Read Caribbean Javanese Ezra 10 Bible Online

Ezra 10 - Caribbean Javanese bible

Ezra 10

¹Waktu Ezra ndedonga lan ngakoni kesalahan karo nangis lan sendeku ing ngarepé griyané Gusti Allah, ana golongané wong Israèl sing luwih okèh tyatyahé sing pada nglumpuk ing ngarepé, wong lanang lan wong wadon, uga botyah-botyah lan pada nangis banter.

²Terus Sekanya anaké Yehièl, tunggalé turunané Elam, ngomong marang imam Ezra: “Kula wis pada nandangi penggawé sing ora setia marang Gusti Allah kula, awit kula pada bebojoan karo wong wadon bangsa ing tanah kéné. Nanging saiki ya ijik ana pengarep-arep kanggo Israèl.

³Awit kuwi hayuk saiki pada nganakké perjanjian karo Gusti Allah kita, yèn bakal nglungakké wong wadon kuwi kabèh uga anak-anaké sing dilairké, miturut pinuntun sampéyan lan para wong sing gemeter wedi marang pepakoné Allah kita, lan terus pada tumindaka miturut ing angger-anggeré Torèt.

⁴Hayuk kula njaluk ngadek, awit perkara kuwi dadi kuwajipan sampéyan. Kula pada bakal ngréwangi sampéyan. Supaya gelem nguwatké ati sampéyan lan terus gelem nandangi!”

⁵Ezra terus ngadek lan njupuk sumpahé para pengarepé imam, para wong Lèwi, lan wong Israèl sak bangsa kabèh, yèn bakal pada nglakoni miturut ing tembung kuwi mau; terus ya pada sumpah.

⁶Sakwisé kuwi imam Ezra ngadek mundur sangka ngarepé omahé Gusti Allah, terus mlebu ing kamaré Yohanan anaké Elyasib, lan turu ing kono, ora mangan roti lan ora ngombé banyu, awit ijik susah jalaran sangka penggawéné para wong buwangan sing ora setia mau.

⁷Ing kono terus ana pekabaran sing dikabarké ing tanah Yéhuda lan Yérusalèm, marang sak kabèhé wong sing mentas sangka pembuwangan, supaya pada nglumpuk ing Yérusalèm.

⁸Sapa sing ora mara sak njeruhné telung dina, miturut putusané para penggedéné lan para pinituwa, sembarang duwèké bakal dijupuki lan awaké déwé dipisahké sangka tunggalané para wong sing bali sangka pembuwangan.

⁹Para wong lanang ing tanah Yéhuda lan Bényamin terus pada nglumpuk kabèh ing Yérusalèm sak suwéné telung dina, ya kuwi nalika ing sasi sanga tanggal kaping rong puluh. Rayat kabèh pada lungguh ing platarané omahé Gusti Allah, pada ndredek awit sangka perkara mau lan awit sangka udan deres.

¹⁰Ezra terus ngadek lan ngomong marang wong kabèh kuwi: “Kowé wis pada nglakoni penggawé sing ora setia, awit pada omah-omah karo wong wadon bangsa liyané, lan awit sangka kuwi kowé pada nambahi kesalahané wong Israèl.

¹¹Nanging saiki pada nelangsaa ing ngarepé GUSTI, Gusti Allahé para leluhurmu lan pada nglakonana sing dadi senengé karepé, pada pisaha karo wong-wong ing tanah iki lan karo wong wadon bangsa liyané kuwi.”

¹²Wong sak pasamuan kabèh terus pada nyauri karo swara sing banter: “Wis dadi kuwajipan kula pada nandangi kaya sing sampéyan omongaké kuwi.

¹³Nanging wong-wong kuwi okèh banget tyatyahé tur saiki ijik waktuné udan, nganti wong pada ora betah ngadek ing njaba. Apa menèh penggawéan kuwi ora bisa rampung njeruhné sedina rong dina, awit bab kuwi kula wis pada nandangi panerak okèh.

¹⁴Ya bèn para penggedé kita waé sing pada makili sak pasamuan kabèh, nanging kabèh wong ing kuta-kutané sing ngrabi wong duduk sak bangsa ya bèn pada ngadep ing waktu-waktu sing wis ditemtokké, dituntun karo para pinituwané kuta lan para rèkter, nganti mulat-mulat nesuné Gusti Allah, awit sangka perkara kuwi, diadohké sangka kita.”

¹⁵Mung Yonatan, anaké Asaèl, Yahseya anaké Tikwa, sing pada ngadek mbantah rembukan sing mengkono kuwi, dibantu karo Mesulam lan Sabetai, wong Lèwi.

¹⁶Nanging para wong sing bali sangka pembuwangan kuwi pada nglakoni mengkono. Ezra terus milih wong, ya kuwi para pengarepé kulawargané, siji-sijiné kanggo brayaté, kabèh pada diarani jenengé. Kuwi waktu sasi sepuluh tanggal sepisan terus pada ngumpul nitipriksa perkara kuwi.

¹⁷Lan enggoné pada ngrampungké panemuné marang kabèh wong sing wis pada ngepèk bojo wong liyané bangsa kuwi waktu sasi kaping pisan tanggal kaping pisan.

¹⁸Tunggalé turunané para imam sing ketemu ngrabi wong wadon bangsa liyané kuwi tunggalé turunané Yésua anaké Yosadak lan para seduluré: Maaséya, Elièser, Yarib lan Gedalya.

¹⁹Karo nyekel tangan wong-wong mau pada janji arep nglungakké bojoné. Pada masrahaké wedus gèmbèl lanang siji sangka kumpulané kéwan-kéwan kanggo kurban tebusané dosa awit sangka kesalahané.

²⁰Sangka turunané Imèr: Hanani lan Sebaja;

²¹sangka turunané Harim: Maaséya, Elia, Semaya, Yehièl lan Uzia;

²²sangka turunané Pashur: Elyoenai, Maaséya, Ismaél, Natanaèl, Yosabad lan Elasa.

²³Sangka wong turunané Lèwi: Yosabad, Simèi, Kelaya (ya kuwi Kelita), Pétahya, Yéhuda lan Elièser.

²⁴Sangka para penyanyi: Elyasib. Sangka golongané para penjaga-gapura: Salum, Telem lan Uri.

²⁵Sangka para wong Israèl liyané: sangka turunané Paros: Ramya, Yesia, Malkia, Miyamin, Eléazar, Malkia lan Benaya.

²⁶Sangka turunané Elam: Matanya, Sakaria, Yehièl, Abdi, Yérémot lan Elia.

²⁷Sangka turunané Satu: Elyoenai, Eyasib, Matanya, Yérémot, Sabad lan Asisa.

²⁸Sangka turunané Babai: Yohanan, Hananya, Sabai lan Altai.

²⁹Sangka turunané: Mesulam, Maluk, Adaya, Yasub, Seal lan Yérémot.

³⁰Sangka turunané pahat-Moab: Adna lan Kelal, Benaya, Maaséya, Matania, Bésaleèl, Binui lan Manasé.

³¹Sangka turunané Harim: Elièser, Yisia, Malkia, Semaya, Siméon,

³²Bényamin, Maluk lan Semarya.

³³Sangka turunané Hasum: Matnai, Matata, Sabad, Elifèlèt, Yeremai, Manasé lan Simèi.

³⁴Sangka turunané Bani: Maadai, Amram, Uel,

³⁵Benaya, Bedeya, Kelulu,

³⁶Wanya, Merémot, Elyasib,

³⁷Matanya, Matnai lan Yaasai.

³⁸Sangka turunané Binui: Simèi,

³⁹Selemya, Natan, Adaya,

⁴⁰Maknadbai, Sasai, Sarai,

⁴¹Asareel, Selemya, Semarya,

⁴²Salum, Amarya lan Yosèf.

⁴³Sangka turunané Nébo: Yeiel, Matitya, Sabad, Sebina, Yadai, Yoèl lan Benaya.

⁴⁴Kuwi kabèh wis pada kawin karo wong wadon liyané bangsa; bojoné kuwi pada ditundung lan anak-anaké.