Read Caribbean Javanese Pangentasan 30 Bible Online

Pangentasan 30 - Caribbean Javanese bible

Pangentasan 30

¹“Kowé ya nggawéa mesbèh kanggo ngobong dupa, kayu akasia sing kok gawé;

²dawané sak éluh, ambané ya sak éluh, dadi pesagi nanging duwuré rong éluh; sunguné dadi siji karo mesbèhé.

³Kuwi dilapis karo emas murni, ya pernahé ing nduwur, ya sisih-sisihé mubeng uga sunguné, wènèhana lés emas mubeng.

⁴Uga mesbèh kuwi ya pasangen gelangan emas pernahé ing sak ngisoré lés; kok pasang ing sisihé mesbèh ing kiwa lan tengen, kanggo slobokané pikulan yèn diusung.

⁵Nanging pikulan sing kok gawé kuwi kayu akasia sing dilapis emas.

⁶Mesbèh pedupan kuwi sèlèhna ing ngarepé geber sing kanggo ngaling-alingi peti pernatan, ing ngarepé tutupé pangrukunan ing sak nduwuré panggonan pernatan, ya ing kono enggon-Ku bakal nemoni kowé.

⁷Harun ngobonga dupa sing wangi ing mesbèh mau saben ésuk, yèn ngresiki dimar-dimar.

⁸Lan yèn Harun nyumet dimar ing wantyi soré, Harun ya ngobonga menèh, dadi ngobongé dupa kuwi ajek ing ngarepé GUSTI, ing sak tengahmu turun-temurun.

⁹Ing mesbèh kuwi kowé aja ngobong dupa liyané, utawa kurban obongan uga kurban panganan, lan kowé ya aja masrahaké kurban ombèn.

¹⁰Setaun sepisan Harun nindakké tebusan ing sungu-sunguné mesbèh kuwi, nganggo getihé kurban ngluwari dosa, enggoné nindakké tebusan kanggo mesbèh kuwi saben setaun sepisan ing tengah-tengahmu nganti turun-temurun, kuwi perkara sing Mahasutyi kanggo GUSTI.”

¹¹Tembungé GUSTI marang Moses, mengkéné:

¹²“Yèn kowé ngitung tyatyahé wong Israèl, waktu pada didaftar, siji-sijiné masrahaké pisungsung kanggo tebusan nyawané marang GUSTI, supaya sak njeruhné dityatyahké aja nganti pada kena ing bebendu.

¹³Saben wong sing didaftar masrahaké duwit setengah sèkel, ditimbang manut sikelan panggonan sutyi, sak sèkel kuwi boboté ana rong puluh géra; setengah sèkel kuwi kanggo pisungsung marang GUSTI.

¹⁴Wong sing bisa mlebu ing pendaftaran kuwi umuré rong puluh taun munggah, kuwi kudu masrahaké pisungsung spésial marang GUSTI.

¹⁵Wong sugih enggoné mbayar aja luwih lan wong mlarat aja kurang sangka setengah sèkel, yèn kowé pada masrahaké pisungsung marang GUSTI kanggo tebusan nyawa kuwi.

¹⁶Nanging duwit tebusan sing kok jikuk sangka wong Israèl kuwi kanggokna ngragati pangabekti ing Tarup Kumpulan; pernatan kuwi dadia pengéling-éling marang wong Israèl ing ngarepé GUSTI, lan kanggo tebusan nyawamu kabèh.”

¹⁷GUSTI ngetokké tembung marang Moses, mengkéné:

¹⁸“Kowé nggawéa wadah banyu tembaga dasarané ya tembaga, kanggo wisuhan, kuwi kok sèlèhké ing antarané Tarup Kumpulan lan mesbèh lan isènana banyu.

¹⁹Harun lan anak-anaké pada wisuha tangan lan sikil nganggo banyu ing wisuhan mau.

²⁰Yèn arep mlebu ing Tarup Kumpulan, kudu ngisuhi tangan lan sikil, supaya aja nganti nemoni pati. Mengkono uga yèn arep menyang ing mesbèh perlu ngladèni pangabekti lan ngobong kurban sing dipasrahké marang GUSTI,

²¹ya pada wisuha tangan lan sikil ndisik, supaya aja nganti nemoni pati. Kuwi dadia pernatan kanggo selawasé, kanggo Harun sak-anaké turun-temurun.”

²²Tembungé GUSTI marang Moses, mengkéné:

²³“Kowé njupuka bumbu-bumbu pilihan, blendok mur èntyèr 500 sèkel, lan kayu legi sing wangi boboté separoné kuwi, dadi rong atus sèket sèkel, dringu wangi rong atus sèket sèkel,

²⁴kayu teja 500 sèkel, ditimbang manut sèkel sutyi, lan lenga saitun sak hin.

²⁵Kuwi mau kabèh digawé lenga jebatan sing sutyi, tyampuran wangi sing digawé karo ngati-ati kaya gawéané tukang masak lenga, kuwi dadia lenga jebatan sing sutyi.

²⁶Lenga kuwi digawé nglengani Tarup Kumpulan lan petiné pernatan,

²⁷méja pirantiné kabèh, kandelar sak pirantiné lan mesbèh pedupan;

²⁸uga mesbèh kurban obongan kabèh sak pirantiné kabèh lan wadah banyu sak dasarané.

²⁹Kuwi kabèh kudu kok sutyèkké, supaya dadia Mahasutyi, saben wong sing nggepok kuwi bakal dadi sutyi,

³⁰Harun lan para anaké ya pada jebatana lan sutyèkna supaya pada dadi imam ngladèni marang Aku.

³¹Uga wong Israèl pada omongana bab tembung-Ku mengkéné: Iki Tak tetepké dadi lenga jebatan sing sutyi kanggo Aku ing tengah-tengahmu turun-temurun.

³²Aja nganti disiramké ing awaké wong lumrah, lan kowé aja gawé lenga sing kaya mengkono kuwi lan nganggo tyampuran pada kaya kuwi; awit kuwi lenga sing sutyi, ya kok anggep sutyi.

³³Sapa sing gawé lenga tyampuran pada kaya kuwi, lan ngusapké ing awaké wong lumrah, kuwi dientèkké sangka tengah-tengahé bangsané.”

³⁴Lan menèh tembungé GUSTI marang Moses: “Kowé njupuka wangi-wangian, ya kuwi: tlutuh wit, tlutuh tanduran tyistus lan blendok galbanum, wangi-wangian kuwi tyampuren karo menyan tulèn, siji-sijiné pada akèhé.

³⁵Kabèh mau kok dadèkké dupa, dadi tyampuran bumbu-bumbu kaya gawéané tukang nyampur bumbu-bumbu, dityampuri uyah, tanpa tyampuran liyané, dadia sutyi.

³⁶Sak bagéan tyampuran kuwi dijukuk, terus gilingen sing lembut, kuwi sak bagéan dèkèken ing ngarepé petiné pernatan ing Tarup Kumpulan, ya ing kono enggon-Ku nemoni kowé, kuwi kok anggep perkara sing Mahasutyi.

³⁷Nanging dupa sing pada kok gawé miturut tyampuran mengkono kuwi aja pada kok gawé kanggo awakmu déwé, kuwi kanggo GUSTI, sing sutyi kanggo kowé.

³⁸Wong sing gawé lenga sing kaya mengkono dienggo ambon-ambon, kuwi kudu dientèkké sangka tengah-tengahé bangsané.”