Read Caribbean Javanese Pangentasan 26 Bible Online

Pangentasan 26 - Caribbean Javanese bible

Pangentasan 26

¹Tarup Sutyi kuwi kudu kok gawé sepuluh larik nganggo bakal mori alus, bolah wungu tuwa, wungu nom lan abang mateng; karo kerup, gawéané tukang tenun, kabèh kuwi kudu kok gawé mengkono.

²Dawané tarup siji wolu likur éluh, ambané patang éluh, tarup kuwi ukurané kabèh kudu pada.

³Tarup lima disambung-sambung dadi siji, sing lima menèh ya disambung-sambung dadi siji.

⁴Lan kowé nggawéa tali-tali kolongan mori wungu tuwa dipasang ing pinggiré tarup sing siji, mengkono uga kanggo ing pinggiré tarup sijiné.

⁵Kolongan sèket iji kok tumpangké ing tarup sing siji lan kolongan sing sèket iji menèh tumpangké ing pungkasané tarup sijiné, adep-adepan siji lan sijiné.

⁶Lan menèh kowé nggawéa tyantolan emas sèket iji, tarup-tarupé pada gandèngana siji lan sijiné nganggo tyantèlan mau, supaya dadia tarup siji.

⁷Uga kowé nggawéa tarup-tarupé wulu wedus kanggo payoné Tarup Sutyi, kowé nggawéa tarup sewelas.

⁸Saben tarup dawané telung puluh éluh lan ambané patang éluh; tarup sewelas kuwi ukurané kudu pada.

⁹Tarup sing lima kuwi sambungana déwé dadi siji, lan tarup sing nem ya dadi siji déwé, tarup sing nomer nem lempiten dadi loro ing sisih ngarepé tarup mau.

¹⁰Terus Kowé nggawéa kolongan sèket iji tumpangké ing pinggiré tarup ing pungkasané, lan kolongan sèket iji menèh ing pinggiré tarup sijiné.

¹¹Mengkono uga kowé nggawéa tyantèlan tembaga sèket iji, tyantèlan kuwi lebokna ing kolongan mau, tarupé terus sambungana dadi siji.

¹²Kanggo bagéan sing turah ing tarup mau, sing setengah tlangkupna ing mburiné Tarup Sutyi,

¹³turahané sak éluh ing sisih kéné lan sak éluh ing sisih kana kuwi tlangkupna ing pinggiran Tarup Sutyi ing kiwa lan tengen digawé aling-aling.

¹⁴Lan menèh tarup kuwi gawèkna payon lulang wedus gèmbèl lanang sing diabangi, lan sak nduwuré kuwi lulangé iwak tyutyut.

¹⁵Tarup Sutyi kuwi digawé karo planga-planga akasia sing ngadek,

¹⁶planga siji dawané sepuluh éluh lan saben planga ambané siji setengah éluh.

¹⁷Saben planga ènèng pantèké loro jèjèr, mengkono enggonmu nggawé sakkèhé plangané Tarup Sutyi mau.

¹⁸Enggonmu nggawé plangané Tarup Sutyi kuwi rong puluh ing pinggiran sisih kidul,

¹⁹lan kowé nggawéa ompak slaka patang puluh disèlèh ing ngisoré planga rong puluh kuwi, planga siji ompakké loro kanggo pantèké loro mau, lan planga liyané ompakké ya loro-loro kanggo pantèké loro.

²⁰Ing iringané Tarup Sutyi sijiné sing sisih lor ya gawèkna planga rong puluh iji,

²¹karo umpaké slaka patang puluh iji, planga siji umpaké loro, lan planga liyané umpaké ya pada loro.

²²Kanggo ing mburiné Tarup Sutyi, sisih kulon, kuwi gawèkna planga nem iji,

²³uga menèh kowé nggawéa planga rong iji kanggo pojoké Tarup Sutyi ing sisih mburiné.

²⁴Planga loro kuwi kudu kembar, pantèké ing sisih ngisor, mengkono uga ing sisih nduwur, tekan ing gelangan sing kaping pisan, mengkono kahanané plangané loro mau, kudu pada kanggo pojokané loro.

²⁵Dadi kabèh kudu ana planga wolung iji karo umpaké slaka, tyatyahé nembelas; planga siji umpaké loro lan sak terusé saben planga umpaké loro.

²⁶Kowé uga nggawéa tyagak kayu akasia, limang iji kanggo planga-plangané Tarup Sutyi sing sisihé,

²⁷lan tyagak limang iji kanggo planga-plangané Tarup Sutyi ing sisihé sing kaping pindo, uga tyagak limang iji kanggo panggonan mburiné sisih kulon.

²⁸Lan balok malang limang iji kanggo sing tengah, balok malang kuwi tumpangké ing sak tengahé planga-planga sangka pojok kéné tekan ing pojok kana.

²⁹Planga-plangané pada lapisana emas, lan gelangan kanggo slobokané balok malang kuwi ya emas, balok sing malang ya pada lapisana emas.

³⁰Sak terusé Tarup Sutyi kuwi pasangen manut rantyamané sing wis Tak duduhké marang kowé ing gunung.

³¹Uga menèh kowé nggawéa geber kain wungu tuwa lan kain wungu nom, kain abang, tenunan mori lenan alus; digawé karo gambar kerup karo wong pinter nenun.

³²Geber kuwi gantungen ing tyagak kayu akasia papat sing dilapis emas, lan ana tyantèlan emas, temumpang umpak slaka papat.

³³Geber mau gantungen ing tyantèlan sing kanggo nyambung tarup kuwi, terus petiné pernatan sèlèhna ing sak mburiné geber, lan geber kuwi dadia singgetan ing antarané panggonan sutyi lan panggonan Mahasutyi.

³⁴Tutupé pangrukunan kuwi tumpangna ing peti pernatan ing sak njeruhné panggonan Mahasutyi.

³⁵Méjané sèlèhna ing ngarepé geber, lan kandelaré adep-adepan karo méjané ing Tarup Sutyi sisih kidul, nanging méjané sèlèhna ing sisih lor.

³⁶Lan menèh kowé nggawéa geber ing lawangé tarup, sing digawé kain wungu tuwa, kain wungu nom, kain abang lan mori lenan tenunan alus sing werna-werna.

³⁷Geber kuwi gawèkna sangka kayu akasia lima iji, pada dilapis emas, lan ana tyantèlan emas lan kowé gawèkna ompak tembaga tyitakan lima iji.