Read Caribbean Javanese 2 Lelakoné Kraton 24 Bible Online

2 Lelakoné Kraton 24 - Caribbean Javanese bible

2 Lelakoné Kraton 24

¹Yoas umuré pitung taun waktu dadi ratu lan enggoné nggowa pemrintahan ing Yérusalèm suwéné patang puluh taun. Ibuné asma Sibya, sangka Bèrsyéba.

²Yoas nandangi apa sing bener ing ngarepé GUSTI sakjeké uripé imam Yoyada.

³Imam Yoyada njukukké bojo loro kanggo ratu lan terus pada duwé anak lanang lan wadon.

⁴Yoas terus nduwé karep arep ndandani griyané GUSTI.

⁵Para imam lan para wong Lèwi pada diklumpukké lan diomongi mengkéné: “Kowé pada mubenga ing kuta-kuta Yéhuda lan nglumpukna duwit sangka wong Israèl kabèh kanggo ndandani griyané Gusti Allahmu saben taun. Kuwi gelis tandangana!” Nanging para wong Lèwi ora gelis-gelis nglakoni préntah kuwi.

⁶Ratu terus nyeluk imam gedé Yoyada lan takon marang piyambaké: “Apa sebabé, sampéyan kok ora njupuk marang para wong Lèwi supaya pada nglumpukké pajek ing Yéhuda lan ing Yérusalèm, sing ditetepaké karo Moses, abdiné Gusti Allah, marang pasamuan Israèl kanggo Tarup panggoné angger-anggeré Gusti Allah?

⁷Awit para anak-anaké Atalya, wong wadon ala kuwi, pada ngrusak griyané Gusti Allah, malah barang-barang sutyi ing griyané GUSTI dikanggokké kanggo para Baal.”

⁸Sakwisé mengkono ratu terus ngongkon nggawé peti sing didèkèk ing ngarepé gapurané griyané GUSTI

⁹lan terus ngongkon ngomongké ing Yéhuda lan ing Yérusalèm, yèn wong kudu mbayar pajek kanggo GUSTI, sing ditetepaké karo Moses, abdiné Gusti Allah, kanggo wong Israèl ing ara-ara samun.

¹⁰Kabèh penggedéné lan rayat kabèh pada bungah; pada teka karo nggawa pajekké, dilebokké ing peti mau nganti kebak.

¹¹Saben-saben peti digawa mlebu perlu didelok karo para wong Lèwi atas asmané ratu lan yèn wis kétok isi duwit okèh, juru tulisé ratu lan para sing dikèki kwasa karo imam gedé pada teka ngetokké isiné peti mau, terus dibalèkaké ing panggonané menèh. Kaya mengkono kuwi saben-saben ditindakké lan okèh duwit sing diklumpukké.

¹²Ratu lan imam gedé Yoyada masrahaké duwit mau marang sing nggedèni penggawéané griyané GUSTI. Iki terus pada ngekèkké duwit kuwi marang para tukang natah lan para tukang kayu kanggo upah enggoné ndandani griyané GUSTI; uga marang para tukang wesi lan tembaga sing pada ndandani griyané GUSTI.

¹³Sakwisé mengkono tukang-tukang mau pada wiwit nyambut nggawé; tumindaké penggawéan kabèh dikerjani karo wong-wong kuwi. Griyané Gusti Allah dibangun menèh miturut kahanané wiwitan lan dikuwatké.

¹⁴Bareng wis rampung, turahané duwit dipasrahké marang ratu lan imam gedé Yoyada. Duwit kuwi dienggo nggawé piranti-pirantiné griyané GUSTI, ya kuwi: piranti-piranti kanggo nganakké pangabekti, piranti-piranti kanggo pasrah kurban obongan, uga piring-piring lan piranti-piranti emas lan slaka. Sakjeké uripé imam gedé Yoyada kurban obongan ajek dipasrahké ing griyané GUSTI.

¹⁵Imam gedé Yoyada wis tuwa lan wis okèh banget umuré, terus ninggal ndonya; umuré 130 taun.

¹⁶Terus dikubur ing kutané ratu Daved sandingé para ratu, awit sangka penggawéané sing betyik ing negara Israèl sing tumuju marang Gusti Allah lan omahé.

¹⁷Sakwisé imam gedé Yoyada, para penggedéné ing Yéhuda pada nemoni lan sendeku ing ngarepé ratu. Wiwit waktu kuwi ratu ngrungokké tembungé wong-wong kuwi,

¹⁸dadiné terus pada ninggal griyané GUSTI, Gusti Allahé para leluhuré lan terus pada nyembah marang tugu-tugu brahala lan retya-retyané brahala. Awit sangka kesalahané kuwi Yéhuda lan Yérusalèm ketiban bebendu.

¹⁹Nanging GUSTI kongkonan para nabi marang wong-wong mau, supaya pada mratobat marang Panjenengané. Para nabi mau banget-banget enggoné ngélingké, nanging ora pada gelem ngrungokké.

²⁰Rohé Gusti Allah terus ngwasani imam Sakaria, anaké imam gedé Yoyada; kuwi ngadek ing ngarepé rayat lan ngomong: “Mengkéné tembungé Gusti Allah: Kenèng apa kowé pada nerak marang pepakoné GUSTI, nganti kowé pada ora kanggonan kabekjan? Awit kowé pada ninggal GUSTI, mulané Panjenengané ya ninggalké kowé.”

²¹Nanging terus pada komplotan nglawan marang Sakaria lan awit sangka préntahé ratu terus pada mbandemi watu piyambaké ing platarané griyané GUSTI.

²²Yoas ora éling marang kasetiané imam gedé Yoyada, bapaké imam Sakaria, marang piyambaké. Ratu matèni anaké imam gedé Yoyada, ing waktu ninggal ndonya ngomong: “GUSTI supaya weruh lan ngekèki balesan!”

²³Waktu gantiné taun suradadu Aram ngluruk Yoas lan mlebu ing Yéhuda lan Yérusalèm, sak okèhé penggedéné bangsa pada dipatèni nganti entèk lan sak okèhé barang sing direbut dikirimké marang ratu ing Damaskus.

²⁴Senajan suradadu Aram kuwi mung setitik, nanging GUSTI ngekèkké suradadu sing gedé banget kuwi marang wong-wong mau, awit wong Yéhuda wis pada ninggal GUSTI, Gusti Allahé para leluhuré. Kaya mengkono dadiné wong Aram pada nibakké ukuman marang Yoas.

²⁵Waktu suradadu Aram lunga sangka ngarepé - nanging waktu ditinggal kuwi ratu ngalami tatu banget - para pegawéné pada komplotan nglawan piyambaké awit sangka getihé anaké imam gedé Yoyada mau, ratu terus dipatèni ing peturonané. Ratu ninggal lan dikubur ing kutané Daved, nanging ora ing kuburané para ratu.

²⁶Sing pada komplotan kuwi ya kuwi: Sabad, anaké Siméat, wong wadon Amon lan Yosabad, anaké Simit, wong wadon Moab.

²⁷Kanggo para anaké lan tembungé Gusti Allah sing okèh kanggo piyambaké lan bab enggoné ndandani griyané Gusti Allah, kabèh kuwi ketulis ing bab kitab para ratu. Amasia, anaké, terus dadi ratu nggentèni piyambaké.