Read Caribbean Javanese 2 Lelakoné Kraton 16 Bible Online

2 Lelakoné Kraton 16 - Caribbean Javanese bible

2 Lelakoné Kraton 16

¹Ing taun sing kaping telung puluh enem pepréntahané Asa, Basa, ratu ing Israèl ngluruk perang nglawan Yéhuda. Kuta Rama dikuwati kanggo ngendek mlebu-metuné wong ing pangwasané Asa, ratu ing Yéhuda.

²Asa terus ngetokké emas lan slaka sangka simpenané griyané GUSTI lan sangka simpenané kraton, dikirimké marang Bènhadad, ratu ing Aram, sing manggon ing Damaskus karo tembung:

³“Kula karo sampéyan apa ora nganakké perjanjian, uga bapak kula karo bapak sampéyan. Kula ngirimké emas karo slaka marang sampéyan. Lan kula njaluk sampéyan mbatalké perjanjian sampéyan karo Basa, ratu ing Israèl, supaya mundur sangka negara kula.”

⁴Bènhadad gelem nuruti penjaluké Asa terus ngongkon para penggedéné suradadu supaya pada nyerang kuta-kuta Israèl. Kuwi terus pada ngalahké Iyon, Dan, Abel-Main lan sak okèhé panggonan simpenan ing kuta-kuta ing Naftali.

⁵Kadung Basa krungu bab kuwi, terus mandek enggoné nguwati kuta Rama, medot penggawéané.

⁶Asa terus nglumpukké wong Yéhuda kabèh dikongkon ngangkati watu lan kayu sing dienggo karo Basa kanggo nguwati kuta Rama. Kuwi pada dienggo Asa kanggo nguwati Géba lan Mispa.

⁷Ing waktu kuwi Hanani, wong tukang ndelok, nemoni marang Asa, ratu ing Yéhuda, lan ngomong: “awit sampéyan njagakké marang ratu ing Aram, ora marang GUSTI, Gusti Allahmu, mulané suradadu Aram utyul sangka tanganmu.

⁸Suradaduné wong Etiopia lan Libia apa ora okèh, krétané lan suradadu sing numpak jaran apa ora okèh banget? Nanging pada dipasrahké karo GUSTI ing tanganmu, awit sampéyan njagakké marang Panjenengané.

⁹Awit mripaté GUSTI kuwi ndlajahi ing sak lumahé bumi perlu bakal nglubèrké pangwasané marang para wong sing karo sak kabèhé ati madep marang Panjenengané. Gegandèngan karo bab kuwi sampéyan wis nandangi sing tanpa pikiran, mulané wiwit saiki sampéyan bakal tansah ngalami peperangan.”

¹⁰Asa terus lara ing ati, awit sangka tembungé wong tukang ndelok mau, wong kuwi terus dilebokké pakunjara, awit ratu banget nesuné marang wong mau jalaran sangka enggoné ngomong mengkono. Ing waktu semono Asa uga nglarani wong tunggalané rayat.

¹¹Nanging sejarahé Asa kawit wiwitan nganti tekan pungkasan kuwi ketulis ing kitab bab para ratu ing Yéhuda lan ing Israèl.

¹²Ing taun sing kaping telung puluh sanga pepréntahané, Asa ngalami lara sikilé sing terus mundak banget larané. Nanging sak njeruhné lara kuwi ora nggolèki pitulungan marang GUSTI, nanging pitulungan marang para dukun.

¹³Asa terus dililani ngasuh nunggal karo para leluhuré. Matiné ing taun sing kaping patang puluh sijiné pepréntahané

¹⁴lan terus dikubur ing kuburan sing wis digawé kanggo piyambaké ing kutané Daved. Wong-wong enggoné pada ngubur ing kuburan sing dikebaki wangi-wangian lan werna-werna tyampuran sing dityampuri miturut tyarané nyampur tyampuran, terus ngurupké geni sing gedé banget kanggo panghurmatané.