Read Caribbean Javanese Pangentasan 31 Bible Online

Pangentasan 31 - Caribbean Javanese bible

Pangentasan 31

¹Sakwisé mengkono GUSTI ngetokké tembung marang Moses, mengkéné:

²“Delengen Aku wis milih Bésaleèl anaké Uri anaké Hur, sangka turunané Yéhuda,

³lan wis Tak kebaki Rohé Allah, karo kaprigelan, kapinteran lan kaweruh kanggo werna-werna penggawéan,

⁴bisa ngrantyam penggawéan barang emas, slaka lan tembaga;

⁵nggosok watu-watu supaya kena dipasang; ngukir kayu lan nindakké sak rupané penggawéan.

⁶Uga Aku ya wis netepké kanggo réwangé ing gawé ya kuwi Aholiab anaké Ahisamak, sangka turunané Dan; saben wong pinter wis Tak wènèhi karo kaprigelan; kuwi pada nggawéa sembarang sing Tak préntahké marang kowé:

⁷Tarup Kumpulan, peti pernatan, tutupé pangrukunan kanggo peti mau, lan sak rupané pirantiné tarup kuwi,

⁸kayata méja sak pirantiné, kandelar emas murni sak pirantiné lan mesbèh pedupan,

⁹mesbèh kurban obongan sak pirantiné, wadah banyu sak dasarané,

¹⁰mengkono uga penganggo, sandangan sutyi kanggo Harun lan sandangané para anaké sing pada dadi imam,

¹¹lenga jebatan lan dupa wangi kanggo ing panggonan sutyi; kuwi kabèh kudu digawé manut persis kaya sing wis Tak omongké marang kowé.”

¹²GUSTI ngetokké tembung menèh marang Moses, mengkéné:

¹³Kowé ngomongna janji-Ku marang wong Israèl, mengkéné: “Kowé kudu pada netepana dina-dina sabat-Ku, awit kuwi kanggo tanda ing tengah-tengahmu Aku lan kowé, nganti turun-temurun, supaya kowé weruh, yèn Aku iki GUSTI, sing nyutyèkké kowé kabèh.

¹⁴Kowé pada netepana dina sabat, awit kuwi dina sutyi kanggo kowé; sapa sing sembrana marang kesutyiané dina sabat, kuwi diukum pati, awit saben wong sing nyambutgawé ing dina kuwi, wong kaya mengkono mau kudu dibuwang sangka sak tengahé bangsané.

¹⁵Nem dina wong pada nindakké penggawéan, nanging dina kaping pitu kuwi sabat, dina ngasuh babarpisan, dina sutyi kanggo GUSTI; sapa sing nindakké penggawéan ing dina sabat, kuwi kudu diukum pati.

¹⁶Wong Israèl pada netepana dina sabat, dina kuwi kudu diriyayakké turun-temurun, kanggo perjanjian sing langgeng.

¹⁷Kuwi dadia tanda ing antarané Aku lan wong Israèl kanggo ing sak lawas-lawasé, awit sak njeruhné nem dina enggoné GUSTI nggawé langit lan bumi, lan ing dina kaping pitu Panjenengané mandek nyambutgawé perlu ngasuh.”

¹⁸Sakwisé GUSTI mungkasi tembungé marang Moses ing gunung Sinai, terus ngekèki blèbèkan pernatan loro, blèbèkan watu sing ditulisi karo drijiné Gusti Allah.