Read Caribbean Javanese 2 Lelakoné Kraton 17 Bible Online

2 Lelakoné Kraton 17 - Caribbean Javanese bible

2 Lelakoné Kraton 17

¹Yosafat, anaké, dadi ratu nggentèni piyambaké. Awit dadi pemimpiné Israèl, piyambaké terus ngupaya supaya kuwat;

²saben kuta sing dipageri watu ing Yéhuda didèkèki suradadu lan ing tanah Yéhuda lan ing kuta-kuta ing Efraim sing wis direbut karo Asa, bapaké, didèkèki suradadu sing ngwasani.

³Nanging GUSTI nunggal karo Yosafat, awit uripé mlaku ing dalané Daved, leluhuré lan ora nggolèki Baal,

⁴nanging nggolèki Gusti Allahé leluhuré mau lan nandangi pepakoné uga ora nindakké kaya Israèl.

⁵Awit sangka kuwi kraton sing dikwasani dikuwatké karo GUSTI. Wong sak Yéhuda kabèh pada masrahaké pisungsung marang Yosafat, terus piyambaké dadi sugih lan diluhurké banget.

⁶Karo sak kabèhé ati ratu enggoné mlaku ing dalan pituduhé GUSTI. Piyambaké uga nyingkirké sak okèhé puntuk pangurbanan lan tugu brahala sangka negara Yéhuda.

⁷Ing taun sing kaping telu pemrintahané, ratu kongkonan para penggedéné, ya kuwi Bènhail, Obaja, Sakaria, Natanaèl lan Mikaya, pada dikongkon mulangi ing kuta-kuta ing negara Yéhuda.

⁸Mlakuné dibarengi karo wong Lèwi, ya kuwi Semaya, Netanya, Sebaja, Asaèl, Semiramot, Yonatan, Adnia, Tobia lan Tob-Adonia lan imam Elisama lan imam Yoram.

⁹Kuwi pada mulangi ing tanah Yéhuda karo nggawa kitab Torèté GUSTI, pada ngubengi ing sak okèhé kuta ing negara Yéhuda karo mulangi rayat.

¹⁰Sak okèhé kraton ing negara-negara sak ubengé Yéhuda pada katekan rasa wedi sing sangka GUSTI, terus pada ora wani perang nglawan Yosafat.

¹¹Ing antarané wong Filistèn ana sing masrahaké pisungsung marang Yosafat lan slaka kanggo mbayar pajek. Uga wong Arab pada masrahké wedus, wedus gèmbèl lanang 7.700 lan wedus lanang 7.700.

¹²Yosafat mundak suwé mundak kuwat, dadi kuwat ngidap-idapi. Ing Yéhuda piyambaké nggawé bèntèng-bèntèng watu lan kuta-kuta simpenan.

¹³Ratu nduwé barang simpenan okèh ing kuta-kuta ing tanah Yéhuda. Para suradadu pada ing Yérusalèm, kabèh kuwi suradadu sing gagah rosa-rosa.

¹⁴Iki golongané miturut brayaté; para penggedéné sangka Yéhuda: komendané perang Adna, sing mréntah 300.000 suradadu sing gagah rosa-rosa.

¹⁵Terus komendané perang Yohanan sing mréntah wong 280.000 suradadu;

¹⁶terus komendan perang Amasia, anaké Sikhri, sing karo sak kabèhé ati masrahaké piyambaké marang GUSTI, kuwi mréntah para suradadu 200.000 sing gagah rosa-rosa.

¹⁷Sing sangka Bényamin ya kuwi komendané perang Elyada, sakwijiné penggedé sing gagah rosa-rosa, kuwi mréntah wong 200.000 suradadu, sing nganggo panah lan tamèng.

¹⁸Terus komendané perang Yosabad, sing mréntah wong 180.000 suradadu, sing nganggo gamané perang.

¹⁹Kuwi sing pada nyangga penjawap kanggo ratu, dadi sak liyané sing pada dipapanaké karo ratu ing kuta-kuta pager watu ing sak ubengé negara Yéhuda.