Read Caribbean Javanese 2 Lelakoné Kraton 12 Bible Online

2 Lelakoné Kraton 12 - Caribbean Javanese bible

2 Lelakoné Kraton 12

¹Bareng kratoné wis kuwat lan pangwasané wis dadi kuwat, Réhabéam uga Israèl kabèh pada nyingkur marang angger-anggeré GUSTI.

²Ing taun sing kaping lima jamané Réhabéam, Sisak, ratu ing Egipte, nyerang Yérusalèm, awit kabèh wis pada ora setia marang GUSTI,

³karo kréta 1200 lan suradadu jaran 60.000, nanging rayat sing mèlu sangka Egipte tyatyahé ora kena diitung okèhé, ya kuwi wong Libia, wong Suki lan wong Etiopia.

⁴Kuta-kuta pager watu ing Yéhuda pada direbut karo Sisak, malah nganti wis tyedak karo Yérusalèm.

⁵Ing kono Semaya terus nemoni Réhabéam lan para penggedéné Yéhuda, sing pada nglumpuk ing Yérusalèm, awit sangka serangané Sisak, terus ngomong mengkéné: “Tembungé GUSTI mengkéné: Kowé wis pada ninggal Aku, mulané Aku ya ninggalké kowé kabèh ing pangwasané Sisak.”

⁶Para penggedéné Israèl lan ratu terus pada nelangsa lan ngomong: “GUSTI kuwi sing bener!”

⁷Bareng GUSTI weruh, yèn wong-wong pada nelangsa, terus ana tembungé GUSTI marang Semaya, isiné mengkéné: “Wong-wong kuwi wis pada ngasorké awaké, mulané ora bakal Tak entèkké, bakal gelis Tak luwari lan mulat-mulat nesu-Ku ora bakal disokké marang Yérusalèm lantaran Sisak.

⁸Nanging bakal pada dadi baturé, supaya pada bisa mbédakké ngabekti marang Aku karo sujut marang kraton-kraton ing ndonya.”

⁹Sisak, ratu Egipte, terus ngluruk lan nyerang Yérusalèm. Piranti-piranti ing griyané GUSTI lan banda ing kraton pada dirampasi; kabèh pada dirampas. Sisak uga njukuki tamèng-tamèng emas sing digawé karo Salomo.

¹⁰Kanggo gantiné Réhabéam nggawé tamèng-tamèng tembaga, sing dipasrahké marang para komendané suradadu sing njaga lawangé kratoné ratu.

¹¹Saben ratu mlebu ing griyané GUSTI, para suradadu mau pada teka sing nggawa tamèng-tamèng kuwi, lan uga wong-wong kuwi sing mbalèkké menyang kamar penjagan.

¹²Awit ratu ngasorké uripé, nesuné GUSTI terus lilih, mulané ora dientèkké babar pisan. Lan menèh ing Yéhuda ya ijik ana bab sing apik.

¹³Réhabéam kuwi ngétokké kuwaté enggoné dadi ratu ing Yérusalèm. Réhabéam umuré patang puluh taun waktu dadi ratu, nanging enggoné dadi ratu ing Yérusalèm suwéné pitulas taun, ing kuta sing dipilih karo GUSTI sangka antarané sak okèhé taleré Israèl, kanggo panggonané asmané. Ibuné asmané Naama, wong wadon bangsa Amon.

¹⁴Réhabéam kuwi nandangi sing ala, awit ora mantep enggoné nggolèki GUSTI.

¹⁵Sejarahé Réhabéam kuwi wiwit-wiwitan nganti pungkasané, kabèh wis ketulis ing sejarahé Semaya lan Ido, wong tukang ndelok, sing uga ngemot didaftar kitab turunané. Ing antarané Réhabéam lan Yérobéam kuwi tansah ana perang.

¹⁶Réhabéam terus dililani ngasuh nunggal karo para leluhuré lan dikubur ing kutané Daved. Nanging Abia, anaké terus dadi ratu nggentèni piyambaké.