Read Caribbean Javanese 2 Lelakoné Kraton 19 Bible Online

2 Lelakoné Kraton 19 - Caribbean Javanese bible

2 Lelakoné Kraton 19

¹Yosafat ratu ing Yéhuda mulih menyang kratoné ing Yérusalèm karo slamet.

²Waktu kuwi Yéhu, anaké Hanani, wong tukang ndelok, lunga nemoni Yosafat lan ngomong marang piyambaké: “Apa bener sampéyan mitulungi wong ala lan kekantyan karo wong sing pada sengit marang GUSTI? Awit sangka perkara kuwi GUSTI nesu marang sampéyan.

³Nanging ijik ana bab sing apik sing ditemokké ing sampéyan, awit sampéyan nyingkirké tugu-tugu brahala sangka negara iki lan nggolèki Gusti Allah karo temen-temen.”

⁴Yosafat manggon ing Yérusalèm. Piyambaké lunga ngubengi panggonan pangwasané, wiwit sangka Bèrsyéba nganti tekan ing pegunungan Efraim karo ngongkon supaya rayat pada mratobat marang GUSTI, Gusti Allahé para leluhuré.

⁵Ratu uga ngangkat rèkter ing sak kabèhé negara, ya kuwi ing sak okèhé kuta sing dipageri watu ing Yéhuda, ing saben kuta.

⁶Para rèkter kuwi pada dikèki paweling mengkéné: “Apa sing kok tandangi kuwi deloken sing apik, awit enggonmu pada nindakké pengadilan kuwi ora kanggo manungsa, nanging kanggo GUSTI, sing tyedak karo sampéyan, yèn sampéyan pada nindakké pengadilan.

⁷Mulané sampéyan supaya pada dikebaki karo rasa wedi marang GUSTI. Sampéyan pada tumindaka sing ngati-ati, awit penggawé ora adil, pilih-sih utawa nampani beselan kuwi ora ana kanggo GUSTI, Gusti Allah kita.”

⁸Ing Yérusalèm Yosafat uga ngangkat wong Lèwi, para imam lan para pemimpiné keluwargané Israèl pada dikongkon ngekèki putusan ing bab angger-anggeré GUSTI lan ing bab sing pada padu. Wong-wong kuwi pada manggon ing Yérusalèm

⁹lan pada dipréntahké mengkéné: “Sampéyan kudu pada nandangi karo wedi lan trésna marang GUSTI, karo setia lan sak tulusé ati, sak mestiné mengkéné:

¹⁰Ing saben perkara sing diajokké marang kowé karo para sedulurmu sing pada manggon ing kuta, ya kuwi perkara ngutahké getih, utawa bab angger-angger, katetepan lan pernatan, wong-wong kuwi pada sampéyan élingna, supaya aja nganti kesalahan marang GUSTI, terus sampéyan lan para sedulurmu pada katekan karo bebenduné. Pada tumindaka mengkono, sampéyan ora bakal pada kesalahan.

¹¹Imam gedé Amarya kuwi sing tak angkat dadi pemimpiné kanggo ing sak okèhé perkara sing gegandèngan karo GUSTI lan Sebaja, anaké Ismaél, pengarepé turunané Yéhuda, kanggo sak okèhé perkara kraton, nanging wong Lèwi bakal pada ngréwangi sampéyan dadi tukang nata. Pada tumindaka karo teges! Supaya GUSTI nunggal karo wong sing temen.”