Read Caribbean Javanese Pangentasan 36 Bible Online

Pangentasan 36 - Caribbean Javanese bible

Pangentasan 36

¹Kaya mengkono enggoné kudu nyambutgawé Bésaleèl lan Aholiab lan saben wong sing pinter, sing wis dikèki kaprigelan lan pangertèn karo GUSTI, nganti pada ngerti bisané nggarap sak rupané penggawéan kanggo ngedekké omah sutyi, tyotyok apa karo préntahé GUSTI.”

²Moses terus nyeluk Bésaleèl karo Aholiab lan saben wong sing pinter, ing sak njeruhné atiné wis pada dikèki kapinteran karo GUSTI, ya sakkèhé wong sing karo sak kabèhé atiné supaya pada teka nindakké penggawéan kuwi.

³Kuwi terus pada nampani sangka tangané Moses sakkèhé pisungsung pawèhé wong Israèl kanggo penggawéan ngedekké omah sutyi. Nanging wong Israèl kuwi saben ésuk ijik terus teka waé enggoné pada masrahaké pisungsung kebungahan marang Moses.

⁴Lan sakkèhé para tukang sing nandangi sakkèhé penggawéan kanggo omah sutyi kuwi pada teka lan nandangi penggawéané déwé-déwé,

⁵terus pada nemoni marang Moses lan ngomong: “Wong-wong anggèné pada pawèh wis ngliwati sangka sing dibutuhaké kanggo nandangi penggawéan sing dipréntahké karo GUSTI.”

⁶Moses terus ngongkon ngabaraké ing tarup-tarupé, mengkéné: “Wong lanang utawa wadon wis ora susah nggawa apa-apa menèh kanggo pisungsung kanggo ing omah sutyi.” Mengkono dadi rayat mau dipenggak enggoné nggawa pisungsung menèh.

⁷Awit material sing dibutuhaké kanggo nggarap sakkèhé penggawéan wis tyukup, malah turah-turah.

⁸Ing antarané para tukang-tukang mau sing pinter terus pada nggarap Tarup Sutyi karo nggunakké tarup mori lenan alus sing bolahé ditenun lan bakal mori wungu tuwa, bakal mori wungu nom, lan bakal mori abang tyatyahé sepuluh; lan ana kerup mulékat gawéané tukang tenun, kabèh kuwi digawé karo wong-wong kuwi.

⁹Dawané saben tarup wolulikur éluh lan ambané saben tarup patang éluh, tarup mau kabèh ukurané pada.

¹⁰Tarup mau sing lima disambung-sambung dadi siji, lan sing lima uga dirangkep dadi siji.

¹¹Pungkasané tarup rangkep sing siji, ing pinggir pojok, dipasang kolongan tali wungu tuwa, mengkono uga tarup rangkep sijiné ya dipasang mengkono.

¹²Kolongan sèket dipasang ing tarup sing siji, lan kolongan sèket menèh ing pinggiré tarup sijiné. Pasangan kolongan mau siji lan sijiné adep-adepan.

¹³Lan gawé tyantèlan emas sèket iji, tarup siji lan sijiné terus dadi siji disambung karo tyantèlan mau.

¹⁴Terus gawé tarup wulu wedus kanggo payoné sing nutupi Tarup Sutyi, tyatyahé sewelas sing digawé.

¹⁵Saben potongan ukurané pada, dawané telung puluh éluh, lan uga ambané patang éluh.

¹⁶Tarup sing lima disambung-sambung dadi siji, lan tarup sing nem ya disambung déwé.

¹⁷Terus gawé kolongan tali sèket dipasang ing pinggir tarup sambungan sing siji ing pungkasané, lan kolongan sèket ing pinggir tarup sijiné.

¹⁸Mengkono menèh ya gawé tyantèlan tembaga sèket kanggo nggandèng tarup-tarupé mau dadi siji.

¹⁹Tarup mau ya digawèkké payoné lulangé wedus gèmbèl lanang sing dipulas abang lan ing sak nduwuré ketutupan ing lulangé iwak.

²⁰Tarup Sutyi kuwi digawèkké planga kayu akasia, sing didekké jejek,

²¹dawané saben planga sepuluh éluh lan ambané karo siji setengah éluh.

²²Saben planga ana purusé loro jèjèr, kaya mengkono enggoné gawé kabèh planga ing Tarup Sutyi.

²³Enggoné gawé plangané Tarup Sutyi kuwi, rong puluh dipasang ana pinggiran kidul,

²⁴planga rong puluh mau digawèkké umpak slaka patang puluh, dadi saben planga siji umpaké loro kanggo purusé loro mau, lan sak terusé saben planga siji umpaké loro kanggo purusé loro.

²⁵Ing sisihé Tarup Sutyi sijiné, ing sisih lor, ya digawèkké planga rong puluh iji,

²⁶karo umpaké slaka patang puluh iji, planga siji umpaké loro, lan ing sak terusé umpak loro kanggo planga siji.

²⁷Ing mburiné Tarup Sutyi ya kuwi sisih kulon, digawèkké planga nem iji.

²⁸Kanggo pojoké Tarup Sutyi digawèkké planga loro kanggo ing sisih mburiné.

²⁹Planga loro mau ing ngisor lan ing nduwur pada persis lan gandèng nganti tekan ing gelangan sing kaping pisan; kaya mengkono enggoné wong nggawé plangané ing pojok loro mau.

³⁰Dadi tyatyahé ana planga wolung iji kabèh umpaké slaka, kabèh nembelas; planga siji umpaké loro.

³¹Lan menèh ya gawé kayu malang kayu akasia: lima kanggo planga-planga ing sisihé sing siji Tarup Sutyi,

³²lan lima menèh kanggo ing sisihé sing kaping pindo Tarup Sutyi, lan lima menèh kanggo ing sisih mburiné, ing sisih kulon.

³³Ing tengah digawèkké tyagak wiwit pojok siji tekan pojok liyané.

³⁴Planga-planga mau dilapisi karo emas, lan gelangan sing dadi slobokané tyagak kuwi sing digawé sangka emas; kayu sing malang ya pada dilapisi karo emas.

³⁵Terus digawèkké geber ngarep, sing digawé bakal mori wungu tuwa, bakal mori wungu nom, bakal mori abang, mori lenan alus sing bolahé ditenun, didèkèki kerup mulékat gawéané tukang tenun.

³⁶Geber kuwi digawèkké tyagak kayu akasia papat sing dilapis karo emas, tyantèlané ya emas, lan tyagak-tyagaké kuwi pada didèkèki umpak slaka tyitakan papat.

³⁷Lawangé Tarup ya digawèkké geber, sing digawé bakal mori wungu tuwa, bakal mori wungu nom, bakal mori abang lan mori lenan alus sing bolahé ditenun: tenunan sing werna-werna,

³⁸Lan tyagaké lima lan ana tyantèlané kanggo tyagak-tyagaké mau; pojoké lan sambungané pada dilapisi karo emas, lan umpaké lima kuwi tembaga.