Read Caribbean Javanese Néhémia 3 Bible Online

Néhémia 3 - Caribbean Javanese bible

Néhémia 3

¹Imam gedé Elyasib terus tandang ing nggawé karo sedulur-seduluré para imam, pada mbangun gapura Wedus Gèmbèl, disutyèkké lan dikèki lawang-lawangé; enggoné nyutyèkké nganti tekan ing menara Méa lan menara Hananéèl.

²Ing sandingé kuwi sing pada mbangun wong Yériko, lan ing sandingé menèh sing mbangun Sakur, anaké Imri.

³Gapura Iwak dibangun karo turunané Senaa, dipasang balok-balok, lawang-lawang, kantyingan lan slorok kantyingé lawang.

⁴Ing sandingé kuwi sing mbangun Merémot, anaké Uria, anaké Hakos, lan ing sandingé kuwi sing mbangun Mesulam, anaké Bérékya, anaké Mesésabeèl, nanging ing sandingé kuwi sing mbangun Sadok, anaké Baana,

⁵lan ing sandingé menèh sing mbangun wong-wong ing Tékoa. Nanging para pengarepé pada ora gelem ngekèki bahuné kanggo penggawéané bendarané.

⁶Gapura Sing lawas kuwi dibangun karo Yoyada, anaké Paséah lan Mesulam, anaké Besoja, dipasang balok-balok, lawang-lawang, kantyingan lan slorok kantyingé lawang.

⁷Ing sandingé kuwi sing pada mbangun Melatya wong Gibéon lan Yadon wong Méronot, karo wong Gibéon lan ing Mispa, ing panggonané bupati ing sabrangé kali Efrat.

⁸Ing sandingé kuwi sing mbangun Yizhar, anaké Harhaya, sakwijiné tukang emas. Ing sandingé menèh sing mbangun Hananya, tukang njebati, enggoné mbangun Yérusalèm kuwi nganti tekan ing témbok Amba.

⁹Ing sandingé menèh sing mbangun Réfaya, anaké Hur, sing nggawa pangwasa separoné pangwasané Yérusalèm.

¹⁰Ing sandingé menèh sing mbangun Yédaya, anaké Harunaf ing ngarepé omahé déwé. Lan ing sandingé menèh sing mbangun Hatus, anaké Hasabnéya.

¹¹Sak panduman menèh dibangun karo Malkia, anaké Harim lan Hasub, anaké pahat-Moab uga menara Prapèn.

¹²Ing sandingé kuwi sing mbangun Salum, anaké Halohèsy, sing nggawa pangwasa ing separoné pangwasané Yérusalèm, uga anak-anaké wadon.

¹³Gapura Legokan dibangun karo Hanun lan wong Sanoah. Enggoné pada mbangun nganggo dipasang lawang-lawang karo kantyingan lan slorok kantyingé lawang, karo menèh pada ndandani témbok 1000 éluh nganti tekan ing gapura Pawuhan.

¹⁴Gapura Pawuhan kuwi didandani karo Malkia, anaké Rekab, sing nggawa pangwasa ing bawah Bèt-Kerem. Enggoné mbangun nganggo dipasang lawang-lawang, kantyingan lan slorok kantyingé lawang.

¹⁵Gapura Sumber kuwi dibangun karo Salum, anaké Kolkossé, sing nggawa pangwasa ing bawah Mispa. Enggoné mbangun nganggo dipayoni lan dipasang lawang-lawang, kantyingan lan slorok kantyingé lawang. Kejaba kuwi uga ndandani témboké blumbang tadah banyu ilèn-ilèn, sing tekan ing sak tyedaké taman kraton, nganti tekan ing undak-undakan sing medun sangka kutané Daved.

¹⁶Kejaba kuwi sing mbangun Néhémia, anaké Asbuk, sing nggawa pangwasa ing separoné bawah Bèt-Sur, nganti tekan ing kuburané Daved lan tekan ing blumbang gawéan, lan ing omahé para penggedéné suradadu.

¹⁷Kejaba kuwi sing pada mbangun wong Lèwi, ya kuwi Rehum, anaké Bani lan ing sandingé kuwi sing mbangun Hasabia, sing nggawa pangwasa separoné bawah Kéhila, kanggo pangwasané déwé.

¹⁸Kejaba kuwi sing mbangun para seduluré, ya kuwi Benui, anaké Henabad, sing nggawa pangwasa ing bawah separoné Kéhila.

¹⁹Ing sandingé kuwi sing mbangun sak panduman menèh Eser, anaké Yésua, sing nggawa pangwasa ing Mispa, ing ngarepé unggah-unggahan menyang ing gedong piranti perang, ing sak tyedaké Pojok.

²⁰Kejaba kuwi sing mbangun sak panduman menèh Baruk, anaké Sabai, wiwit ing Pojok tekan ing lawangé omahé imam gedé Elyasib.

²¹Kejaba kuwi sing mbangun sak panduman menèh Merémot, anaké Uria, anaké Hakos, wiwit ing lawangé omahé imam gedé Elyasib tekan ing pojokané omahé.

²²Kejaba para imam, wong-wong sing mbangun sangka legokan Yordan.

²³Sakwisé kuwi wong sing pada mbangun Bényamin lan Hasub ing ngarepé omahé. Sakwisé kuwi sing mbangun Asarya, anaké Maaséya, anaké Ananya sandingé omahé.

²⁴Sakwisé kuwi sing mbangun sak panduman menèh Binui, anaké Hanadad sangka omahé Asarya mau tekan Pojok kéné lan Pojok liyané.

²⁵Palal, anaké Uzai kuwi mbangun ing ngarepé Pojok lan ing ngarepé menara sing duwur lan metongol sangka kratoné ratu, tyedak ing platarané penjagan. Ing sandingé sing mbangun Pedaya, anaké Paros

²⁶nganti tekan ing ngarepé gapura Banyu, ing sisih wétan, lan ing ngarepé menara sing metongol. Nanging para abdi ing griya sutyi pada manggon ing Ofèl.

²⁷Kejaba Pedaya sing pada mbangun sak panduman menèh wong Tékoa, wiwit ing ngarepé menara gedé sing metongol mau nganti tekan ing témboké Ofèl.

²⁸Wiwit ing gapura Jaran sing pada mbangun kuwi para imam, siji-sijiné ing ngarepé omahé déwé.

²⁹Sakwisé kuwi sing mbangun Sadok, anaké Imèr, ing ngarepé omahé. Ing sandingé sing nandangi ing nggawé Semaya, anaké Sekanya, sing dadi penjaga-gapura wétan.

³⁰Ing sandingé sing mbangun sak panduman menèh Hananya, anaké Selèmya lan Hanun, anaké Salaf sing kaping enem. Ing sandingé sing mbangun Mesulam, anaké Bérékya ing ngarepé kamaré.

³¹Ing sandingé kuwi sing mbangun Malkia, sakwijiné tukang emas, nganti tekan ing omahé para abdi ing griyané Gusti Allah lan para tukang dagang, ing ngarepé gapura Tyatyah jiwa lan tekan ing kamar panggungan ing pojokan.

³²Terus ing antarané gedong panggungan ing pojok mau lan gapura Wedus Gèmbèl kuwi sing mbangun para tukang emas lan para pedagang.