Read Caribbean Javanese Pangentasan 35 Bible Online

Pangentasan 35 - Caribbean Javanese bible

Pangentasan 35

¹Moses terus nglumpukké sak pasamuan wong Israèl kabèh, lan pada diomongi mengkéné: “Iki tembungé sing dipréntahké karo GUSTI supaya pada dilakoni.

²Nem dina wong pada nandangana penggawéané, nanging ing dina kaping pitu kudu ana waktu ngasuh sing sutyi, ya kuwi sabat, dina ngasuh kanggo GUSTI. Saben wong sing nglakoni penggawéan ing dina kuwi, kudu diukum pati.

³Ing dina sabat kowé aja pada ngurupké geni ing ngendi waé ing sak njeruhné panggonan ing panggonanmu.”

⁴Uga menèh tembungé Moses marang sak pasamuan wong Israèl kabèh: “Iki tembungé sing dipréntahké karo GUSTI:

⁵Kowé pada masrahna pisungsung ngadep marang GUSTI sangka sing kok nduwèni. Saben wong karo legané atiné nggawaa pisungsung ngadep marang GUSTI: emas, slaka, tembaga,

⁶bakal mori wungu tuwa, bakal mori wungu nom, bakal mori abang, mori lenan alus, wulu wedus,

⁷lulangé wedus gèmbèl lanang sing dipulas abang, lulangé iwak tyutyut sing empuk, kayu akasia,

⁸lenga kanggo dimar, bumbu-bumbu kanggo lenga jebat lan dupa sing wangi-wangi,

⁹watu-watu onyx lan watu-watu sing bakal digunakké kanggo ing kotang éfod lan ing tutupé dada.

¹⁰Terus sakkèhé wong sak panunggalmu sing pinter pada tekaa lan nggawéa samubarang sing wis dipréntahké karo GUSTI,

¹¹ya kuwi Tarup Sutyi, payoné Tarup, lan tutupé payoné, tyantèlané lan plangané, kayu sing malang, tyagaké lan umpaké;

¹²peti kabèh pikulané, tutupé pangrukunan lan geberé aling-aling;

¹³méja kabèh pikulané lan pirantiné kabèh lan roti kurban;

¹⁴kandelar sing kanggo madangi kabèh pirantiné, dimar lan lengané sing kanggo madangi mau;

¹⁵mesbèh dupané kabèh pikulané, lenga jebatan lan dupa sangka bumbu sing wangi; geber lawangé Tarup Sutyi;

¹⁶mesbèh kurban obongan kabèh ayakan tembaga, pikulané lan pirantiné kabèh, wadah banyu dasarané;

¹⁷geber plataran, tyagaké, umpaké lan geber gapura plataran;

¹⁸patoké Tarup Sutyi lan patoké plataran kabèh taliné;

¹⁹sandangan sragam kanggo ngladèni ing omah sutyi, lan sandangan sutyi sandangané imam Harun lan sandangané para anaké kanggo ngimami.”

²⁰Wong sak pasamuan Israèl kabèh terus pada bubaran sangka ngarepé Moses.

²¹Sakwisé mengkono saben wong sing kerogoh atiné, karo lila sak kabèhé ati pada masrahaké pisungsung ngadep marang GUSTI, kanggo penggawéan ngrampungké Tarup Kumpulan lan kanggo kabèh kaperluané pangabekti ing kono uga kanggo nggawé sandangan sutyi.

²²Sakkèhé wong sing lila karo sak kabèhé atiné, lanang wadon, pada teka nggawa anting-anting irungé, anting-anting kupingé, ali-ali ségel lan kalung, werna-werna barang mas-masan; mengkono uga saben wong sing masrahaké pisungsung emas kanggo GUSTI kanggo pisungsung goyangan,

²³lan saben wong sing nduwé bakal wungu tuwa, bakal wungu nom, bakal abang, mori lenan alus, wulu wedus, lulangé wedus gèmbèl lanang sing dipulas abang, uga lulangé iwak, ya teka nggawa kuwi.

²⁴Saben wong sing arep masrahaké pisungsung rupa slaka utawa tembaga, kuwi ya teka lan nggawa pisungsung kuwi ngadep marang GUSTI, lan saben wong sing nduwé kayu akasia, ya teka nggawa kuwi kanggo ngedekké tarup kuwi.

²⁵Uga sakkèhé wong wadon sing pinter, pada nggawé mori déwé terus nggawa mori sing digawé mau, ya kuwi bakal mori wungu tuwa, bakal mori wungu nom, bakal mori abang lan mori lenan alus.

²⁶Lan sakkèhé wong wadon sing nduwé kaprigelan karo sak kabèhé ati pada nggawé mori wulu wedus.

²⁷Para penggedéné pada nggawa watu-watu onyx lan watu-watu sing bakal digawé kanggo kotang éfod lan tutupé dada,

²⁸bumbu-bumbu lan lenga kanggo dimar, kanggo lenga jebatan lan kanggo dupa wangi.

²⁹Sakkèhé wong lanang lan wadon sing sak kabèhé atiné pada nguruni kanggo sembarang gawèané sing dipréntahké karo GUSTI lantaran Moses supaya ditandangi wong-wong kuwi, ya kuwi wong Israèl, kuwi pada masrahaké pisungsung ngadep marang GUSTI.

³⁰Moses terus ngomong marang wong Israèl: “GUSTI wis netepké Bésaleèl anaké Uri anaké Hur, sangka taler Yéhuda,

³¹wis dikèki Rohé Gusti Allah, nganti nduwèni kaprigelan, pangertèn lan kaweruh kanggo sak rupané penggawéan,

³²ya kuwi bisa gawé rantyamané sing kudu ditindakké bab nggawé dandanan emas, slaka lan tembaga,

³³ngukir-ngukir watu-watu lan dikanggokké, ngukir kayu lan nindakké sak rupané penggawéan sing wis dirantyam mau.

³⁴Lan GUSTI wis ngekèki kapinteran ing atiné, mengkono uga marang Aholiab anaké Ahisamak sangka taler Dan, nganti bisa mulangi,

³⁵pada dikèki kaprigelan bisa nggarap sak rupané penggawéan tukang, gawéané wong sing pinter, nggarap barang bakal mori sing werna-werna sangka bakal mori wungu tuwa, bakal mori wungu nom, bakal mori abang lan mori lenan alus, uga tenunan, tegesé bisa nggarap sak rupané penggawéan lan ngrantyam rupa-rupa.