Read Caribbean Javanese 2 Lelakoné Kraton 2 Bible Online

2 Lelakoné Kraton 2 - Caribbean Javanese bible

2 Lelakoné Kraton 2

¹Salomo ngongkon nggawé griya kanggo asmané GUSTI lan kraton kanggo piyambaké déwé.

²Salomo terus nglumpukké batur 70.000 wong, tukang natah ing pegunungan 80.000 wong lan mandoré sing ngawat-awati 3600 wong.

³Salomo terus kongkonan wong nemoni Huram, ratu ing negara Tirus, dikongkon masrahaké tembungé mengkéné: “Sampéyan supaya gelem nindakké marang kula, kaya sing sampéyan tindakké marang bapak kula Daved, waktu sampéyan ngirimi kayu tyemara marang bapakku, kanggo nggawé kraton sing bakal dienggoni.

⁴Ngertènana, kula bakal nggawé omah kanggo asmané GUSTI, Gusti Allah kula, dadia panggonan sutyi, supaya ing ngarepé diobong dupa wangi-wangian, lan dipasrahké roti ajek lan kurban obongan ésuk soré, ing dina-dina sabat lan ing sasi-sasi anyar, uga ing riyaya-riyaya sing ditetepaké karo GUSTI, Gusti Allah kula, awit kabèh iki dadi kuwajipané wong Israèl ing sak lawasé.

⁵Malah omah sing bakal kula nggawé kuwi kudu gedé, awit Gusti Allah kula kuwi liwat luhur tenimbangané kabèh allah.

⁶Nanging sapa sing saguh nggawé omahé Panjenengané, awit senajan langit malah langit ing sak nduwuré kabèh langit ya ora bisa ngemot Panjenengané? Nanging kula kuwi sapa ta, nanging kula kok bakal nggawé salah sijiné omah kanggo Panjenengané, apa ora mung panggonan kanggo ngobong kurban ing ngarepé?

⁷Mulané saiki, sampéyan supaya gelem ngirimké salah sijiné wong sing pinter ing bab penggawéan sangka emas, slaka, tembaga, wesi, kain wungu nom, bakal abang, bakal wungu tuwa, lan sing uga bisa nggawé ukir-ukiran, supaya ngréwangi para wong pinter ing panggonan kula, ing Yéhuda lan ing Yérusalèm sing wis pada dipilih bapak kula Daved.

⁸Kejaba kuwi uga gelem ngekèki kayu tyemara, kayu beros lan kayu tyendana sangka gunung Libanon, awit kula ngerti, yèn wong-wong sampéyan pada pinter negor wit ing Libanon. Nanging para wong kula bakal ngréwangi para wong-wong sampéyan

⁹supaya kula dityepaki kayu sing okèh, awit omah sing bakal kula nggawé kuwi kudu gedé lan ngidap-idapi.

¹⁰Malah para wong sing pada negori wit kuwi bakal kula tyukupi gandum 20.000 kor, seir 20.000 kor, anggur 20.000 bat, lan lenga 20.000 bat, kanggo pangané wong-wong iki.”

¹¹Huram, ratu negara Tirus, terus kirim layang semaur marang Salomo, sing isiné mengkéné: “Awit GUSTI trésna marang umaté, mulané sampéyan terus didadèkké ratuné.”

¹²Huram terus nerusaké tembungé: “Pinujia GUSTI, Gusti Allahé wong Israèl, sing nggawé langit lan bumi, awit Panjenengané wis ngekèki marang Daved salah sijiné anak sing wityaksana, kebak ing akal pikiran lan pangertèn, sing bakal nggawé omah kanggo GUSTI lan kraton kanggo piyambaké déwé.

¹³Awit sangka kuwi kula ngirimké salah sijiné tukang sing pinter, sing kebak ing pangertèn, ya kuwi Huram-Abi,

¹⁴anaké wong wadon sangka turunané Dan, nanging bapaké wong Tirus. Wong kuwi pinter nggarap emas, slaka, tembaga, wesi, watu, kayu, kain wungu nom, bakal wungu tuwa, mori lenan alus lan bakal abang, lan uga pinter nggawé sak wernané ukir-ukiran kabèh sak wernané rantyamané dipasrahké marang dèwèké karo dibantu para wong pinteré sampéyan lan karo para wong pinteré bapak sampéyan Daved.

¹⁵Saiki sampéyan kula njaluk ngirimké marang para abdi sampéyan gandum lan jewawut, lenga lan anggur, sing wis sampéyan omongaké kuwi.

¹⁶Kula terus pada bakal negori kayu sangka gunung Libanon, sak pira sing sampéyan butuhaké lan bakal kula kirimaké marang sampéyan karo digandèng-gandèng liwat ing segara nganti teka ing Yafo, sampéyan terus bisa nggawa menyang ing Yérusalèm.”

¹⁷Salomo terus ngitung sakkèhé wong mantya sing lanang ing negara Israèl pada kaya sing wis tau ditindakké karo Daved, bapaké. Ing kono ketemu ana wong 153.600.

¹⁸Lan sangka antarané kuwi, 70.000 wong didadèkké batur, 80.000 wong tukang natah ing pegunungan, lan 3600 wong didadèkké mandoré sing mimpin kanggo sing pada nyambutgawé kuwi.