Read Caribbean Javanese Ezra 5 Bible Online

Ezra 5 - Caribbean Javanese bible

Ezra 5

¹Nalika semono ana nabi loro, ya kuwi nabi Hagai lan Sakaria, anaké Ido, nggelarké tembung atas asmané Gusti Allahé Israèl, marang wong-wong sing manggon ing Yéhuda lan ing Yérusalèm.

²Ing waktu semono Sérubabèl, anaké Séaltièl lan imam Yésua, anaké Yosadak mbangun griyané Gusti Allah ing Yérusalèm. Wong mau pada diamping-ampingi lan dibantu karo para nabiné Gusti Allah.

³Nanging ing waktu semono Tatnai, bupati ing sabrangé kuloné kali Efrat, nekani bebarengan karo Syetar-Bosnai lan kantya-kantyané, lan mengkéné tembungé marang para wong mau: “Sapa sing ngekèki préntah marang kowé mbangun omah iki lan ngrampungké témbok iki?”

⁴Terus pada ditakoni uga: “Sapa jenengé wong sing pada ngedekké bangunan iki?”

⁵Nanging mripaté Gusti Allah tansah weruh para pinituwané wong Ju, terus ora dipeksa lèrèn karo wong-wong kuwi, nganti perkara iki diomongké marang Darius, lan wis ana jawaban kanggo perkara iki.

⁶Ing ngisor iki turunané layang sing dikabarké marang Darius sangka Tatnai, bupati ing kuloné kali Efrat karo Syetar-Bosnai lan kantya-kantyané, para penggedé bawah kuloné kali Efrat.

⁷Wong-wong mau pada ngekèki laporan ketulis mengkéné: “Ngadep ing ngarepé ratu Darius, tentrem rahayu!

⁸Supaya dingertèni karo ratu, yèn kita wis pada teka ing negara Yéhuda, ing griyané Gusti Allah sing Mahaluhur. Omah kuwi ijik dibangun nganggo watu sing gedé-gedé lan témboké dilapis karo kayu lan anggèné nindakké penggawéan kuwi karo tenan, lan kerjanané ditandangi lantyar.

⁹Para pinituwa ing kono terus pada kita takoni lan mengkéné tembung kita: Sapa sing mréntahi kowé mbangun omah iki lan ngrampungké témbok iki?

¹⁰Apa malih uga pada kita takoni jeneng-jenengé, supaya kenènga kita pasrahké ing ngarepé ratu, karo nyateti jenengé sing pada dadi pinituwané.

¹¹Wong iki terus pada nyauri marang kita, tembungé mengkéné: Kita kuwi para abdiné Gusti Allahé langit lan bumi, nanging kita mbangun malih omah sing wis diedekaké pirang-pirang taun sak durungé kuwi, diedekaké lan dirampungké karo salah sijiné ratuné Israèl sing gedé.

¹²Nanging awit para leluhur kita pada nangèkké nesuné Gusti Allahé langit, mulané terus dipasrahké marang Nebukadnésar, ratu ing Babèl, bangsa Kasdim, sing ngentèkké omah iki lan wongé pada diboyongi marang negara Babèl didadèkké tawanan.

¹³Nanging ing taun kaping pisan jamané Korèsy, ratu ing Babèl, Korèsy terus mréntahké supaya mbangun griyané Gusti Allah kuwi.

¹⁴Malah kabèh pirantiné griyané Gusti Allah sing rupa emas lan slaka, sing sak durungé dijukuki Nebukadnésar sangka griya sutyi ing Yérusalèm terus dilebokké ing griya sutyi ing Babèl, kuwi uga pada dijikuk Korèsy sangka griya sutyi ing Babèl lan dipasrahké marang wong sing jenengé Sèsbasar sing wis diangkat dadi bupati.

¹⁵Kuwi dipréntah mengkéné: Piranti iki pada jukukana terus budala lan dèkèkna ing griya sutyi ing Yérusalèm, uga griyané Gusti Allah kuwi dipréntahké supaya dibangun menèh ing panggonané sing lawas.

¹⁶Bupati Sèsbasar kuwi mau terus teka lan masang dasaré griyané Gusti Allah ing Yérusalèm, lan wiwit waktu kuwi nganti tekan saiki anggèné dibangun, mung waé durung rampung.

¹⁷Mulané yèn ana kepénginan karepé ratu, supaya anaa préntah ditliti ing gedong banda duwèké ratu ing Babèl kono, apa tenan ana préntahé Korèsy, supaya mbangun griyané Gusti Allah ing Yérusalèm iki. Sak terusé putusané ratu kanggo perkara kuwi tenan terus dikèkké marang kita.”