Read Caribbean Javanese 2 Lelakoné Kraton 29 Bible Online

2 Lelakoné Kraton 29 - Caribbean Javanese bible

2 Lelakoné Kraton 29

¹Hiskia waktu dadi ratu umuré selawé taun, nanging enggoné dadi ratu ing Yérusalèm suwéné sangalikur taun. Ibuné, asma Abia, wong wadon, anaké Sakaria.

²Piyambaké nandangi sing bener ing ngarepé GUSTI, nandangi apa sing ditandangi karo Daved, embahé.

³Ing taun sing kaping pisan pemrintahané, ing sasi kaping pisan, ratu ngongkon mbukakké lawang-lawangé griyané GUSTI lan didandani.

⁴Terus nyeluk para imam lan para wong Lèwi, pada dipréntah nglumpuk ing plataran wétan.

⁵Ratu ngomong: “Pada rungokna, hé para wong Lèwi! Saiki sampéyan pada sutyèkna uripmu, mengkono uga griyané GUSTI, Gusti Allahé para leluhurmu ya sutyèkna!

⁶Awit para leluhur kita wis pada ora setia, pada nglakoni apa sing ala ing ngarepé GUSTI, Gusti Allah kita, pada nyingkur marang Panjenengané, pada ngénggokké praupané sangka omahé GUSTI lan ninggal kuwi.

⁷Malah pada nutup lawang-lawangé balé-baléné griyané GUSTI lan matèni kabèh dimar. Ora pada ngobong dupa lan ora masrahaké kurban obongan marang Gusti Allahé wong Israèl ing griya sutyi,

⁸terus Yéhuda lan Yérusalèm pada ketiban karo bebenduné GUSTI, pada didadèkké ala, medèni lan dadi guyonan, kaya sing pada kok deleng karo mripatmu déwé iki.

⁹Ya, awit sangka kuwi para leluhur kita terus pada mati karo pedang lan anak kita lanang, wadon uga bojo kita pada dadi tawanan.

¹⁰Saiki aku nduwé karep arep nganakké perjanjian karo GUSTI, Gusti Allahé Israèl, supaya bebenduné sing mulat-mulat kuwi adoh sangka kita.

¹¹Hé, anak-anakku, kowé saiki aja pada keblinger, awit kowé wis pada dipilih karo GUSTI dikongkon ing ngarepé ngladèni Panjenengané, nindakké pangabekti lan ngobong kurban kanggo Panjenengané.”

¹²Para wong Lèwi terus pada tandang, ya kuwi sangka turunané Kéhat: Mahat, anaké Amisai lan Yoèl, anaké Asaria, sangka turunané Mérari: Kis, anaké Abdi lan Asaria, anaké Yehaleleel, sangka wong Gèrson: Yoah, anaké Sima lan Eden, anaké Yoah,

¹³sangka turunané Elisafan: Simri lan Yeiel, sangka turunané Asaf: Sakaria lan Matanya,

¹⁴sangka turunané Héman: Yehièl lan Simèi lan sangka turunané Yedutun: Semaya lan Yizhar.

¹⁵Kuwi pada nglumpukké para seduluré lan pada nyutyèkké uripé. Sakwisé mengkono terus pada mara miturut préntahé ratu, tyotyok karo tembungé GUSTI, terus pada nyutyèkké griyané GUSTI.

¹⁶Sakwisé kuwi para imam terus pada mlebu ing griyané GUSTI perlu nyutyèkké kuwi. Kabèh sing reget, sing ketemu ing griyané GUSTI, digawa menyang lataré griyané GUSTI; kuwi pada ditampani karo para wong Lèwi lan digawa metu, menyang legokan Kidron.

¹⁷Enggoné wiwit nyutyèkké kuwi ing tanggal sepisan, sasi kaping pisan. Ing dina sing kaping wolu, sasi kuwi, wis pada tekan ing sebrangé griyané GUSTI lan enggoné nyutyèkké griyané GUSTI kuwi suwéné wolung dina. Rampungé ing dina sing kaping nembelas sasi kaping pisan.

¹⁸Sakwisé kuwi terus pada mlebu nemoni marang Hiskia lan ngomong: “Kula wis pada nyutyèkké griyané GUSTI kabèh, uga mesbèh kurban obongan sak pirantiné kabèh.

¹⁹Malah kabèh piranti, sing kebuwang karo Akas, waktu piyambaké ninggal Gusti ing waktu pepréntahané, wis pada kula tyawiské lan wis pada kula sutyèkké. Saiki kabèh ing ngarepé mesbèhé GUSTI.”

²⁰Esuk mruput Hiskia nglumpukké para penggedéné kuta lan terus lunga menyang griyané GUSTI.

²¹Kabèh pada nggawa sapi lanang pitu, wedus gèmbèl lanang pitu, wedus gèmbèl nom pitu lan wedus lanang pitu kanggo kurban ngluwari dosa kanggo brayaté ratu, kanggo panggonan sutyi lan kanggo Yéhuda. Ratu terus ngongkon marang para tyedak turunané Harun, ya kuwi para imam, supaya masrahaké kurban mau ing mesbèhé GUSTI.

²²Terus pada mbelèh sapi-sapi mau, para imam nampani getihé, disiramké ing mesbèh. Sakwisé mengkono terus mbelèh wedus-wedusé gèmbèl lanang lan getihé disiramké ing mesbèh. Terus mbelèh wedus-wedusé gèmbèl nom lan getihé ya disiramké ing mesbèh.

²³Sak terusé wedus-wedusé lanang, sing bakal kanggo kurban ngluwari dosa mau pada digawa menyang ngarepé ratu lan ing ngarepé pasamuan. Terus pada numpangké tangané ing wedus-wedusé kuwi.

²⁴Para imam terus mbelèh lan masrahaké getihé ing mesbèh, kanggo kurban ngluwari dosa, supaya olèh tebusan kanggo wong Israèl kabèh. Awit ratu wis ngekèki préntah supaya pasrah kurban obongan lan kurban ngluwari dosa kanggo wong Israèl kabèh.

²⁵Ratu mapanké para wong Lèwi ing griyané GUSTI karo nggawa ketyer, harep lan siter, netepi préntahé Daved lan nabi Gad, wong tukang ndelok abdiné ratu, lan nabi Natan, awit kuwi préntahé GUSTI lantaran para nabiné.

²⁶Para wong Lèwi terus pada ngadek karo nyekel piranti-piranti musik, sing digawé karo Daved, mengkono uga para imam, sing pada nyekel trompèt.

²⁷Hiskia terus ngongkon pasrah kurban obongan ing mesbèh. Waktu kurban obongan wiwit dipasrahké, kidungan kanggo GUSTI ya terus dipujèkaké, ya kuwi swarané trompèt, lan piranti-piranti musik sing digawé karo Daved, ratu ing Israèl.

²⁸Waktu kidungan dipujèkaké lan trompèt diunèkké, wong sak pasamuan kabèh pada sujut lan nyembah. Kuwi kabèh ditandangi nganti sak entèkké kurban obongan.

²⁹Sak rampungé pasrah kurban obongan, ratu lan sak kabèhé wong sing pada ing kono mèlu ratu, pada nyembah sujut.

³⁰Hiskia lan para penggedéné pada ngongkon marang para wong Lèwi supaya pada nggawé kidung pamuji kanggo GUSTI nganggo tembung-tembungé Daved lan Asaf, wong tukang ndelok. Wong mau terus nggawé kidung pamuji karo bungah lan terus nyembah sujut.

³¹Sakwisé mengkono Hiskia ngomong: “Saiki kowé wis pada masrahaké awakmu marang GUSTI. Pada majua lan nggawaa kurban-kurban sing dibelèh lan kurban-kurban pamuji maturkesuwun ing griyané GUSTI!” Wong sak pasamuan terus pada nggawa kurban-kurban sing dibelèh lan kurban-kurban pamuji; saben wong karo atiné sing lega-lila uga nggawa kurban-kurban obongan.

³²Tyatyahé kurban obongan sing digawa karo wong sak pasamuan ya kuwi: sapi pitung puluh, wedus gèmbèl lanang 100, lan wedus nom 200. Kuwi kabèh kanggo kurban obongan kanggo GUSTI.

³³Nanging pisungsung-pisungsung sutyi rupa: sapi 600 lan wedus 3.000.

³⁴Nanging tyatyahé imam ketitiken, mulané ora kuwat ngelèti sak okèhé kurban obongan. Awit sangka kuwi para seduluré, para wong Lèwi, ngréwangi nganti sak rampungé penggawéan lan nganti para imam wis pada nyutyèkké awaké. Awit para wong Lèwi kuwi enggoné nyutyèkké awaké luwih temen tenimbangané para imam.

³⁵Lan menèh kurbané obongan kuwi okèh, mengkono uga gajihé kurban keslametan lan kurban ombènan kanggo mbarengi kurban obongan mau. Kaya mengkono pangabekti ing griyané GUSTI enggoné ditata menèh.

³⁶Hiskia lan rayat kabèh pada seneng-seneng awit sangka apa sing wis ditetepaké karo Gusti Allah kanggo bangsa kuwi, awit bab kuwi kelakoné ora kenyana-nyana.