Read Caribbean Javanese Pangentasan 24 Bible Online

Pangentasan 24 - Caribbean Javanese bible

Pangentasan 24

¹Gusti Allah terus ngetokké tembung marang Moses: “Kowé munggaha ngadepa ing ngarepé GUSTI, kowé lan Harun, Nadab lan Abihu uga para tuwa-tuwané Israèl wong pitung puluh, terus pada nyembah sangka kadohan.

²Mung Moses déwé sing teka tyedak marang GUSTI, nanging liyané ora olèh nyedaki, lan wong okèh ya aja ana sing mèlu munggah bareng karo kowé.”

³Moses bareng wis mulih terus ngomongké marang bangsa kuwi kabèh tembungé GUSTI lan kabèh pernatan-Né; bangsa kuwi kabèh terus nyauri bareng, tembungé: “Kabèh tembungé sing wis dikèkké karo GUSTI kuwi bakal pada kula tindakké kabèh.”

⁴Moses terus nulis sakkèhé tembungé GUSTI, lan sésuké wantyi ijik ésuk mruput terus ngedekké mesbèh ing sikilé gunung kuwi, lan tugu rolas manut tyatyahé taler Israèl.

⁵Terus mréntahké wong nom-nomané bangsa Israèl, lan pada masrahaké kurban obongan lan mbelèh sapi lanang digawé kurban keslametan marang GUSTI.

⁶Sakwisé kuwi Moses terus njupuk getihé sak bagéan, diwadahi bokor, sak bagéan menèh tyipratké ing mesbèh mau.

⁷Terus njupuk kitab perjanjian, lan diwatya ana ngarepé umat, kuwi terus pada ngomong: “Kabèh pitutur-pituturé GUSTI bakal pada kula lakoni lan bakal kula rungokké.”

⁸Moses terus njupuk getih mau lan dityipratké marang bangsa kuwi lan ngomong: “Wis iki getihé perjanjian sing dianakké GUSTI karo kowé kabèh, dilandesi karo sakkèhé tembungé mau.”

⁹Moses lan Harun terus pada munggah ing gunung, mengkono uga Nadab lan Abihu uga para tuwa-tuwané Israèl wong pitung puluh,

¹⁰lan pada weruh Gusti Allahé Israèl; sing kanggo antyik-antyiké sikilé kuwi kaya watu diaman sing mentyorong kaya langit sing semilak padang.

¹¹Nanging Panjenengané ora matèni marang pemimpin-pemimpin Israèl; senajan pada nyawang marang Gusti Allah, terus mangan lan ngombé.

¹²GUSTI terus ngetokké tembung marang Moses: “Kowé munggaha ing gunung nemoni Aku lan ngentènana ing kana, terus kowé bakal Tak wènèhi watu lèmpèngan, sing wis Tak tulisi pernatan lan pepakon, supaya kok wulangké marang wong-wong kuwi.”

¹³Moses terus lunga karo Yosua abdiné munggah ing gunungé Gusti Allah.

¹⁴Nanging pawelingé Moses marang para pinituwa: “Kowé pada ngentènana aku ing kéné, nganti sak balikku mbalèni kowé. Nanging Harun lan Hur pada barengan karo kowé, sapa sing nduwé perkara pada maranana dèwèké.”

¹⁵Bareng Moses munggah ing gunung, gunungé terus ketutupan mendung,

¹⁶lan kamulyané GUSTI ing gunung Sinai, nem dina suwéné enggoné ketutupan mendung, lan ing dina kaping pitu Moses dityeluk sangka tengahé mendung kuwi.

¹⁷Kanggo wong Israèl kamulyané GUSTI kuwi semlorot kétoké kaya geni sing nggosongké putyuké gunung.

¹⁸Moses terus mlebu ing sak tengahé mendung lan munggah ing nduwuré gunung; Moses enggoné ing nduwuré gunung kuwi suwéné patang puluh dina patang puluh mbengi.