Read Caribbean Javanese Ayub 10 Bible Online

Ayub 10 - Caribbean Javanese bible

Ayub 10

¹“Nyawaku wis jelèh urip, aku arep ngumbar sambatku, aku arep ngomong sak njeruhné kasusahané nyawaku sing pait.

²Aku arep ngomong marang Gusti Allah: Panjenengan supaya aja nganti nyalahké kula; kula supaya Panjenengan nduduhké, apa sebabé Panjenengan nglawan marang kula.

³Untungé apa ta kanggo Panjenengan, yèn nindes wong kuwi, yèn Panjenengan ngguwak penggawéané tangan Panjenengan lan Panjenengan ngekèki bantuan marang rantyamané wong duraka?

⁴Apa Panjenengan nduwé mripat daging? Enggèn Panjenengan ndelok samubarang apa ya kaya tyarané manungsa enggoné ndelok?

⁵Umuré Panjenengan apa mèmper kaya umuré manungsa, itungan taun Panjenengan apa ya kaya umuré wong lanang,

⁶nanging Panjenengan kok gelem nggolèki kesalahan kula, lan métani dosa kula,

⁷sakjané Panjenengan ngerti, yèn kula duduk wong duraka, lan yèn ora ana wong sing bisa utyul sangka tangan Panjenengan?

⁸Tangan Panjenengan sing nganakké lan nggawé kula, nanging Panjenengan kok terus ora gelem weruh kula lan bakal ngentèkké kula?

⁹Panjenengan supaya gelem éling, yèn Panjenengan sing nggawé kula sangka lempung, kok bakal Panjenengan dadèkké lebu menèh!

¹⁰Apa duduk Panjenengan sing ngutyurké kula kaya mèlek, kok terus bakal Panjenengan kentelaké dadi kèju?

¹¹Panjenengan templèki kulit karo daging, Panjenengan enami balung lan otot.

¹²Panjenengan ngekèki urip lan kawelasan; nyawa kula Panjenengan jaga lantaran pangrumat Panjenengan.

¹³Nanging kahanané sing mengkéné kuwi kok Panjenengan delikké ing njeruhné ati; kula ngerti, yèn kuwi pantyèn wis dadi karep Panjenengan.

¹⁴Yèn kula nggawé dosa, Panjenengan mesti bakal weruh, lan kula ora bakal Panjenengan bébaské tanpa kesalahan.

¹⁵Yèn kula duraka, tyilaka kula; yèn kula bener ya ora bisa ndangak, awit enggèn kula warek kewirangan, lan weruh kasangsarané kula.

¹⁶Yèn kula ndangak, Panjenengan mesti terus ngoyak kula kaya singa lan ngétokké pangwasané Panjenengan sing nggumunaké kuwi marang kula menèh.

¹⁷Panjenengan bakal ngajokké seksi-seksi anyar sing nglawan kula, - Panjenengan nggedèkké bebendu Panjenengan marang kula - Panjenengan bakal ngajokké suradadu-suradadu anyar, malah nyerang marang kula.

¹⁸Apa sebabé Panjenengan ngetokké kula sangka wetengé ibuku? Luwih apik yèn kula mati, sak durungé kula diweruh karo wong,

¹⁹kaya-kaya kula ora tau ana, sangka wetengé ibu terus waé digawa menyang kuburan.

²⁰Apa dina-dina umur kula ora mung setitik? Panjenengan supaya gelem ngendek kula, supaya kula bisa bungah sak untara,

²¹sak durungé kula lunga lan ora mulih menèh menyang negara sing peteng ndedet,

²²marang negara sing peteng ndedet, panggonan sing peteng banget lan ora nggenah, sing sloroté pepadangé pada karo pepeteng.”