Read Caribbean Javanese Pangentasan 23 Bible Online

Pangentasan 23 - Caribbean Javanese bible

Pangentasan 23

¹“Kowé aja nyebar kabar goroh. Aja ngréwangi wong sing salah lan gelem dadi seksi sing ora bener.

²Kowé aja mèlu-mèlu wong okèh nglakoni ala, lan enggonmu nglairké paseksi kanggo sakwijiné perkara aja mèlu-mèlu wong okèh kanggo ndoyongké pengadilan.

³Ya aja mbédak-mbédakké perkaran ing pengadilan, senajan kanggo wong mlarat.

⁴Yèn kowé nemoni sapiné utawa kimaré mungsuhmu sing kesasar, kudu gelis-gelis kok balèkké marang sing nduwé.

⁵Yèn kowé weruh kimaré mungsuhmu ambruk awit kabotan momotan, kowé aja sungkan nulungi, kowé kudu ngréwangi mbungkar momotané karo éklas.

⁶Kowé aja ngénggak-ngénggoké haké wong mlarat ing sak njeruhné perkarané.

⁷Kowé ngedohana tumindak ora pantes; wong sing ora salah lan sing bener aja kok patèni, awit Aku ora bakal mbenerké wong sing salah.

⁸Kowé aja nampani beselan, awit beselan kuwi ndadèkké lamuré wong melèk, lan mbingungké perkarané wong-wong sing bener.

⁹Wong mantya aja kok tindes, awit kowé ya wis pada ngerti marang rasané atiné wong mantya, awit kowé wis pada ngalami dadi wong mantya ing negara Egipte.

¹⁰Sak njeruhné nem taun kowé nyebar lemahmu lan ngunduh pametuné,

¹¹nanging ing taun sing kaping pitu kudu kok lèrènké, lan kowé kudu ninggal mengkono waé, supaya wong sing mlarat pada bisa mangan, lan turahé kuwi bèn dipangani karo kéwan-kéwan ing alas. Mengkono uga kanggo kebonmu anggur lan witmu saitun.

¹²Nem dina kowé nglakonana penggawéanmu, nanging ing dina kaping pitu kowé kudu lèrèn, supaya sapi lan kimarmu pada bisa ngasuh; lan supaya anaké baturmu lan wong sing mantya pada lèrèn.”

¹³“Kowé kudu ngati-ati ing bab sembarang sing wis Tak préntahké marang kowé: kowé aja nyebut jenengé allah liyané, jenengé aja nganti metu krungu sangka tutukmu.

¹⁴Setaun kaping telu kowé kudu nganakké riyaya kanggo Aku.

¹⁵Kowé netepana Riyaya Roti tanpa ragi; pitung dina suwéné kowé mangana roti tanpa ragi kaya sing wis Tak omongké marang kowé, ing waktu sing wis ditemtokké ing sasi Abib, awit waktu ing sasi kuwi enggonmu metu sangka negara Egipte; nanging aja ana sing ngadep ing ngarep-Ku karo ora nggawa apa-apa.

¹⁶Riyaya Panèn, ya riyaya wiwitan pametuné enggonmu nyebar ing tegalan, kuwi uga tetep kok anakké, mengkono uga riyaya unduh-unduh, yèn tutupé taun, sak bubaré enggonmu ngunduhi pametuné kebonmu.

¹⁷Setaun nganti kaping telu wongmu sing lanang kudu pada ngadep marang ing ngarepé GUSTI, Gustimu.

¹⁸Enggonmu masrahké getihé kurban sing dibelèh sing dipasrahké marang Aku, kuwi aja nganti tyampuran apa waé sing karo ragi, uga menèh gajihé kurban riyaya sing dipasrahké marang Aku aja nganti nginep nganti ésuké.

¹⁹Sing apik déwé pametuné lemahmu kuwi ladèkna ing omahé GUSTI, Gusti Allahmu. Enggonmu aja nggodok dagingé tyempé kuwi nganggo susuné baboné.”

²⁰Wis, Aku bakal ngutus mulékat budal ing ngarepmu, perlu njaga mlakumu ing dalan lan nuntun mlakumu menyang panggonan sing Tak tyepakké.

²¹Kowé sing ati-ati ing ngarepé lan rungokké préntah-préntahé, kowé aja gawé duraka marang Panjenengané, awit panerakmu ora bakal dingapura, awit asma-Ku ing njeruhné.

²²Nanging yèn kowé temen-temen manut préntah-préntahé, lan nglakoni sembarang sing Tak préntahké, Aku bakal nglawan mungsuhmu lan nglawan lawanmu.

²³Aku bakal ngutus mulékaté budal ing ngarepmu, lan nuntun mlakumu menyang negarané bangsa Amori, bangsa Hèt, bangsa Fèris, bangsa Kanaan, bangsa Hèwi lan bangsa Yébus, lan para bangsa kuwi bakal Tak-entèkké.

²⁴Kowé aja sujut utawa ngabekti marang allahé lan aja niru penggawéné, malah pada kudu kok rubuhna babar pisan retya-retyané brahala gawèané.

²⁵Nanging kowé kudu ngabekti marang GUSTI, Gusti Allahmu, nganti roti lan banyuné bakal kaberkahan lan Aku bakal ngedohké lara sangka tengahmu.

²⁶Ing negaramu bakal ora ana wong wadon sing kluron utawa sing gabuk. Lan umuré bakal Tak jangkepi.

²⁷Rasa wedi marang Aku bakal Tak kirimaké ndisiki kowé, Aku bakal ndadèkké bingung sakkèhé wong sing kok parani, lan sakkèhé mungsuhmu bakal Tak gawé mlayu ninggal kowé.

²⁸Uga Aku bakal ngetyulké swara tabuhan ndisiki kowé, kuwi bakal nundungi wong Hèwi, wong Kanaan lan wong Hèt sangka ngarepmu.

²⁹Enggon-Ku nundungi bangsa-bangsa kuwi sangka ngarepmu ora sak njeruhné setaun, supaya negara kuwi aja terus sepi, lan kewan buron alasan aja nganti mundak okèh ngungkuli tyatyahmu.

³⁰Enggon-Ku bakal nundungi bangsa kuwi sangka ngarepmu sangka setitik mbaka setitik, nganti kowé wis pada nduwé anak-putu okèh lan bisa nduwèni negara kuwi.

³¹Aku bakal netepaké tapel watesé negaramu ya kuwi wiwit segara Abang tekan ing segara Filistèn, lan sangka ara-ara samun tekan ing kali Efrat, awit kabèh wong negara kono bakal Tak pasrahké ing tanganmu, supaya pada kok tundung sangka ngarepmu.

³²Kowé aja gawé perjanjian karo wong kuwi utawa karo allahé.

³³Bangsa-bangsa mau bakal ora tetep manggon ing negaramu, supaya ora njalari kowé pada gawé dosa marang Aku, ya kuwi kowé pada ngabekti marang allahé; perkara mengkono kuwi mesti dadi kala-jiret kanggo kowé.