Read Caribbean Javanese Pangentasan 1 Bible Online

Pangentasan 1 - Caribbean Javanese bible

Pangentasan 1

¹Iki jenengé para anaké Israèl sing pada teka ing negara Egipte, tekané mèlu Yakub; déwé-déwé karo brayaté:

²Rubèn, Siméon, Lévi lan Yéhuda,

³Isakar, Sébulon lan Bényamin,

⁴Dan lan Naftali, Gad lan Asyèr.

⁵Turunané Yakub kuwi kabèh ana pitung puluh, nanging Yosèf wis ing negara Egipte.

⁶Yosèf terus mati, uga kakang-kakangé lan kabèh barakané.

⁷Wong Israèl terus pada nduwé turunan nganti ora kena diitung tyatyahé; mundak dadi okèh banget, nganti ngebaki negara.

⁸Terus ana ratu anyar sing ngwasani negara Egipte, sing ora ngerti bab Yosèf.

⁹Kuwi terus ngomong marang para rayaté: “Bangsa Israèl kuwi okèh banget, tyatyahé nganti ngungkuli kita.

¹⁰Mulané hayuk pada golèk akal, supaya aja nganti tambah okèh menèh lan yèn ana peperangan aja nganti ngréwangi mungsuh kita, lan merangi kita, terus lunga sangka negara kéné.”

¹¹Mulané terus ndapuk mandor-mandor, ya kuwi wong sing dikongkon mandori lan nindes wong Israèl karo tandang penggawéan peksa, dipréntahké ngedekké kuta simpenan Pitom lan Ramsès kanggo Parao.

¹²Nanging senajan penindesé saben dina mundak abot, nanging malah mundak tambah lan tangkar tumangkar, nganti wong pada dadi sengit marang wong Israèl.

¹³Wong Egipte enggoné ngekèki penggawéan marang wong Israèl terus karo peksa,

¹⁴uripé digawé pait karo penggawéan sing abot banget, ya kuwi nggarap lempung lan nggawé bata, penggawéan werna-werna ing ara-ara: sak rupané penggawéan sing dikèkké wong Egipte nganggo pulasara.

¹⁵Ratu Egipte uga mréntah marang dukun-dukun bayi sing nulungi wong wadon Ibrani, salah sijiné jenengé Sifra lan liyané Puah, tembungé:

¹⁶“Yèn kowé nulungi wong wadon bangsa Ibrani sing nglairké anak, kowé kudu ngematké, yèn bayiné lair lanang, gelis patènana, yèn wadon kena tetep urip.”

¹⁷Nanging dukun-dukun bayi mau wedi marang Gusti Allah, mulané ora manut préntahé ratu Egipte, dadi bayi-bayiné sing lanang ya pada diuripké.

¹⁸Ratu ing Egipte terus nyeluk dukun-dukun bayi mau lan pada ditakoni: “Kenèng apa kowé nandangi mengkono, ijik nguripké bayi-bayiné lanang?”

¹⁹Semauré dukun-dukun bayi kuwi marang Parao: “Yèn wong wadon Ibrani kuwi ora pada karo wong wadon Egipte, pada kuwat-kuwat; sak durungé dukuné teka, bayiné wis lair.”

²⁰Awit sangka kuwi Gusti Allah terus ngekèki kawelasan marang dukun-dukun bayi mau, dadiné bangsa kuwi mundak tambah okèh menèh nganti tikel-matikel.

²¹Awit dukun-dukun bayi kuwi pada ngabekti marang Gusti Allah, mulané pada diberkahi déwé-déwé karo anak-anak.

²²Parao terus mréntah marang para rayaté kabèh: “Sakkèhé anaké wong Ibrani sing lair lanang pada tyemplungna ing kali Nil, nanging sing wadon kuwi aja kok patèni.”