Read Caribbean Javanese Pangentasan 15 Bible Online

Pangentasan 15 - Caribbean Javanese bible

Pangentasan 15

¹Ing kono Moses lan wong Israèl pada memuji kidung kanggo GUSTI, mengkéné: “Tak ngidung kanggo GUSTI, awit gedé kaluhuran-Né jaran lan sing numpaki pada dityemplungké segara.

²GUSTI kuwi kekuwatanku lan masmurku, sing dadi keslametanku. Panjenengané kuwi Gusti Allahku sing tak puji-puji, Panjenengané kuwi Gusti Allahé bapaku sing tak luhurké.

³GUSTI kuwi penggedéné perang; GUSTI, ya kuwi asma-Né.

⁴Krétané Parao lan balané dityemplungké segara, para penggedéné sing pilihan pada diklelepké ing segara Abang.

⁵Pada ketutupan ing segara gedé, kelep kaya waé watu ing banyu sing jeru.

⁶Duh GUSTI, tangané Gusti tengen kuwi kamulyan awit sangka pangwasa Panjenengan duh GUSTI, tangané Gusti tengen kuwi ngremuk mungsuh.

⁷Awit sangka kaluhuran Panjenengan sing gedé, Gusti ngembrukné sing pada nglawan Panjenengan; Gusti ngetyulké geni memala Panjenengan sing mangan wong-wong mau kaya bonggol gandum.

⁸Karo napasé irung Panjenengan, banyu nganti pada numpuk-numpuk kabèh ilèn-ilèn pada ngadek jejek kaya bendungan. Banyu gedé pada kentel ing tengahé segara.

⁹Tembungé mungsuh: Tak uberé, tak dum rayahané; hawa nesuku tak sokké marang wong-wong kuwi, pedangku tak sudukké; bakal pada tak entèkké karo tanganku.

¹⁰Gusti terus nekakké lésus, nganti pada ketutupan ing segara; pada kelep kaya tembaga ing banyu sing ngidap-idapi.

¹¹Duh GUSTI, tunggalé para allah sapa sing madani Panjenengan; sapa sing kaya Panjenengan, mulya awit sangka kesutyiané Panjenengan, medèni awit sangka penggawéané Panjenengan sing kesuwur? Panjenengan nindakké mujijat.

¹²Panjenengan megarké tangan tengen Panjenengan; terus kabèh diuntal karo bumi.

¹³Karo kawelasané Panjenengan, nuntun umat tebusan Panjenengan; karo kekuwatan Gusti nuntun menyang ing omahé Gusti sing sutyi.

¹⁴Para bangsa pada krungu nganti pada gemeter; mengkono uga sing pada manggon ing negara Filistèn pada krasa wedi.

¹⁵Ing waktu kuwi para penggedé ing Edom pada gègèr, para pangwasa ing Moab pada katekan wedi; wong sak isiné negara Kanaan pada gemeter.

¹⁶Pada katekan giris lan wedi, nganti kaku kaya watu awit sangka gedéné tangané Panjenengan, duh GUSTI. Ya nganti teka ing sabrangan umaté Panjenengan, nganti nyabrang umaté Panjenengan dadi duwèké Panjenengan déwé.

¹⁷Panjenengan nggawa lan Panjenengan tandur ing gunung duwèké Panjenengan déwé, ing panggonan sing Panjenengan panggoni dadi omahé Gusti, duh GUSTI; ing panggonan sutyi gawéané tangané Panjenengan, duh GUSTI.

¹⁸GUSTI sing ngwasani langgeng ing sak lawasé.”

¹⁹Waktu jarané Parao lan krétané kabèh balané sing numpak jaran pada mlebu ing segara, terus GUSTI nangkepké banyuné segara menèh, nganti pada kelep, nanging wong Israèl pada mlaku ing gasikan ing tengahé segara.

²⁰Ing kono Miryam, nabiné wadon, seduluré Harun, terus nggawa terbangan, ditutké sakkèhé wong wadon karo nabuh terbangan lan pada njogèt

²¹Lan Miryam terus ngidung, uniné: “Pada ngidung kanggo GUSTI, awit gedé kaluhuran-Né, jaran lan sing numpaki pada dijeguraké ing segara.”

²²Sakwisé mengkono Moses terus mbudalké wong Israèl sangka segara Abang menyang ing ara-ara samun Sur; enggoné mlaku ing ara-ara samun nganti telung dina ora olèh banyu.

²³Terus pada tekan ing Mara, nanging banyu ing Mara kono ora kena diombé, awit pait, mulané panggonan kono kuwi diarani Mara.

²⁴Wong okèh terus pada nggrundel marang Moses, takon: “Bakal ngombé apa kita?”

²⁵Moses terus sambat marang GUSTI, lan GUSTI terus nduduhi sakwijiné kayu; kuwi terus dityemplungké ing banyu mau, sak nalika banyuné kena diombé. Ing kono terus pada dikèki aturan lan pernatan lan pada dityoba karo GUSTI,

²⁶tembungé: “Yèn kowé pada ngrungokké marang dawuhé GUSTI, Gusti Allahmu karo temen-temen, lan nglakoni apa sing bener ing ngarsa-Né, lan mbangun turut marang préntahé, uga tansah nindakké sakkèhé sing ditetepaké, mesti kowé ora bakal Tak tibani lelara sing wis Tak tibakké marang wong Egipte, awit Aku iki GUSTI sing maraské kowé.”

²⁷Sakwisé mengkono terus pada tekan ing Elim, ing kono ana sumber rolas lan wit kurma pitung puluh, terus pada lèrèn ing sandingé sumber mau.