Read Caribbean Javanese Pangentasan 29 Bible Online

Pangentasan 29 - Caribbean Javanese bible

Pangentasan 29

¹Nanging enggonmu nyutyèkké Harun lan para anaké supaya dadi imam ngladèni marang Aku kuwi tyarané mengkéné: Kowé njupuka sapi lanang nom siji lan wedus gèmbèl lanang loro sing tanpa tyiri,

²roti tanpa ragi lan roti bunder ya tanpa ragi, diolah nganggo lenga, roti tipis tanpa ragi diosèri lenga, kabèh kuwi sing digawé kudu glepung gandum pilihan.

³Kuwi kabèh adahana tyeting siji, terus pasrahna sak tyetingé, mengkono uga sapiné lanang lan wedus gèmbèl lanang loro mau.

⁴Harun lan anak-anaké pada tekakna ning ngarepé lawangé Tarup Kumpulan lan kowé ngisuhi wongé nganggo banyu.

⁵Sakwisé mengkono njupuka sandangané, lan Harun enggoni klambi, jubahé klambiné éfod lan kotang éfod apa menèh tutupé dada; terus éfod singsetana karo sabuk klambiné éfod;

⁶sirahé pasangen serban lan blébékan sutyi pasangen ing serban mau.

⁷Sakwisé mengkono njupuka lenga jebatan esokna ing sirahé, dadi dèkné dijebatani.

⁸Mengkono uga anak-anaké pada tekakna, enggoni klambi

⁹lan enggoni sabuk, ya Harun lan anak-anaké lan nalèni tali ing sirahé, karo mengkono terus pada dikèki lungguhan dadi imam, kuwi pernatan kanggo selawasé. Kaya mengkono enggonmu netepaké Harun uga anak-anaké.

¹⁰Sapiné lanang mau terus tekakna menyang ing ngarepé Tarup Kumpulan, Harun lan anak-anaké terus pada numpangké tangané ing endasé sapi kuwi,

¹¹sapiné terus sembelèhen ing ngarepé GUSTI ing ngarepé lawangé Tarup Kumpulan.

¹²Kowé terus njupuka getihé sapi lanang mau setitik, lèlètna ing sunguné mesbèh lan drijimu, nanging getih turahané esokna kabèh ing mesbèh bawah ngisor.

¹³Sakkèhé gajihé sing nutupi jeroané, gombyoké atiné, ginjel loro pisan tekan gajihé, kuwi obongen ing mesbèh.

¹⁴Nanging dagingé, lulangé lan regetané kuwi kudu kok obong ing sak njabané tarup, kuwi dadi kurban ngluwari dosa.

¹⁵Sakwisé mengkono kowé njupuka wedus gèmbèl lanang sing siji, Harun lan anak-anaké pada numpangké tangané ing endasé wedus mau,

¹⁶wedus mau terus sembelèhen, getihé kok siramké ing sak ubengé mesbèh.

¹⁷Wedus ditengkel-tengkel miturut bagéan-bagéané, jeroané lan sampilé dikumbah lan dèkèkna ing duwuré tengkelan-tengkelan mau, lan ing sak nduwuré endasé.

¹⁸Wedus gèmbèl lanang kuwi kabèh terus diobong ing mesbèh, kuwi kurban obongan, pisungsung apik sing nyenengké marang GUSTI, ya kuwi kurban geni sing dipasrahké marang GUSTI.

¹⁹Sakwisé kuwi kowé terus njupuka wedus gèmbèl lanang sijiné, endasé tumpangana tangané Harun uga anak-anaké.

²⁰Wedus terus sembelèhen, lan getihé sak bagéan lèlètna setitik ing godongé kupingé Harun sing tengen, uga ing godongé kupingé anak-anaké Harun, ing jempolé tangané tengen, lan jempolé sikilé tengen, nanging getih liyané kok siramké ing sak ubengé mesbèh.

²¹Getih ing mesbèh kuwi jikuken setitik karo lengané jebat setitik, kok kepyurna marang Harun lan ing sandangané, lan uga marang anak-anaké lan sandangané. Awit sangka mengkono Harun lan sandangané, terus bakal dadi sutyi, semono uga anak-anaké lan sandangané.

²²Wedus gèmbèl lanang mau terus dijukuk gajihé, buntuté sing karo gajihé, uga gajihé sing nutupi jeroané, gombyoké atiné, ginjelé pisan kabèh gajihé, sampilé tengen, awit kuwi wedus gèmbèl lanang pisungsung panetepan,

²³kowé uga njupuka roti tipis siji, roti bunder siji sing tyampuran lenga lan roti tipis siji sangka tyeting sing isi roti tanpa ragi, ing ngarepé GUSTI.

²⁴Kuwi kabèh kok sèlèhké ing èpèk-èpèké Harun lan èpèk-èpèké anak-anaké, terus kok pasrahna kabèh dadi pisungsung goyangan ing ngarepé GUSTI.

²⁵Sakwisé mengkono kabèh terus tampanana sangka tangané, terus diobong ing mesbèh ya kuwi ing sak nduwuré kurban obongan, kanggo pisungsung sing apik ing ngarepé GUSTI, kuwi kurban geni dipasrahké marang GUSTI.

²⁶Sak terusé kowé njupuka dadané wedus gèmbèl lanang kuwi sing kanggo netepaké Harun, sing terus kok pasrahna dadi pisungsung goyangan ing ngarepé GUSTI, kuwi dadia pandumanmu.

²⁷Dadi kowé kudu nyutyèkké dadané pisungsung goyangan lan sampilé pisungsung spésial sangka wedus lanang sing kanggo netepaké Harun lan anak-anaké.

²⁸Kuwi dadia pandumané Harun lan anak-anaké manut tatanan kanggo wong Israèl ing sak lawas-lawasé, awit iki pisungsung spésial, mulané kuwi kudu dadi pisungsung spésial sangka wong Israèl, sing dijukuk sangka kurbané keslametan, dadi pisungsung spésial marang GUSTI.

²⁹Sandangan sutyi sandangané Harun kuwi ya dadia sandangané anak-anaké sak terusé, dienggo yèn pada dijebati lan ditetepaké.

³⁰Turunané sing nggentèni dadi imam, sing bakal mlebu ing Tarup Kumpulan perlu nindakké pangabekti ing panggonan sutyi, kuwi nganti pitung dina suwéné enggoné nganggo sandangan mau.

³¹Wedus lanang pisungsung panetepan kuwi dagingé dijukuk lan diolah ing panggonan sing sutyi.

³²Harun kabèh anak-anaké pada mangana daging wedus kuwi karo roti ing tyeting ing ngarep lawang Tarup Kumpulan.

³³Harun lan anak-anaké kudu mangan kuwi kabèh, awit kuwi dadi tyarané tebusan waktu ditetepaké lan disutyèkké, nanging wong liyané aja ana sing mèlu mangan, awit kabèh kuwi pisungsung sutyi.

³⁴Dagingé pisungsung panetepan lan rotiné kuwi, yèn ana turahané nganti tekan ésuké, kuwi kudu diobong, aja dipangan, awit kabèh kuwi pisungsung sutyi.

³⁵Dadi Harun lan anak-anaké kuwi kudu kok tandangi kaya sing Tak préntahaké marang kowé, sak njeruhné pitung dina suwéné enggonmu netetepaké.

³⁶Saben dina kowé kudu ngolah sapi lanang siji kanggo kurban ngluwari dosa kanggo nganakké rukunan lan mesbèh kuwi kudu kok sutyèkké karo nganakké rukunan kanggo kuwi; lan kok jebatani supaya dadi sutyi.

³⁷Pitung dina lawasé enggonmu nganakké rukunan kanggo mesbèh kuwi, mesbèh kuwi kudu kok sutyèkké, terus bakal dadi Mahasutyi; saben wong sing nggepok mesbèh kuwi bakal dadi sutyi.

³⁸“Nanging sing kudu kok kurbanaké ing mesbèh kuwi: tyempé loro sing umur setaun saben dina.

³⁹Tyempé sing siji kok pasrahna ing wantyi ésuk lan tyempé sijiné kok pasrahna ing wantyi soré.

⁴⁰Tyempé sijiné olahen karo glepung sing apik sak prasepuluh éfa lan lenga deplokan seprapat hin, lan kurban ombèn rupané anggur seprapat hin.

⁴¹Tyempé sijiné olahen ing wantyi soré; pada kaya kurban panganan lan kurban ombèn ing wantyi ésuk, kuwi olahen kanggo pisungsung sing apik, kurban geni sing dipasrahké marang GUSTI,

⁴²kuwi kurban obongan sing ajek ing tengahmu nganti turun-temurun, sing dipasrahké ing ngarep lawangé Tarup Kumpulan ing ngarepé GUSTI. Awit ing kono enggon-Ku bakal nemoni kowé lan ngetokké tembung marang kowé.

⁴³Ing kono enggon-Ku bakal nemoni wong Israèl, nganti panggonan kuwi bakal disutyèkké karo kamulyan-Ku.

⁴⁴Mengkono Aku bakal nyutyèkké Tarup Kumpulan lan mesbèh kuwi, lan Harun lan anak-anaké ya bakal Tak sutyèkké, supaya pada dadia imam ngladèni marang Aku.

⁴⁵Uga Aku bakal manggon ing tengahé wong Israèl lan Aku bakal dadi Allahé.

⁴⁶Ing kono terus bakal pada weruh, yèn Aku iki GUSTI Allahé, sing wis nuntun metu sangka negara Egipte, supaya Aku manggon ing tengahé, ya Aku iki GUSTI, Allahé.”