Read Caribbean Javanese 2 Lelakoné Kraton 8 Bible Online

2 Lelakoné Kraton 8 - Caribbean Javanese bible

2 Lelakoné Kraton 8

¹Kadung wis rong puluh taun, sak rampungé enggoné nggawé griyané GUSTI lan palèsé déwé,

²Salomo terus nguwati kuta-kuta sing dipasrahké karo Huram marang piyambaké lan ngongkon marang wong Israèl supaya pada manggon ing kono.

³Salomo terus ngluruk menyang ing Hamat-Soba, terus dikalahké.

⁴Sakwisé mengkono ratu nguwati Tadmor ing ara-ara samun lan sakkèhé kuta simpenan, sing didekké ing Hamat.

⁵Uga Bèt-Horon puntuk lan Bèt-Horon legokan dikuwati didadèkké kuta pager watu sing diubengi karo témbok, karo gapura lan slorok kantyingé lawang,

⁶lan uga Baalat lan ing ngendi waé kuta simpenan duwèké Salomo, sak okèhé kuta panggonané suradadu kréta lan kuta-kuta panggonané suradadu jaran lan apa waé sing dikarepké karo Salomo supaya didekké ing Yérusalèm, ing gunung Libanon, utawa ing sak okèhé negara sing dikwasani.

⁷Ing ngendi waé turahé tunggalé wong Hèt, wong Amori, wong Pèris, wong Hèwi lan wong Yébus, sing ora tunggalané Israèl,

⁸ya kuwi turunané para bangsa sing ijik pada manggon ing negara kono, sing ora dientèkké karo wong Israèl kuwi pada diklumpukké karo Salomo, didadèkké wong kerja peksa; kaya mengkono kuwi nganti saiki.

⁹Nanging wong Israèl ora ana sing dikèki penggawéané batur, kuwi pada dadi suradadu, dadi penggedéné suradadu jaran lan dadi komendané suradadu kréta lan suradadu jaran.

¹⁰Iki para penggedé sing nduwur déwé, abdiné Salomo: 250 wong tyatyahé sing pada mréntah rayat.

¹¹Salomo terus ngelih, anaké wadon Parao, sangka kutané Daved menyang ing omahé sing digawé, awit tembungé: “Bojoku aja nganti ana sing manggon ing palèsé Daved, ratuné Israèl, awit ing panggonan sing wis dileboni karo petiné GUSTI kuwi sutyi.”

¹²Salomo terus masrahaké kurban-kurban obongan marang GUSTI ing mesbèhé GUSTI sing wis diedekaké ing ngarepé sebrangé Griya Sutyi,

¹³tyotyok karo apa sing miturut préntahé Moses ditetepaké dadi kurban saben dina, kurban ing dina sabat, ing sasi anyar, lan setaun kaping telu ing dina riyaya, ya kuwi: ing dina Riyaya Roti tanpa ragi, ing dina Riyaya Pungkasané pitung minggu lan ing dina Riyaya Tarup Godong,

¹⁴lan miturut pernatané Daved, bapaké, golongan-golongané para imam pada dikèki kuwajipané déwé-déwé, nanging para wong Lèwi pada dikèki kuwajipané ngidungké pamuji lan ngladèni marang para imam, kuwi saben dina miturut sing ditetepaké ing dina kuwi, lan uga para tukang njaga gapura kanggo golongan-golongané kanggo saben gapura. Awit mengkono préntahé Daved, abdiné Gusti Allah.

¹⁵Wong-wong pada ora nyimpang sangka préntahé ratu ing bab para imam lan para wong Lèwi lan ing bab apa waé, uga ing bab barang-barang.

¹⁶Ing kono penggawéané Salomo wis rampung, wiwit dina pemasangané dasaré griyané GUSTI nganti ing dina rampungé griya kuwi. Kaya mengkono terus wis rampung Griya-Sutyi GUSTI.

¹⁷Salomo terus lunga menyang ing Esion-Geber lan menyang ing Elot, ing pinggir segara, ing negara Edom.

¹⁸Huram kongkonan para abdiné ngirimi prau-prau marang piyambaké lan abdi-abdiné sing ngerti bab segara. Kuwi pada bebarengan karo para abdiné Salomo menyang negara Ofir; ing kono pada njupuk emas 450 talénta, sing terus dipasrahké marang Salomo.