Read Caribbean Javanese Pangentasan 25 Bible Online

Pangentasan 25 - Caribbean Javanese bible

Pangentasan 25

¹GUSTI terus ngetokké tembung marang Moses:

²“Kowé ngomonga marang wong Israèl, supaya pada masrahaké pisungsung kanggo Aku. Enggoné pada masrahaké pisungsung kuwi kanggo Aku kuwi kudu metu sangka sak legané atiné.

³Nanging pisungsung kanggo Aku kuwi rupa: emas, slaka, tembaga,

⁴bakal mori wungu tuwa, bakal mori wungu nom, bakal mori abang, mori alus, wulu wedus,

⁵lulangé wedus gèmbèl lanang dipulas abang, lulangé iwak tyutyut lan kayu akasia

⁶lenga kanggo dimar, wangi-wangian kanggo lenga jebatan lan kanggo dupa,

⁷watu onyx lan watu-watu tatahan kanggo klambiné éfod lan tutupé dada.

⁸Lan Aku pada gawèkna panggonan sutyi, supaya Aku manggon ing tengahmu.

⁹Enggonmu pada nggawé omah panggonan sutyi lan sakkèhé pirantiné kabèh kuwi manut tyonto sing bakal Tak duduhké marang kowé.”

¹⁰Kowé pada nggawéa peti sangka kayu akasia, dawané loro setengah éluh, ambané siji setengah éluh lan duwuré siji setengah éluh.

¹¹Peti kuwi kok lapisana emas murni ing njeruh lan ing njabané, lan ing nduwuré mubeng wènèhana lés emas.

¹²Uga kowé nggawéa gelang emas tyitakan patang iji pada pasangen ing pojokané papat, dadi ing pinggiré ana gelangé loro, lan ing pinggiré liyané ana gelang loro.

¹³Lan menèh kowé nggawéa pikulan kayu akasia, pada dilapisi karo emas.

¹⁴Pikulan kuwi pada slobokna ing gelangan ing pinggiré peti, dienggo nggotong petiné.

¹⁵Pikulan kuwi kudu terus ing gelangané petiné, ora kena didudut.

¹⁶Ing njeruhné peti isènana lèmpèngan watu pernatan sing bakal Tak wènèhké marang kowé.

¹⁷Uga kowé nggawéa tutupé kerukunan nganggo emas murni, dawané loro setengah éluh, ambané siji setengah éluh.

¹⁸Lan kowé nggawéa kembangan kerup emas loro sing digawé sangka emas, pasangen ing pungkasané tutupé kerukunan mau.

¹⁹Kerup sing siji ing pungkasané sisihé, lan kerup sijiné ing sisih liyané tutupé, kerup loro-loroné kuwi pada gawénen adep-adepan ing tutupé kerukunan ing kiwa lan ing tengen.

²⁰Swiwiné kerub-kerub kuwi pada megarna menduwur nutupi tutupé kerukunan, praupané pada adu-arep; praupané kerub-kerub kuwi pada sujut marang tutupé kerukunan mau.

²¹Tutupé kerukunan kuwi kudu kok tumpangké ing duwuré petiné, yèn blèbèkan watu pernatan sing bakal Tak wènèhké marang kowé kuwi wis kok sèlèhké ing sak njeruhné petiné.

²²Ing kono enggon-Ku bakal nekani kowé sangka sak nduwuré tutupé kerukunan kuwi, sangka antarané kerup loro sing ana sak nduwuré petiné kuwi, Aku bakal ngekèki tembung marang kowé bab sing bakal Tak préntahké marang kowé sing kudu kok teruské marang wong Israèl.

²³Lan menèh kowé nggawéa méja kayu akasia, dawané rong éluh, ambané sak éluh lan duwuré sak éluh setengah.

²⁴Méja kuwi lapisana emas murni lan wènèhana lés emas mubeng.

²⁵Uga wènèhana pinggiran sak ubengé, ambané sak èpèk-èpèk, lan pinggiran kuwi ya wènèhana lés emas.

²⁶Lan menèh méja kuwi ya gawèkna gelangan emas patang iji, gelangan kuwi kok tumpangké ing pojokané papat panggonané ing sikilé papat.

²⁷Gelangané pada pèpètna ing pinggiran, kanggo slobokané pikulan sing kanggo ngusung méjané.

²⁸Pikulané kuwi ya kayu akasia dilapis emas, kuwi sing digawé ngusung méjané.

²⁹Kowé ya nggawéa kendi, piring, mangkok lan tuwungé, sing digawé ngesokké kurban ombèn, kabèh kuwi digawé sangka emas murni.

³⁰Méjané kuwi tansah dèkèkana roti kurban ing ngarep-Ku.

³¹Kowé nggawéa kandelar emas murni; kandelar kuwi sing digawé kudu emas gemblèngan, ya sikilané ya adek-adeké; kabèh kenopé, adahé sumbu lan kembangané kudu siji.

³²Gagangé nem metu sangka adek-adeké; gagangé sing telu ing sisih sijiné, lan sing telu ing sisih liyané.

³³Kabèh gagangé anaa kenopé adahé sumbu karo kembangané mandrah telu ing sisih siji lan liyané, karo kenopé adahé sumbu lan karo kembangané, dadi gagangé nem sing metu sangka kandelar kuwi ya gawénen mengkono.

³⁴Kanggo adek-adeké kandelar kuwi anaa kenopé adahé sumbu karo kembangané mandrah patang iji.

³⁵Kenopé siji anaa sing dipasang ing ngisoré gagangé sak jodo sing kaping pisan sing metu sangka kandelaré, siji menèh ing ngisoré gagangé sing kaping pindo lan siji menèh ing ngisoré sing kaping telu, mengkono kanggo gagangé nem sing metu sangka adek-adeké kandelar mau, gawénen pada.

³⁶Adahé sumbu lan gagangé kuwi kabèh kudu digawé sangka emas murni gemblèngan.

³⁷Gawénen sumbu dimar pitung iji, ditumpangké ing nduwuré, supaya madangi ing ngarepé.

³⁸Japité lan tadahané langes ya pada emas murni.

³⁹Mas murni sak talénta sing dienggo nggawé kandelar karo pirantiné kabèh.

⁴⁰Sing ati-ati, enggonmu nggawé kabèh mau kudu pada karo tyonto sing wis diduduhké marang kowé ing gunung.