Read Caribbean Javanese 2 Lelakoné Kraton 3 Bible Online

2 Lelakoné Kraton 3 - Caribbean Javanese bible

2 Lelakoné Kraton 3

¹Salomo terus miwiti nggawé griyané GUSTI ing Yérusalèm ing gunung Moria, panggonan waktu GUSTI ngétok marang Daved, bapaké, ing panggonan sing wis ditetepaké karo Daved, ya kuwi ing panggonan penggilingané gandum Oman, wong Yébus.

²Ratu enggoné wiwit nggawé omah kuwi ing sak njeruhné sasi sing kaping pindo, ing taun sing kaping papat pepréntahané.

³Nanging dasaré ukuran sing dienggo Salomo enggoné nggawé griyané Gusti Allah kuwi mengkéné: dawané suwidak éluh, miturut ukuran éluh sing lawas, nanging ambané rong puluh éluh.

⁴Balé ing ngarepé omah gedé kuwi dawané rong puluh éluh, miturut ambané griya mau, lan duwuré 120 éluh. Balé kuwi ing sisih njeruhné dilapis karo emas murni.

⁵Griyané gedé digedèki kayu beros. Kayu kuwi terus dilapis karo emas murni, terus dipasangi ukiran wit kurma, ing duwuré didèkèki gambaran ranté.

⁶Kuwi ya dilapis karo watu-watu sing larang-larang kanggo rerékan, nanging emasé emas Parwaim.

⁷Kaya mengkono omah gedé mau; blandar-pengereté, dempel-dempelé, gedèk-gedèkké lan lawang-lawangé pada dilapis emas, nanging ing gedèké didèkèki kerup ukir-ukiran.

⁸Sakwisé mengkono ratu terus nggawé kamar omah Mahasutyi; dawané rong puluh éluh, miturut ambané omah mau, lan ambané uga rong puluh éluh. Kuwi terus dilapis emas murni, sing boboté 600 talénta;

⁹boboté paku-pakuné sèket sèkel emas. Kamar-kamar nduwur ya dilapis karo emas.

¹⁰Terus nggawé kerup tatahan loro kanggo ing omah Mahasutyi, kuwi ya dilapis karo emas.

¹¹Swiwiné kerup-kerup kuwi gunggungé dawané kabèh rong puluh éluh;

¹²swiwi ing sisihé kerup sing sijiné dawané limang éluh lan kuwi notok ing témboké kamar, nanging swiwi ing sisih sijiné dawané uga limang éluh, kuwi adu-arep karo swiwiné kerup sijiné.

¹³Dadiné swiwiné kerup loro-loroné kuwi megaré dawané rong puluh éluh; kerup-kerup kuwi loro-loroné ngadek madep marang omah gedé.

¹⁴Ratu terus nggawé geber, sing digawé bakal mori wungu tuwa, bakal mori wungu nom, bakal mori abang lan mori lenan alus nganggo digambari kerup.

¹⁵Ing ngarepé omah didèkèki tugu loro sing duwuré telung puluh lima éluh, nganggo gerbél ing nduwuré, sing duwuré limang éluh.

¹⁶Terus nggawé rerékan ranté sing dikalungké ing nduwuré tugu-tugu mau, lan terus nggawé rerékan woh mulwa 100 iji, dipasang ing rerékan ranté mau.

¹⁷Tugu-tuguné diedekaké ing ngarepé Griya Sutyi, sing siji ing sisih tengen lan sijiné ing sisih kiwa; tugu sing tengen dijenengké Yakin, nanging tugu kiwa dijenengké Boas.