Read Caribbean Javanese Ester 5 Bible Online

Ester 5 - Caribbean Javanese bible

Ester 5

¹Bareng wis tekan telung dinané ratu wadon Ester terus nganggo klambiné kraton, terus ngadek ing plataran njeruh madep menyang kraton, ratu mbeneri njagong ing damparé kraton ing palèsé.

²Bareng ratu weruh ratu wadon ngadek ing plataran, ratu wadon Ester mau olèh kawelasané ratu, nganti diitungaké tekené kraton emas sing digawa, ratu wadon Ester terus nyedaki ndemèk putyuké teken kuwi.

³Ratu terus ngomong: “Hé ratu wadon Ester, apa karepmu, lan apa penjalukmu? Mesti bakal tak turuti, senajan nganti separoné kraton.”

⁴Semauré ratu wadon Ester: “Yèn ana senengé ratu, ratu supaya teka ing pésta sing bakal kula anakaké kanggo sampéyan ing dina kuwi, karo malih Haman supaya dililani mèlu.”

⁵Préntahé ratu: “Haman omongana supaya gelis-gelis teka, supaya nuruti penjaluké ratu wadon Ester.” Ratu terus teka ing péstané ratu wadon Ester ditutké karo Haman.

⁶Sak tengah-tengahé ombèn-ombèn anggur ratu terus takon marang ratu wadon Ester: “Penjalukmu apa, mesti kowé dikèki. Karepmu apa mesti keturutan, senajan nganti separoné kraton.”

⁷Ratu wadon Ester terus ngomong: “Pengarep-arep lan penjaluk kula, ya kuwi:

⁸yèn kula olèh kawelasané ratu, lan yèn dililani ratu ngekèki kula sing dadi pengarep-arep kula, lan nindakké sing dadi penjaluk kula, supaya ratu gelem teka ing pésta sing bakal kula anakaké malih, lan Haman supaya dililani mèlu, sésuk ésuk kula bakal ngomongké tembung kula.”

⁹Ing dina kuwi Haman mulih karo bungah lan seneng atiné. Nanging bareng Haman mau weruh Mordekhai ing gapurané kraton, ora ngadek lan ora obah ngurmati ing ngarepé Haman, atiné Haman panas banget marang Mordekhai.

¹⁰Nanging Haman ngempet nesuné mau, lan sakwisé mulih ing omahé, terus kongkonan nglumpukké para kantya lan Seresy bojoné.

¹¹Haman nyritakké bab gedéné kasugihané lan kabèh anaké lanang, uga sak kabèhé kaluhurané, sing dikèkké karo ratu, lan enggoné diangkat ngungkuli para penggedéné lan para abdiné ratu kabèh.

¹²Haman terus ngomong menèh: “Apa menèh ratu wadon Ester enggoné ngomongi ratu marang pésta sing dianakké, ora karo nyeluk wong liyané siji-sijia kejaba mung aku déwé lan aku dityeluk menèh sésuk, mèlu bareng karo ratu.

¹³Senajan mengkono kuwi kabèh ora maédahi kanggo aku, sak suwéné aku ijik weruh wong Ju Mordekhai sing lungguh ing gapurané kraton.”

¹⁴Seresy bojoné, uga para kantyané kabèh pada bebarengan ngomong: “Apiké ngangkana wong nggawé tyagak kanggo nyunduki, sing duwuré sèket éluh, lan sésuk ésuk sampéyan ngomong marang ratu, supaya Mordekhai disunduki ing tyagak kuwi. Sakwisé kuwi, disenengké ing ati enggèn sampéyan mèlu ratu menyang pésta.” Perkara kuwi dipikir apik karo Haman, terus ngongkon nggawé tyagak kanggo nyunduki.