Read Caribbean Javanese Pangentasan 40 Bible Online

Pangentasan 40 - Caribbean Javanese bible

Pangentasan 40

¹GUSTI terus ngetokké tembung marang Moses, mengkéné:

²“Ing sasi kaping pisan tanggal sepisan kowé ngedekna Tarup Sutyi, ya kuwi Tarup Kumpulan.

³Petiné angger-angger terus kok sèlèhna ing kono lan aling-alingana geber.

⁴Sakwisé mengkono méjané kok lebokna lan tatanana pirantiné manut pernahé. Kandelaré lebokna lan dimar-dimaré pasangana.

⁵Mesbèhé pedupan emas sèlèhna ing ngarepé peti angger-angger, terus pasangana geberé Tarup Sutyi.

⁶Mesbèhé kurban obongan sèlèhna ing ngarepé lawang Tarup Sutyi ya kuwi Tarup Kumpulan.

⁷Wadahé banyu sèlèhna ing antarané Tarup Kumpulan lan mesbèh kuwi, terus isènana banyu.

⁸Sakwisé mengkono nggawéa platarané mubeng lan geberé pasangen ing gapurané plataran.

⁹Terus njupuka lenga jebatan, Tarup Sutyi kabèh sak isiné pada dijebatani; mengkono enggonmu nyutyèkké kuwi kabèh pirantiné, kabèh pada dadia sutyi.

¹⁰Mesbèh kurban obongan kuwi ya dijebatani kabèh pirantiné kabèh, mengkono enggonmu nyutyèkké mesbèh kuwi, nganti kuwi dadi sing Mahasutyi.

¹¹Wadah wisuhan kabèh sak umpaké kuwi jebatana lan mengkono enggonmu nyutyèkké kuwi.

¹²Harun lan para anak-anaké tekakna menyang ing lawangé Tarup Kumpulan, pada sutyèkna karo banyu.

¹³Harun terus enggoni sandangan sutyi, terus jebatana lan sutyèkna supaya terus nandangi penggawéané imam ngladèni marang Aku.

¹⁴Mengkono uga anak-anaké pada tekakna lan enggoni klambi,

¹⁵terus jebatana, kaya enggonmu jebati bapaké, supaya pada nindakké penggawéané imam ngladèni marang Aku; lan iki ditindakké, supaya awit sangka dijebatani mau ditetepaké dadi imam ing selawasé turun-temurun.”

¹⁶Moses terus nandangi kabèh sing wis dipréntahké karo GUSTI.

¹⁷Bareng ing taun sing kaping pindo sasi kaping pisan, tanggal sepisan, Tarup Sutyi kelakon diedekaké.

¹⁸Moses ngedekké Tarup Sutyi kuwi, umpak-umpaké dipasang, planga-plangané dipasang, kayu sing malang dipasang lan tyagak-tyagaké diedekaké.

¹⁹Tarupé payon terus digelar nutupi Tarup Sutyi lan terus ditumpangi payoné kaya sing wis dadi préntahé GUSTI marang Moses.

²⁰Panggonan angger-anggeré Gusti Allah terus dijikuk lan disèlèhké ing njeruh peti, petiné terus dipasangi pikulan lan ditumpangké tutupé pangrukunan.

²¹Petiné terus diusung menyang Tarup Sutyi lan geberé penutup dipasang digawé ngaling-alingi petiné angger-angger, kaya sing wis dipréntahké karo GUSTI marang Moses.

²²Méjané terus didèkèkké ing njeruh Tarup Kumpulan, didèkèkké ing njeruh Tarup Sutyi sisih lor ing sak njabané geber

²³lan ditumpangké roti kurban ditata ing ngarepé GUSTI, kaya sing wis dipréntahké karo GUSTI marang Moses.

²⁴Kandelaré ya terus dipernahaké ing njeruh Tarup Kumpulan adep-adepan karo méja mau, ing Tarup Sutyi sisih kidul,

²⁵uga dimaré pada dipasang ing kono ing ngarepé GUSTI, kaya sing wis dipréntahké karo GUSTI marang Moses.

²⁶Mesbèh emas dipapanaké ing njeruh Tarup Kumpulan ing ngarepé geber.

²⁷Ing mesbèh kuwi terus diobongi dupa wangi kaya sing wis dipréntahké karo GUSTI marang Moses.

²⁸Sakwisé mengkono lawangé Tarup Sutyi terus dikèki geber.

²⁹Mesbèh kurban obongan dipernahaké ing ngarepé lawang Tarup Sutyi, ya kuwi Tarup Kumpulan, terus masrahaké kurban obongan lan kurban panganan ing mesbèh kono, kaya sing wis dipréntahké karo GUSTI marang Moses.

³⁰Wadahé banyu terus didèkèkké ing antarané Tarup Kumpulan lan mesbèh lan terus diisèni banyu kanggo wisuhan.

³¹Moses, Harun lan para anaké pada wisuh tangan lan sikilé karo banyu kuwi.

³²Saben-saben arep mlebu ing Tarup Kumpulan lan yèn nyedekki mesbèh, pada wisuh tangan lan sikilé kaya sing wis dipréntahké karo GUSTI marang Moses.

³³Tyagak-tyagaké plataran terus diedekaké ing sak ubengé Tarup Sutyi lan mesbèh lan gapura plataran kuwi terus dipasang geber. Mengkono Moses enggoné ngrampungké penggawéan kuwi.

³⁴Sakwisé mengkono mendung nutupi Tarup Kumpulan, lan Tarup Sutyi terus kebak karo kamulyané GUSTI,

³⁵nganti Moses ora bisa mlebu ing Tarup Kumpulan, awit kuwi ketutupan karo mendung, lan kamulyané GUSTI ngebeki Tarup Sutyi.

³⁶Lan yèn mendung mau mumbul sangka Tarup Sutyi, wong Israèl terus budal sangka tarupé déwé-déwé,

³⁷nanging yèn mendung kuwi ora mumbul, ya pada ora budal nganti sak mumbulé mendungé.

³⁸Awit mendungé GUSTI kuwi ing wantyi awan ing sak nduwuré Tarup Sutyi, lan ing wantyi mbengi ana geni, kétok marang wong Israèl kabèh ing saben panggonan sing dipanggoni.