Read Caribbean Javanese 1 Lelakoné Kraton 26 Bible Online

1 Lelakoné Kraton 26 - Caribbean Javanese bible

1 Lelakoné Kraton 26

¹Nanging kanggo golongané para wong njaga lawang: sangka turunané Korah ya kuwi Meselemya anaké Koré sangka turunané Ebyasaaf.

²Meselemya nduwé anak, ya kuwi Sakaria, kuwi sing mbarep, Yediael, anak sing nomer loro, Sebaja, anak sing nomer telu, Yatniel, anak sing nomer papat,

³Elam, sing nomer lima, Yohanan, sing nomer enem, Elyoenai, sing nomer pitu.

⁴Obèd-Edom nduwé anak, ya kuwi Semaya, sing mbarep, Yosabad, sing nomer loro, Yoah, sing nomer telu, Sakar sing nomer papat, Nétanéèl, sing nomer lima,

⁵Amièl, sing nomer enem, Isakar, sing nomer pitu lan Peuletai, sing nomer wolu, awit diberkahi karo Gusti Allah.

⁶Semaya, anaké Obèd-Edom mau, nduwé anak, sing pada dadi pemimpiné brayaté, awit pada wong penggedéné suradadu sing gagah lan rosa-rosa.

⁷Nanging anak-anaké Semaya kuwi ya kuwi Otni, Répaèl, Obèd lan Elsabad lan para seduluré, ya kuwi Elihu lan Semakya, kabèh pada gagah lan rosa-rosa.

⁸Kuwi kabèh pada turunané Obèd-Edom, ya wong-wong kuwi déwé, para anaké lan para seduluré, kabèh wong gagah lan rosa-rosa, sembada kanggo penggawéané, tyatyahé suwidak loro sangka Obèd-Edom.

⁹Nanging Meselemya nduwé anak wolulas, klebu seduluré, kuwi wong gagah lan rosa-rosa.

¹⁰Hosa sangka turunané Mérari uga nduwé anak, ya kuwi Simri, kuwi dadi pemimpin awit senajan duduk anak mbarep, nanging didadèkké pemimpin karo bapaké,

¹¹terus Hilkia, anak sing nomer loro. Tebalya, sing nomer telu lan Sakaria, sing nomer papat. Anak lan seduluré Hosa kuwi ana telulas.

¹²Golongan-golongané sing pada njaga lawang, sing pisah-pisah miturut pemimpiné brayaté kuwi kuwajipané ngladèni ing griyané GUSTI, pada kaya seduluré tunggal taleré.

¹³Kanggo saben gapura enggoné njaga karo nguntyalké lotré, miturut brayat-brayaté, kanggo kulawargané sing gedé lan ya kanggo sing tyilik.

¹⁴Lotréan kanggo lawang wétan tiba marang Selemya; sak terusé pada nguntyalké lotré kanggo Sakaria, anaké sakwijiné juru rembuk sing pinter, tibané lotréan kanggo lawang lor.

¹⁵Kanggo Obèd-Edom lawang kidul lan kanggo anak-anaké gedong simpenan.

¹⁶Kanggo Supim lan Hosa lawang kulon karo gapura Saleket ing dalan gedé unggah-unggahan. Wong njaga sing siji dipapanaké sanding sijiné.

¹⁷Ing sisih wétan saben dinané ana wong enem, ing sisih lor wong papat ing sisih kidul wong papat saben dinané, nanging ing gedong simpenan wongé mesti loro;

¹⁸ing Gedong sing mbukak sisih kulon: wong papat ing dalan gedé lan wong loro ing gedong tambahan.

¹⁹Kuwi golongan-golongané para njaga lawang sangka turunané Korah lan sangka turunané Mérari.

²⁰Para wong Lèwi, para seduluré tunggal taleré, sing njaga kanggo barang-barang ing griyané Gusti Allah lan sing njaga barang-barang sutyi:

²¹turunané Ladan, ya kuwi turunané Gèrson sing diturunké karo Ladan, kuwi brayaté dipimpin karo turunané Yehièl.

²²Turunané Yehièl, ya kuwi Zetam lan Yoèl seduluré, kuwi njaga marang barang-barang ing griyané GUSTI.

²³Sangka turunané Amram, turunané Yizhar, turunané Hébron lan turunané Yizhar

²⁴ya kuwi Sebuel anaké Gérsom anaké Moses sing dadi penggedéné nata barang-barang.

²⁵Sanak seduluré Sebuel sing diturunké karo Elièser ya kuwi Rehabya anaké Elièser, lan Yésaya anaké Rehabya, lan Yoram anaké Yésaya, lan Sikhri anaké Yoram, lan Selomit anaké Sikhri.

²⁶Selomit kuwi karo sanak seduluré pada njaga kanggo barang-barang sutyi sing wis disutyèkké karo Daved, para penggedéné kulawargané, para penggedéné suradadu 1000, suradadu 100 lan para penggedéné suradadu.

²⁷Kuwi wis pada nyutyèkké barang-barang sing direbut sangka perang kanggo nggawé apiké griyané GUSTI.

²⁸Uga samubarang kabèh sing wis disutyèkké karo Samuèl, wong tukang ndelok, karo Saul anaké Kis, karo Abnèr anaké Nèr, karo Yoab anaké Seruya, malah kabèh barang sing wis disutyèkké kuwi pada dirumati karo Selomit lan sanak seduluré.

²⁹Sangka turunané Yizhar ya kuwi Kenanya lan anak-anaké; kuwi pada dipasrahi kuwajipan ing njaba kanggo Israèl, ya kuwi dadi tukang nentokké lan dadi rèkter.

³⁰Sangka turunané Hébron ya kuwi Hasabia lan sanak seduluré, kuwi pada wong gagah rosa-rosa, tyatyahé 1700 wong; kuwi dipasrahi urusan pemrintahan Israèl ing kuloné laut Yordan ing bab kabèh perkara sing gegandèngan marang GUSTI lan sakkèhé penggawéan sing kanggo ratu.

³¹Sangka turunané Hébron ya kuwi Yeria, kuwi sing dadi komendané. Kanggo wong Hébron iki, turunané lan brayaté, ing taun sing kaping patang puluhé jamané pepréntahané Daved, dipriksa lan tunggalé ketemu ana sing gagah rosa-rosa, ya kuwi ing Yaezer-Giléad.

³²Sanak seduluré Yeria, para wong sing gagah rosa-rosa lan sing pada dadi pemimpiné kulawargané, ana 2700 wong. Kuwi pada diangkat karo Daved dadi penggedéné turunané Rubèn, turunané Gad lan separoné taleré Manasé, ing bab kabèh perkara sing gegandèngan marang Gusti Allah lan sing gegandèngan marang ratu.