Read Caribbean Javanese 1 Lelakoné Kraton 28 Bible Online

1 Lelakoné Kraton 28 - Caribbean Javanese bible

1 Lelakoné Kraton 28

¹Daved nglumpukké kabèh penggedéné Israèl, ya kuwi para penggedéné taleré, para penggedéné golongan sing ngladèni, para penggedéné suradadu 1000 lan penggedéné suradadu 100, lan sing pada mimpin ngurusi banda lan kéwan-kéwané lan para anaké; uga para pegawéné kraton lan para suradadu lan sakkèhé penggedé sing gagah lan rosa-rosa.

²Daved terus ngadek lan ngomong: “Pada rungokna, hé! para sedulurku lan bangsaku! Aku nduwé karep arep nggawé omah kanggo lèrèn petiné perjanjiané GUSTI lan kanggo antyik-antyiké sikilé Gusti Allah kita; aku uga wis tata-tata kanggo keperluané kuwi.

³Nanging Gusti Allah wis ngomong marang aku: Kowé ora bakal nggawé omah kanggo asma-Ku, awit kowé kuwi suradadu lan wis ngutahké getih.

⁴Nanging GUSTI, Gusti Allahé Israèl, wis milih aku sangka antarané sakkèhé kulawargaku didadèkké ratu ing Israèl kanggo sak lawas-lawasé; awit Panjenengané wis milih Yéhuda dadi pemimpin, lan kulawargaku sangka antarané turunané Yéhuda, lan sangka antarané para anaké bapakku, Panjenengané ngangkat aku dadi ratu ing sak kabèhé Israèl.

⁵Sak terusé sangka antarané anak-anakku kabèh, awit GUSTI wis ngekèki berkah anak okèh marang aku, Panjenengané wis milih anakku Salomo supaya nglungguhi dampar pepréntahané GUSTI ing Israèl.

⁶Panjenengané wis ngomong marang aku: Salomo, anakmu, kuwi sing bakal nggawé omah-Ku lan platarané, awit kuwi wis Tak pilih, Tak dadèkké anak-Ku lan Aku bakal dadi bapaké.

⁷Uga Aku bakal nguwatké kratoné nganti ing sak lawas-lawasé, angger dèwèké tansah nindakké kabèh tembung lan pernatan-Ku kaya saiki iki.

⁸Mulané saiki, ing ngarepé mripaté wong Israèl kabèh, ya pasamuané GUSTI iki, lan karo dirungokké Gusti Allah kita, aku ngomongi kowé kabèh: Kowé pada netepana lan ngupayaa marang sakkèhé préntahé GUSTI, Gusti Allahmu, supaya kowé pada tetep ngenggoni negara sing apik iki lan ninggalaké marang anak-putumu ing sakwisé kowé nganti ing sak lawas-lawasé.

⁹Nanging kowé, anakku Salomo, kowé dikenal karo Gusti Allahé bapakmu lan ngabektia marang Panjenengané karo tulus éklas lan sak kabèhé ati, awit GUSTI kuwi niti priksa sak kabèhé ati lan weruh kabèh kekarepan lan kepénginan-kepénginan. Yèn kowé ngupaya marang Panjenengané, Panjenengané seneng yèn kowé teka, nanging yèn kowé ninggal Panjenengané, kowé bakal dibuwang ing selawasé.

¹⁰Saiki, awit GUSTI wis milih kowé dikarepké nggawé omah kanggo griya sutyi. Sing kendel atimu lan kuwi lakonana.”

¹¹Ratu terus masrahaké marang Salomo, anaké, rantyamané bangunané pendapané griya sutyi uga gedong-gedongé, gedong simpenan, kamar-kamar nduwur lan kamar-kamar ing njeruh lan kamar kanggo tutup-pengluwaran.

¹²Sak terusé uga rantyamané samubarang sing wis dipikir bab lataré griyané GUSTI lan kamar-kamar ing sak ubengé, bab piranti-pirantiné omahé Gusti Allah lan simpenané barang-barang sutyi;

¹³bab golongan-golongané para imam lan para wong Lèwi lan bab kabèh piwulang sing tumuju marang pangabekti ing griyané GUSTI uga kabèh barang sing kanggo pangabekti ing griyané GUSTI.

¹⁴Ratu uga ngekèkké emas sak boboté sing dibutuhaké kanggo nggawé sakkèhé barang ing saben pangabekti; lan ya ngekèkké slaka sak boboté sing dibutuhaké kanggo nggawé sakkèhé barang ing saben pangabekti,

¹⁵ya kuwi emas kanggo dimar emas, boboté sak pira sing dibutuhaké kanggo nggawé siji-sijiné dimar lan dimaré, lan slaka kanggo nggawé dimar slaka, boboté sak pira sing dibutuhaké kanggo saben dimar lan dimaré, tyotyok karo kebutuhané saben dimar ing sak njeruhné pangabekti.

¹⁶Sakwisé mengkono uga ngekèki emas kanggo nggawé méja roti kurban kanggo siji-sijiné méja, lan slaka kanggo nggawé méja slaka;

¹⁷sak terusé uga emas murni kanggo nggawé porok; lan bokor kanggo nyirami lan kendi, uga kanggo nggawé tuwung emas, boboté sak pira sing dibutuhaké kanggo nggawé siji-sijiné tuwung, uga slaka kanggo nggawé tuwung slaka, boboté sak pira sing dibutuhaké kanggo nggawé siji-sijiné tuwung;

¹⁸uga emas sing wis didèwèkké kanggo nggawé mesbèh kanggo ngobong dupa, boboté sak pira dibutuhaké, lan emas kanggo nggawé kréta-krétaan kanggo numpangké kerup loro-loroné, sing megarké swiwiné kanggo ngayomi peti perjanjiané GUSTI.

¹⁹Tembungé Daved: “Kuwi kabèh ketemu ing tulisan, sing dikèkké karo GUSTI marang aku, sing isi pinuntun bab sakkèhé penggawéan sing kudu digawé yèn nindakké rantyamané kuwi.”

²⁰Daved terus ngomong marang Salomo, anaké: “Sing kendel lan sing tatak atimu, lan nandangana kuwi; kowé aja sumelang lan aja nglokro, awit GUSTI, Gusti Allah, Gusti Allahku, nunggal karo kowé. Panjenengané ora bakal négakké lan ninggalké kowé nganti sak rampungé sakkèhé penggawéan kanggo pangabekti ing griyané Gusti Allah.

²¹Lah golongané para imam lan para wong Lèwi wis tata-tataa kanggo kabèh pangabekti ing griyané Gusti Allah, lan wis ana wong sak wetara sing karo sak legané ati arep ngréwangi kowé, sing pinter ing bab nindakké saben penggawéan. Mengkono uga para pemimpin lan rayat iki kabèh ya pada gelem tandang marang apa sing kowé préntahké.”