Read Caribbean Javanese Pangentasan 27 Bible Online

Pangentasan 27 - Caribbean Javanese bible

Pangentasan 27

¹Uga menèh kowé nggawéa mesbèh kayu akasia, dawané lima éluh lan ambané lima éluh, dadi mesbèh kuwi pesagi bener, nanging duwuré telung éluh.

²Sunguné gawénen ing pojokané papat; kuwi gawénen dadi siji karo mesbèhé, mesbèh kuwi kudu kok lapis karo tembaga.

³Lan kowé uga nggawéa wadah-wadah kanggo mbuwangi awuné, uga porek lan bokor kanggo nyirami, tyukit lan anglo; sakkèhé piranti kuwi kudu digawé sangka tembaga.

⁴Lan menèh kowé nggawéa ayakan tembaga kaya jala, ayakan kuwi ing pojoké papat pisan wènèhana gelangan tembaga patang iji,

⁵terus tumpangna ing sak ngisoré pinggiré mesbèh wiwit sangka ngisor nganti ayakan mau duwuré separoné mesbèh.

⁶Uga menèh mesbèh kuwi ya gawèkna pikulan, pikulan kayu akasia sing dilapis karo tembaga.

⁷Pikulané slobokna ing gelangé, dadi yèn mesbèhé diusung, pikulan kuwi pada ing bangkèkané mesbèh kiwa tengen.

⁸Mesbèh kuwi digawé sangka planga ing njeruhné growong, kaya enggonmu wis diduduhké ing gunung, mengkono enggonmu pada nggarap mesbèh kuwi.

⁹Kowé nggawéa platarané Tarup Sutyi; ing sisih kidul plataran kuwi anaa geberé mori lenan tenunan sing bolahé alus, dawané ing sisih 100 éluh.

¹⁰Tyagaké kabèh kudu rong puluh, umpaké tembaga ya rong puluh, tyantèlané tyagak lan sambungané kuwi slaka.

¹¹Mengkono uga ing sisih lor, turut ambané ya kudu geber dawané pada 100 éluh, lan tyagaké rong puluh lan umpaké rong puluh sangka tembaga, nanging tyantèlané lan sambungané kuwi kudu slaka.

¹²Ing ambané plataran sisih kulon anaa geber sèket éluh, lan tyagaké sepuluh lan umpaké sepuluh.

¹³Nanging ambané plataran panggonan ngarep sing sisih wétan kudu sèket éluh,

¹⁴ya kuwi geberé limalas éluh kanggo ing sisihé gapura sing siji karo tyagaké telu lan umpaké telu,

¹⁵lan kanggo ing sisihé gapura sijiné geberé ya limalas éluh, tyagaké telu lan umpaké ya telu.

¹⁶Nanging ing gapurané plataran anaa geberé sing dawané rong puluh éluh, sing digawé bakal mori wungu tuwa, lan wungu nom, abang lan mori lenan alus tenunan sing werna-werna lan tyagaké papat lan umpaké papat.

¹⁷Sakkèhé tyagak ing sak ubengé plataran mau pada pasangen sambungané karo slaka, lan tyantèlan ya slaka, nanging umpaké tembaga.

¹⁸Dawané plataran kudu 100 éluh, ambané sèket éluh lan duwuré limang éluh, rupa mori lenan tenunan alus, lan umpaké tembaga.

¹⁹Nanging sakkèhé piranti kanggo ngedekké Tarup Sutyi, mengkono uga sakkèhé patoké uga patoké plataran, kuwi kudu tembaga kabèh.

²⁰Uga kowé mréntaha marang wong Israèl, supaya pada masrahaké lenga saitun deplokan sing tulèn kanggo dimar, supaya dimaré tansah murup.

²¹Ing sak njeruhné Tarup Kumpulan ing sak njabané geber sing ngaling-alingi petiné pernatan, ing kono Harun lan anak-anaké sing nata dimar mau ing ngarepé GUSTI wiwit mbengi nganti ésuk. Kuwi pernatan sing kudu ditandangi turun-temurun kanggo wong Israèl.