Read Caribbean Javanese 2 Lelakoné Kraton 21 Bible Online

2 Lelakoné Kraton 21 - Caribbean Javanese bible

2 Lelakoné Kraton 21

¹Yosafat dililani lan nunggal karo para leluhuré, terus dikubur ing sandingé para leluhuré ing kutané Daved. Nanging Yoram, anaké terus dadi ratu nggentèni piyambaké.

²Nanging para seduluré, para anaké Yosafat, ya kuwi: Asarya, Yehièl, Sakaria, Asariahu, Mikaèl lan Sefatya. Kuwi kabèh anaké Yosafat, ratu ing Yéhuda.

³Kabèh pada nampa pawèh okèh sangka bapaké, rupa emas, slaka lan barang-barang sing ana ajiné, uga kuta-kuta pager watu ing Yéhuda. Mung waé jagongané ratu dikèkké marang Yoram, awit kuwi anak mbarep.

⁴Bareng Yoram dadi ratu ing kratoné bapaké lan rumangsa kuwat, terus matèni para seduluré kabèh karo pedang, uga para penggedéné Israèl.

⁵Yoram umuré telung puluh loro taun waktu dadi ratu kuwi lan enggoné dadi ratu ing Yérusalèm suwéné wolung taun.

⁶Uripé manut mlakuné para ratu ing Israèl kaya mlakuné brayaté Akab, awit bojoné kuwi anaké Akab. Sing ditandangi kuwi apa sing ala ing ngarepé GUSTI.

⁷Nanging senajan mengkono GUSTI ora gelem ngentèkké tyedak turunané Daved awit sangka anané perjanjian sing dianakké karo Daved, tyotyok karo enggoné janji, yèn Panjenengané bakal ngekèki turunan marang Daved lan marang anak-anaké nganti tekan sak lawas-lawasé.

⁸Ing waktu jamané Yoram, Edom nglawan marang pangwasané Yéhuda, terus ngangkat ratu déwé.

⁹Yoram uga para penggedéné suradaduné lan sak okèhé krétané pada maju perang; ing wayah mbengi ratu tangi lan karo ditutké para penggedéné suradadu kréta piyambaké terus nrobos suradaduné wong Edom sing ngepung.

¹⁰Kaya mengkono Edom enggoné nglawan marang pangwasané Yéhuda lan terus merdéka nganti sepréné. Ing waktu semono Libna uga nglawan marang pangwasané Yéhuda. Kedadian mengkono awit ratu ninggalké GUSTI, Gusti Allahé para leluhuré.

¹¹Lan menèh piyambaké nggawé puntuk-puntuk pangurbanan ing gunung-gunung ing negara Yéhuda. Wong sing pada manggon ing Yérusalèm pada dibujuk supaya laku bédang lan wong Yéhuda pada disasarké.

¹²Terus ana layang sing dikabarké marang piyambaké sangka Elia mengkéné isiné: “Mengkéné tembungé GUSTI, Gusti Allahé Daved, leluhurmu: Awit sampéyan ora mlaku ing dalané Yosafat, bapakmu lan Asa, ratu ing Yéhuda,

¹³nanging manut mlakuné para ratu ing Israèl lan mbujuk Yéhuda lan para wong Yérusalèm supaya laku bédang, pada kaya sing ditindakké karo brayaté Akab, mengkono uga sakrèhné sampéyan wis matèni para sedulurmu, sak kabèhé turunané bapakmu sing luwih betyik tenimbangané karo sampéyan,

¹⁴mulané GUSTI bakal nekakké bebendu gedé marang rayatmu, anak-anakmu, para bojomu, uga marang sak kabèhé barang duwèkmu.

¹⁵Nanging sampéyan déwé bakal ngalami lara sing medèni, sakwijiné lara usus, terus yèn wis mangan usus sampéyan bakal metu awit sangka lara kuwi.”

¹⁶GUSTI terus nangèkké atiné wong Filistèn lan wong Arab sing manggon tyedak karo wong Etiopia supaya pada nglawan Yoram.

¹⁷Kuwi terus pada ngluruk nglawan Yéhuda, pada mlebu mrana lan ngusungi sak kabèhé barang duwèkmu sing ketemu ing palèsé ratu, minangka barang sing direbut, uga para anak lan para bojoné, kabèh ora ana anak siji waé kèri kejaba Yoas, anaké sing ragil.

¹⁸Sakwisé kuwi kabèh kelakon, GUSTI terus nibakké bebendu marang ratu rupa lara usus, sing ora bisa waras.

¹⁹Let sak untara waktu, kira-kira sakwisé rong taun, ususé pada metu awit sangka nesuné mau, terus mati karo ngalami rekasa sing medèni. Rayaté ora ngurupké geni kanggo piyambaké kaya sing ditindakké kanggo para leluhuré.

²⁰Waktu dadi ratu piyambaké umuré telung puluh loro taun, nanging enggoné dadi ratu ing Yérusalèm suwéné wolung taun. Matiné ora ana sing nangisi. Enggoné ngubur ing kutané Daved, nanging ora ing kuburané para ratu.