Read Caribbean Javanese 2 Lelakoné Kraton 11 Bible Online

2 Lelakoné Kraton 11 - Caribbean Javanese bible

2 Lelakoné Kraton 11

¹Sak tekané ing Yérusalèm Réhabéam terus nglumpukké turunané Yéhuda lan Bényamin, 180.000, wong nom-noman sing wis bisa perang, karepé arep merangi wong Israèl, supaya kraton kuwi bali menèh marang piyambaké.

²Nanging terus ana tembungé GUSTI marang Semaya, abdiné Gusti Allah mengkéné:

³“Kowé ngomonga marang Réhabéam, anaké Salomo, ratu ing Yéhuda lan marang wong Israèl ing Yéhuda kabèh lan ing Bényamin, mengkéné:

⁴Mengkéné tembungé GUSTI: Kowé aja pada ngluruk perang nglawan para sedulurmu. Kowé pada muliha menyang omahmu déwé-déwé, awit Aku sing nggawé lelakon iki.” Wong kabèh pada nggatèkké préntahé GUSTI lan terus pada mulih ora ngluruk perang marang Yérobéam.

⁵Réhabéam manggon ing Yérusalèm lan nguwati kuta-kuta pager watu ing Yéhuda.

⁶Sing dikuwati Bètléhèm, Etam, Tékoa,

⁷Bèt-Sur, Sokho, Adulam,

⁸Gat, Mares, Sif,

⁹Adoraim, Lakis, Azéka,

¹⁰Sora, Ayalon lan Hébron, sing manggon ing Yéhuda lan ing Bényamin, pada didadèkké kuta-bèntèng.

¹¹Kuta-kuta pager watu kuwi pada dikuwati lan didèkèki penggedéné suradadu lan tandon pangan, lenga lan anggur;

¹²saben kuta uga dityawisi tamèng lan tumbak. Kuta-kuta mau pada dikuwati banget. Kaya mengkono dadiné Yéhuda lan Bényamin kuwi dikwasani karo piyambaké.

¹³Para imam lan para wong Lèwi ing negarané Israèl kabèh pada teka sangka panggonané lan terus mèlu marang piyambaké.

¹⁴Para wong Lèwi enggoné pada ninggal panggonané lan barang duwèké lan terus pada menyang Yéhuda lan Yérusalèm kuwi, awit Yérobéam lan para anaké pada ora nglilani wong-wong mau pada dadi imamé GUSTI,

¹⁵awit terus ngangkat imam-imam déwé kanggo puntuk-puntuk pangurbanan, kanggo para jim lan kanggo retya-retya pedèt sing wis digawé.

¹⁶Sangka tunggalé taleré Israèl kabèh ya ana wong sing pada menyang Yérusalèm pada nyusul marang para wong Lèwi mau, ya kuwi wong sing wis karo karep atiné nggolèki GUSTI, Gusti Allahé Israèl; lan tekané kuwi arep pasrah kurban marang GUSTI, Gusti Allahé para leluhuré.

¹⁷Mengkono dadiné wong mau pada nguwatké kraton Yéhuda lan nguwatké pepréntahané Réhabéam, anaké Salomo, telung taun, awit ing sak njeruhné telung taun kuwi wong-wong pada mlaku ing dalané Daved lan Salomo.

¹⁸Réhabéam terus njupuk bojoné Mahalat, wong wadon anaké Yerimot anaké Daved, patutan karo Abihail, wong wadon anaké Eliab, anaké Isai,

¹⁹kuwi nglairké anak-anaké lanang: Yeusy, Semarya lan Saham.

²⁰Sakwisé Mahalat, ratu terus omah-omah Maaka, wong wadon anaké Absalom; kuwi duwé anak: Abia, Atai, Sina lan Selomit.

²¹Réhabéam enggoné trésna marang Maaka, wong wadon anaké Absalom, ngungkuli katrésnané marang sak okèhé bojoné lan bojoné wayuh, bojoné ratu kuwi wolulas nanging bojoné wayuh suwidak; kuwi pada duwé anak, sing lanang wolulikur, sing wadon suwidak.

²²Abia, anaké Maaka, dipatyak karo Réhabéam dadi penggedéné, ya kuwi sing mimpin para seduluré, awit karepé bakal diangkat dadi ratu.

²³Awit sangka kuwi ratu terus nandangi karo kawityaksanan, para anaké liyané kabèh pada nyebar ing sak tanah pangwasané Yéhuda lan Bényamin kabèh, ing ngendiwaé kuta sing dipageri watu. Kuwi pada dikèki mangan nganti lubèr-lubèr lan pada dijikukaké bojo okèh.