Read Caribbean Javanese 2 Lelakoné Kraton 33 Bible Online

2 Lelakoné Kraton 33 - Caribbean Javanese bible

2 Lelakoné Kraton 33

¹Manasé waktu dadi ratu umuré rolas taun, nanging enggoné dadi ratu ing Yérusalèm suwéné sèket lima taun.

²Ratu nandangi apa sing ala ing ngarepé GUSTI tyotyok karo penggawéné ala para bangsa sing wis ditundungi karo GUSTI sangka ngarepé wong Israèl.

³Piyambaké ngedekké puntuk-puntuk pangurbanan menèh sing wis pada dibubrahi karo Hiskia, bapaké; Ratu nggawé mesbèh-mesbèhé kanggo para Baal, nggawé retya-retyané Asyèra lan sujut lan nyembah marang lintang-lintang ing langit kabèh lan ngabekti marang kuwi.

⁴Piyambaké ya ngedekké mesbèh-mesbèhé ing griyané GUSTI, senajan kanggo griya kuwi, GUSTI wis ngomong: “Asma-Ku bakal manggon ing Yérusalèm sak lawas-lawasé!”

⁵Lan uga nggawé mesbèh-mesbèhé kanggo lintang-lintang suradaduné langit , ing plataran loro griyané GUSTI.

⁶Malah para anaké pada dipasrahké kanggo kurban ing geni ing legokan Ben-Hinom; piyambaké olèh ngèlmu ngramal, ngèlmu mbedèk lan ngèlmu sihir, sesrawungan karo para préwangan lan para tukang ngundang rohé nubuat. Ratu nandangi apa sing ala ing ngarepé GUSTI okèh banget, nganti nggawé nesuné ati-Né.

⁷Piyambaké uga mernahké retya brahala gawèané ing griyané Gusti Allah, senajan Gusti Allah wis ngomong marang Daved lan marang Salomo, anaké: “Ing omah iki lan ing Yérusalèm, sing wis Tak pilih sangka tangané taleré Israèl, Aku bakal ndèkèkké asma-Ku sak lawas-lawasé!

⁸Aku ora bakal ndadèkké sikilé wong Israèl nganti adoh menèh sangka tanah sing wis Tak tetepké marang para leluhurmu, enggoné pada tetep nindakké sak kabèhé pepakon-Ku lantaran Moses, ya kuwi sak okèhé angger-angger, katetepan lan pernatan.”

⁹Nanging Manasé nasarké Yéhuda lan para sing manggon ing Yérusalèm, nganti pada nindakké apa sing ala ngungkuli para bangsa sing wis dientèkké karo GUSTI sangka ngarepé wong Israèl.

¹⁰GUSTI terus ngomong marang Manasé lan rayaté, nanging pada ora nggubris marang tembungé kuwi.

¹¹Awit sangka kuwi GUSTI terus nekakké para penggedéné suradaduné ratu Asyur, sing nyekel Manasé nganggo gantol, terus dibanda nganggo ranté tembaga lan terus digawa menyang Babèl.

¹²Ing sak njeruhné kahanan kepèpèt kuwi, ratu ngupaya nglilihké atiné GUSTI, Gusti Allahé; piyambaké ngasorké dèkné déwé tenan ing ngarepé Gusti Allahé para leluhuré,

¹³lan ndedonga marang Panjenengané. GUSTI terus nuruti pandongané lan nuruti penjaluké. Gusti Allah mbalèkké piyambaké menyang Yérusalèm lan diangkat dadi ratu menèh. Manasé terus ngakoni, yèn GUSTI kuwi Gusti Allah.

¹⁴Ratu terus ngedekké témbok njaba ing kutané Daved, ing kuloné Gihon, ing legokan, nganti tekan ing sak tyedaké gapura Iwak, ngubengi ing Ofèl. Témbok kuwi digawé duwur banget. Ratu uga ndèkèkké penggedé-penggedéné perang ing saben kuta sing dipageri watu ing negara Yéhuda.

¹⁵Allah-allahé mantya lan brahala pada disingkirké sangka griyané GUSTI, uga sak okèhé mesbèh sing didekké ing gunungé griyané GUSTI lan ing Yérusalèm, kuwi pada dibuwangi menyang sak njabané kuta.

¹⁶Mesbèhé GUSTI didekké menèh lan terus kanggo pasrah kurban keslametan lan kurban pamuji maturkesuwun lan menèh ratu terus préntah marang Yéhuda, supaya ngabekti marang GUSTI, Gusti Allahé Israèl.

¹⁷Nanging senajan mengkono, rayat ijik pasrah kurban ing puntuk-puntuk pangurbanan, nanging mung marang GUSTI, Gusti Allahé.

¹⁸Sak luwihé sejarahé Manasé, pandongané marang Gusti Allahé lan tembung-tembungé para wong tukang ndelok sing pada ngomong marang ratu atas asmané GUSTI, Gusti Allahé Israèl, kabèh kuwi kabèh ing sejarahé para ratu ing Israèl.

¹⁹Pandongané lan ketrimané pandongané, sak okèhé dosané lan enggoné ora setia, kabèh panggonan sing diedeki puntuk-puntuk pangurbanan, tugu-tugu brahala lan retya-retyané tatahan, sak durungé piyambaké ngasorké uripé, kabèh kuwi pada ketulis ing sejarahé para wong tukang ndelok.

²⁰Sakwisé mengkono Manasé terus dililani ngasuh nunggal karo para leluhuré lan dikubur ing kratoné. Nanging Amon, anaké, terus dadi ratu, nggentèni piyambaké.

²¹Amon waktu dadi ratu umuré rolikur taun, nanging enggoné dadi ratu ing Yérusalèm suwéné rong taun.

²²Ratu nandangi apa sing ala ing ngarepé GUSTI, kaya sing ditindakké karo Manasé, bapaké. Amon pada nggawé sajèn kurban marang sak okèhé retya tatahan, sing digawé karo Manasé, bapaké lan ngabekti marang kuwi.

²³Nanging piyambaké ora ngasorké uripé ngarepé GUSTI, kaya Manasé, bapaké, malah saya mundak okèh kesalahané.

²⁴Para pegawéné terus pada komplotan nglawan marang piyambaké; Ratu dipatèni ing kratoné.

²⁵Nanging sing pada komplotan nglawan Amon mau terus dipatèni karo rayat ing negara kono lan sakwisé mengkono rayat mau terus ngangkat ratu Yosia, anaké, nggentèni piyambaké.