Read Caribbean Javanese 2 Lelakoné Kraton 31 Bible Online

2 Lelakoné Kraton 31 - Caribbean Javanese bible

2 Lelakoné Kraton 31

¹Bareng samubarang kabèh wis rampung, wong Israèl ing kono kabèh pada ngubengi kuta-kuta ing tanah Yéhuda, terus pada ngrusak sak okèhé tugu brahala, ngentèkké sak okèhé tyagaké brahala lan ngembrukké sak okèhé puntuk pangurbanan lan mesbèh ing sak tanah Yéhuda lan Bényamin kabèh, uga ing Efraim lan Manasé, nganti entèk kabèh. Sakwisé mengkono wong Israèl kabèh terus pada mulih menyang kuta-kutané, menyang ing duwèké déwé-déwé.

²Hiskia terus ngedum para imam lan para wong Lèwi, didadèkké golongan-golongané miturut kuwajipané déwé-déwé kanggo imam lan kanggo wong Lèwi, ing bab pasrah kurban obongan lan kurban keslametan, bab ngutyap maturkesuwun lan ing bab ngidungké pamuji lan ing bab ngladèni ing gapura-gapura ing panggonan tarupé GUSTI.

³Ratu ngekèki sumbangan sangka barang duwèké kanggo kurban obongan, ya kuwi: kurban obongan ing waktu ésuk lan ing wantyi soré, kurban obongan ing dina sabat lan ing sasi-sasi anyar lan ing dina gedé; kuwi kabèh ketulis ing Torèté GUSTI.

⁴Sak terusé piyambaké ngekèki préntah marang rayat, ya kuwi wong sing pada manggon ing Yérusalèm, supaya masrahaké sumbangan sing dadi pandumané para imam lan para wong Lèwi, supaya bisa ngesokké kekuwatané kanggo nindakké Torèté GUSTI.

⁵Bareng pepakon mau wis kasebar, wong Israèl terus gelis-gelis masrahaké pametuné sing wiwitan kanggo gandum, anggur, lenga, madu lan werna-werna pametuné bumi nganti okèh. Kejaba kuwi uga masrahaké pisungsung prasepuluhan samubarang kabèh nganti okèh.

⁶Wong Israèl lan wong Yéhuda sing pada manggon ing kuta-kuta ing tanah Yéhuda uga masrahaké pisungsung prasepuluhan, rupa sapi lan wedus lan pisungsung prasepuluhan sing rupa pisungsung sutyi sing wis disutyèkké kanggo GUSTI, Gusti Allahé. Kabèh kuwi disèlèhké nganti tumpuk-tumpuk.

⁷Enggoné miwiti nata tumpukan kuwi ing sasi kaping telu, nanging rampungé ing sasi kaping pitu.

⁸Hiskia lan para penggedéné terus pada teka weruh tumpukan kuwi lan pada memuji marang GUSTI lan umaté, ya kuwi wong Israèl.

⁹Hiskia takon marang para imam lan para wong Lèwi bab tumpukan kuwi,

¹⁰nanging imam gedé Asarya, tyedak turunané Sadok, nyauri mengkéné: “Wiwit waktu pisungsung spésial kuwi dipasrahké marang griyané GUSTI, kula wis pada mangan nganti warek banget, nanging ijik turah okèh banget, awit GUSTI wis ngekèki berkah marang umaté Gusti, nganti terus ana turahan sing sakméné okèhé kuwi.”

¹¹Hiskia terus ngongkon nyawiské kamar-kamar ing griyané GUSTI lan kuwi ya terus dityawiské.

¹²Nanging wong-wong pada setia enggoné masrahaké mrana sak okèhé pisungsung spésial, pisungsung prasepuluhan lan pisungsung-pisungsung sutyi. Konanya, sakwijiné wong Lèwi, sing njaga kuwi kabèh lan Simèi, seduluré, kuwi sak ngisoré,

¹³nanging Yehièl, Asarya, Nahat, Asahel, Yerimot, Yosabad, Eliel, Yismakya, Makat lan Benaya, kuwi pada dadi sing tukang mriksa, sak ngisoré Konanya lan Simèi, seduluré mau, tyotyok karo pituduhé Hiskia lan imam gedé Asarya, penggedéné griyané GUSTI.

¹⁴Sak terusé Koré, anaké Yimna, sakwijiné wong Lèwi, dadi tukang njaga gapura wétan, mriksa pisungsung-pisungsung kebungahan kanggo Gusti Allah lan ngedum-edum pisungsung spésial sing kanggo GUSTI lan pisungsung-pisungsung Mahasutyi.

¹⁵Ing kuta-kutané para imam dibantu karo setia karo Eden, Minyamin, Yésua, Semaya, Amarya lan Sekanya ing bab ngedum-edum mau marang para sedulur miturut golongané, marang para wong déwasa lan botyah-botyah,

¹⁶kejaba marang saben wong sing mlebu ing griyané GUSTI, miturut dina sing ditetepaké, miturut kuwajipané sing dipasrahké lan miturut golongané, ya kuwi para wong lanang sing ketulis ing daftar, sing umuré telung taun munggah.

¹⁷Para imam pada dityateti ing daftar miturut brayaté, nanging para wong Lèwi sing umuré rong puluh taun munggah dityateti miturut kuwajipané lan golongané.

¹⁸Para imam ketyatetan uga sak brayaté kabèh, ya kuwi: bojo, anak lanang lan wadon, dadi sak golongané kabèh, awit karo temen enggoné pada nyutyèkké awaké kanggo pisungsung sing sutyi.

¹⁹Kanggo tyedak turunané Harun, ya kuwi para imam, sing pada manggon ing panggonan-panggonan ing sak ubengé kuta-kutané, ing saben kuta ana wong-wong sing karo diomongké jenengé, dipilih ngedum-edum marang saben wong lanang golongané brayat imam lan marang saben wong Lèwi sing klebu ing daftar.

²⁰Kaya mengkono sing ditindakké karo Hiskia ing sak tanah Yéhuda kabèh. Piyambaké nandangi apa sing apik, sing jujur lan apa sing bener ing ngarepé GUSTI, Gusti Allahé.

²¹Saben arep miwiti penggawéané sing ngladèni marang griyané Gusti Allah lan sing tumuju marang tumindaké Toret lan pepakoné Gusti Allah, piyambaké nggolèki marang Gusti Allahé. Samubarang kabèh ditandangi karo sak kabèhé ati, mulané sak okèhé budidayané olèh nggawé.