Read Caribbean Javanese Pangentasan 38 Bible Online

Pangentasan 38 - Caribbean Javanese bible

Pangentasan 38

¹Bésaleèl ya nggawé mesbèh kurban obongan kayu akasia, dawané limang éluh, ambané ya limang éluh, dadia pesagi, nanging duwuré telung éluh.

²Terus digawèkké sunguné sing pada dipasang ing pojokané papat iras-irasan karo mesbèhé, terus dilapisi tembaga.

³Uga menèh ya nggawé sakkèhé pirantiné mesbèh mau, rupa: wajan, sogok, bokor kanggo nyirami, porek uga anglo; kuwi kabèh sing digawé sangka tembaga.

⁴Mesbèh mau ya digawèkké ayakan pawon jala tembaga, dipasang ing sak ngisoré pinggiré, wiwit sangka ngisor tekan ing separo duwuré.

⁵Lan ya nggawé gelangan tyitakan papat dipasang ing pojoké papat ayakan tembaga mau, kanggo slobokané pikulan.

⁶Pikulan mau sing digawé sangka kayu akasia lan dilapisi tembaga.

⁷Pikulané terus dislobokaké ing gelangan sing sisih ing bangkèkané mesbèh, supaya bisa diusung. Mesbèh mau sing digawé planga, ing njeruhné growong.

⁸Terus nggawéa wadah banyu lan uga tadahané sing digawé tembaga, pangiloné para wong wadon sing pada ngladèni penggawéan ing ngarepé lawang Tarup Kumpulan.

⁹Uga menèh Bésaleèl ya nggawé plataran ing sisih kidul; geberé plataran mau mori lenan alus tenunan sing bolahé ditenun, dawané 100 éluh;

¹⁰tyagaké geber rong puluh lan umpaké ya rong puluh sangka tembaga, nanging tyantèlané tyagak lan sunduké sangka slaka.

¹¹Ing sisih lor ya 100 éluh; tyagaké geber rong puluh lan umpaké rong puluh sangka tembaga, tyantèlané tyagak lan sunduké sangka slaka.

¹²Ing sisih kulon: dawané geber sèket éluh, tyagaké sepuluh, umpaké sepuluh, tyantèlané lan sunduké sangka slaka.

¹³Lan ing sisih wétané sèket éluh,

¹⁴ya kuwi geber ing sisihé gapura dawané limalas éluh, tyagaké telu umpaké telu;

¹⁵lan ing sisih sijiné gapura kuwi dadi sisih-sisihan ing gapurané plataran, ana geberé limalas éluh, tyagaké telu umpaké telu.

¹⁶Sakkèhé geber ing sak ubengé plataran kuwi sangka mori lenan alus tenunan sing bolahé ditenun.

¹⁷Umpaké tyagak kuwi tembaga, nanging tyantèlané lan sunduké sangka slaka, ing duwuré ya dilapis ing slaka. Sakkèhé tyagak plataran kuwi pada sambungana lan sunduké sangka slaka.

¹⁸Geberé gapura plataran kuwi tenunan alus werna-werna, sing digawé sangka bakal mori wungu tuwa, wungu nom, abang lan digawé sangka mori lenan alus sing bolahé ditenun: dawané rong puluh éluh, nanging duwuré lan ambané limang éluh, pada karo geberé plataran.

¹⁹Tyagak papat lan umpaké papat kuwi sangka tembaga, nanging tyantèlané slaka, ing duwuré tyagak uga pada dilapis slaka, mengkono uga sunduké sangka ya slaka.

²⁰Lan sakkèhé patoké sing kanggo ing Tarup Sutyi lan plataran kuwi kudu sangka tembaga.

²¹Iki tyatyahé bab ragat kanggo ngedekké Tarup Sutyi, ya kuwi Tarup Sutyi sing isiné angger-anggeré Gusti Allah, digawé awit sangka préntahé Moses, karo para turunané Lévi dipimpin karo Itamar, anaké Harun.

²²Bésaleèl anaké Uri anaké Hur sangka Taler Yéhuda, kuwi sing nggarap sembarang sing dipréntah karo GUSTI marang Moses,

²³dibantu karo Aholiab anaké Ahisamak, sangka taler Dan, wong sing pinter ing penggawéan, nggawé tenunan werna-werna nganggo bolah wungu tuwa, wungu nom, abang lan mori lenan alus.

²⁴Kabèh emas sing kanggo nggawé omah sutyi, kuwi emas pisungsung, tyatyahé ana sanga likur talénta luwih 730 sèkel manut timbangan omah sutyi.

²⁵Lan slaka pisungsungé wong sing dityateti sangka sak tengahé pasamuan, kuwi tyatyahé ana 100 talénta luwih 1.775 sèkel, manut timbangan omah sutyi:

²⁶saben wong siji sak beka, ya kuwi setengah sèkel, ditimbang miturut sikelan omah sutyi, sangka saben wong sing pada ketyatet, sing umuré rong puluh taun munggah, gunggungé wong 603.550 wong.

²⁷Slaka mau sing 100 talénta dityitak dadi umpak-umpaké omah sutyi lan umpak geber. Slaka 100 talénta kanggo umpak 100 iji, dadi sak talénta kanggo umpak siji.

²⁸Slaka sing 1.775 sèkel kuwi dienggo gawé tyantèlan-tyantèlané tyagak lan nglapisi tyagak pérangané sing nduwur, uga menèh tyagak mau pada sambungana karo sunduké.

²⁹Kanggo tembaga pisungsung kuwi tyatyahé ana pitung puluh talénta luwih 2400 sèkel.

³⁰Tembaga mau dienggo gawé umpaké lawang Tarup Kumpulan, mesbèh, kabèh enaman kawat lan sakkèhé pirantiné mesbèh mau,

³¹umpak-umpaké ing sak ubengé plataran, umpaké gapurané plataran kuwi, sakkèhé patok-patoké Tarup Sutyi lan sakkèhé patoké plataran ing sak ubengé.