Read Caribbean Javanese 2 Lelakoné Kraton 36 Bible Online

2 Lelakoné Kraton 36 - Caribbean Javanese bible

2 Lelakoné Kraton 36

¹Rayat ing negara terus ngomongi Yoakas, anaké Yosia lan diangkat dadi ratu ing Yérusalèm nggentèni bapaké.

²Waktu dadi ratu Yoakas umuré telulikur taun, nanging enggoné dadi ratu ing Yérusalèm suwéné telung sasi.

³Ratu terus didunké sangka enggoné dadi ratu ing Yérusalèm karo ratu ing Egipte lan negara kuwi didenda 100 talénta slaka lan sak talénta emas.

⁴Ratu ing Egipte terus ngangkat ratu Elyakim, seduluré Yoakas, ngratoni Yéhuda lan Yérusalèm lan nggantèni asmané dadi Yoyakim. Nanging Yoakas, seduluré mau, ditawan karo Neko, digawa menyang Egipte.

⁵Yoyakim waktu dadi ratu mau umuré selawé taun, nanging enggoné dadi ratu ing Yérusalèm suwéné sewelas taun. Ratu nandangi apa sing ala ing ngarepé GUSTI, Gusti Allahé.

⁶Nebukadnésar, ratu ing negara Babèl, ngluruk perang piyambaké; Yoyakim terus dibanda nganggo ranté tembaga lan digawa menyang Babèl.

⁷Piranti ing griyané GUSTI ana uga sing digawa karo Nebukadnésar menyang Babèl lan disèlèhké ing kratoné ing Babèl.

⁸Sak luwihé sejarahé Yoyakim, sak kabèhé sing njijiki sing ditindakké lan kesalahan sing ketemu ing piyambaké, kuwi kabèh pada ketulis ing kitab bab para ratu ing Israèl lan ing Yéhuda. Yoyakin, anaké, terus dadi ratu nggentèni piyambaké.

⁹Yoyakin waktu dadi ratu kuwi umuré wolulas taun, nanging enggoné dadi ratu ing Yérusalèm, suwéné telung sasi sepuluh dina. Ratu nandangi apa sing ala ing ngarepé GUSTI.

¹⁰Waktu gantiné taun Nebukadnésar kongkonan mboyong piyambaké uga piranti-piranti sing apik-apik ing griyané GUSTI, menyang Babèl lan Sedèkia seduluré bapaké Yoyakin, terus diangkat dadi ratu ing Yéhuda lan Yérusalèm.

¹¹Sedèkia waktu dadi ratu kuwi umuré selikur taun, nanging enggoné dadi ratu ing Yérusalèm suwéné sewelas taun.

¹²Ratu nandangi apa sing ala ing ngarepé GUSTI, Gusti Allahé lan ora ngasorké uripé ing ngarepé nabi Yérémia, sing nemoni karo nggawa préntahé GUSTI.

¹³Lan menèh piyambaké nglawan marang Nebukadnésar, sing wis ngongkon marang piyambaké supaya sumpah kanggo Gusti Allah. Sedèkia ngakokké gitoké lan ngatoské atiné lan ora mratobat marang GUSTI, Gusti Allahé Israèl.

¹⁴Uga sak kabèhé penggedéné ing antarané para imam lan rayat pada bola-bali enggoné ora setia karo tyara nindakké sak okèhé sing njijiki kaya bangsa-bangsa liyané. Griya sing disutyèkké karo GUSTI ing Yérusalèm digawé reget.

¹⁵Senajan mengkono GUSTI, Gusti Allahé para leluhuré, bola-bali enggoné ngélingké lantaran para kongkonané, awit sangka trésnané marang umaté lan panggonan griyané.

¹⁶Nanging wong-wong pada moyoki para kongkonané Gusti Allah mau, ngrèmèhké tembungé Gusti Allah lan pada nggawé gegujon marang para nabiné. Mulané GUSTI terus nesu marang umaté, nganti ora bisa lilih menèh.

¹⁷GUSTI terus nekakké ratuné wong Kasdim, terus nglawan marang wong-wong mau. Ratu ngongkon matèni para nom-noman lanang karo pedang ing griya sutyiné lan ora ngétokké rasa emané marang nom-noman lanang utawa prawan, wong tuwa utawa wong uwanen - kabèh pada dipasrahké karo GUSTI ing tangané.

¹⁸Sak kabèhé piranti griyané Gusti Allah, sing gedé lan sing tyilik uga banda ing griyané GUSTI, bandané ratu lan bandané para penggedéné, kabèh diusungi menyang Babèl.

¹⁹Griyané Gusti Allah diobong, témboké Yérusalèm dirubuhké lan sak kabèhé gapura ing kuta pada diobongi karo geni, terus pada entèk sak kabèhé prabot sing apik-apik.

²⁰Wong sing ijik ana sing ora katekan ing pedang, pada diboyong menyang Babèl, pada didadèkké baturé ratu lan batur para anaké, nganti tekan kraton Pèrsia sing nyekel pangwasa.

²¹Karo mengkono tembungé GUSTI sing diomongké lantaran Yérémia wis kelakon, nganti negara kuwi wis pulih sangka kahanan enggoné nglalèkké taun-taun sabaté, awit negara mau bongkor selawasé sabat nganti wis genep pitung puluh taun.

²²Ing taun sing wiwitané jamané Korèsy, ratu ing negara Pèrsia, GUSTI ngrogoh atiné Korèsy, ratu ing Pèrsia mau - supaya kelakona tembungé sing diomongké lantaran Yérémia - terus ngetokké préntah ing sak ubengé kratoné Korèsy, karo tyara tembung lan ketulis ngabaraké sing mengkéné:

²³“Mengkéné préntahé Korèsy, ratu ing Pèrsia: Sak kabèhé kraton ing bumi wis dikèkké marang aku, karo GUSTI, Gusti Allahé sak ubengé langit. Panjenengané ngongkon marang aku supaya nggawé griya kanggo Piyambaké ing Yérusalèm, ing Yéhuda. Sak panunggalmu sing ijik umaté, GUSTI, Gusti Allahé, supaya nunggal karo wong kuwi - wong-wong kuwi tak lilani mulih!”