-werna,

¹⁶ing babakan emas, slaka, tembaga lan wesi sing tyatyahé ora kena diitung, miwitana tandang! GUSTI supaya nuntun marang sliramu!”

¹⁷Daved terus ngekèki préntah marang sakkèhé penggedéné Israèl supaya pada ngréwangi Salomo, anaké, tembungé:

¹⁸“Apa ora GUSTI, Gusti Allahmu, sing nunggal karo sampéyan kabèh lan sing wis ngekèki keslametan marang sampéyan ing ngendi-endi. Panjenengané wis ngekèkké para wong sing manggon ing negara kéné ing tanganku, terus negara iki teluk ing ngarepé GUSTI lan marang umaté.

¹⁹Mulané saiki, atimu lan nyawamu ngupayaa supaya pada nggolèki GUSTI, Gusti Allahmu. Kowé pada miwitana enggonmu nggawé griya sutyiné GUSTI, Gusti Allah, supaya peti perjanjiané GUSTI lan prabot sutyi duwèké Gusti Allah kena digawa mlebu ing griya sing didekké kanggo asmané GUSTI.”